شەتەلدىكتەرگە Neo Nomad ۆيزاسى قانداي مۇمكىندىك بەرەدى
استانا. قازاقپارات - Neo Nomad Visa الەمنىڭ ءارتۇرلى ەلىنەن كەلگەن ساياحاتشىلارعا كوپتەگەن مۇمكىندىك بەرەدى. بۇل ۆيزا شەتەلدىك تۋريستەرگە قازاقستاندا ءبىر جىلعا دەيىن تۇرۋعا جانە وزدەرىنىڭ شەتەلدەگى كومپانيالارىندا قاشىقتان جۇمىس ىستەۋىنە مۇمكىندىك بەرەدى. جاڭا B12-1 ۆيزاسىن الۋ ءۇشىن قازاقستان رەسپۋبليكاسىنىڭ شەتەلدەگى ەلشىلىگىنە نەمەسە كونسۋلدىق مەكەمەلەرىنە جۇگىنۋ قاجەت. بۇل تۋرالى تۋريزم جانە سپورت مينيسترلىگى حابارلادى.
قازاقستاندا ساياحاتتاپ ءجۇرىپ، جۇمىسىن جالعاستىرعىسى كەلەتىن شەتەلدىكتەر Neo Nomad Visa-عا ءوتىنىش بەرە الادى. ول ءۇشىن جاقىن ماڭدا ورنالاسقان قازاقستان رەسپۋبليكاسىنىڭ شەتەلدەگى مەكەمەسىنە بىرنەشە قۇجاتتى ۇسىنۋ قاجەت:
كەيىنگى 6 ايداعى بانك شوتىنان ءۇزىندى كوشىرمە، اي سايىنعى تابىسى 3000 ا ق ش دوللارىنان جوعارى ەكەنىن راستايتىن قۇجات
ازاماتتىعى بار ەلدىڭ ۋاكىلەتتى ورگانى بەرگەن سالىق دەكلاراتسياسى
ازاماتتىعى نەمەسە تۇراقتى مەكەنجايى بار ەلدىڭ ورگانى بەرگەن سوتتالماعانى تۋرالى انىقتاما
ۆيزانىڭ قولدانىلۋ مەرزىمىنە دەيىن جارامدى مەديتسينالىق ساقتاندىرۋ
قازاقستانداعى تۋريستىك كومپانيالاردان شاقىرۋ (48 ەلدىڭ ازاماتى ءۇشىن تالاپ ەتىلمەيدى)
Neo Nomad Visa-نى راسىمدەۋ 5 جۇمىس كۇنىنەن اسپايدى. ۆيزا ءبىر جىلعا دەيىنگى مەرزىمگە بەرىلەدى جانە ونى ۇزارتۋ قاراستىرىلعان. نەگىزگى ءوتىنىش بەرۋشىنىڭ وتباسى مۇشەلەرى دە ۆيزا الا الادى.
Neo Nomad Visa ارقىلى قازاقستاندا جۇمىس ىستەۋ مۇمكىندىگى قاراستىرىلماعانىن اتاپ وتكەن ءجون. قازاقستان رەسپۋبليكاسى سالىق كودەكسىنىڭ 216-بابىنا سايكەس Neo Nomad Visa يەسىنىڭ قازاقستاندا سالىق تولەۋ بويىنشا مىندەتتەمەلەرى جوق، ويتكەنى ونىڭ تابىس كوزى ەلدەن تىس جەردە ورنالاسقان.
بۇعان دەيىن قازاقستاندا زاماناۋي كوشپەندىلەرگە ارنالعان جاڭا Neo Nomad ۆيزاسى ەنگىزىلگەنى تۋرالى جانە ونىڭ زاماناۋي كوشپەندىلەرگە - ساياحاتتاپ، قاشىقتان جۇمىس ىستەيتىن شەتەلدىك تۋريستەرگە ارنالعانى تۋرالى تولىق حابارلاعان بولاتىنبىز.
