نارحوز ۋنيۆەرسيتەتىنە تۇرار رىسقۇلوۆتىڭ ەسىمى قايتا بەرىلە مە

استانا. KAZINFORM - نارحوز ۋنيۆەرسيتەتىنە تۇرار رىسقۇلوۆتىڭ ەسىمىن قايتا بەرۋ ماسەلەسى پىسىقتالىپ جاتىر. بۇل جايىندا پرەمەر- مينيستر ولجاس بەكتەنوۆتىڭ سەنات دەپۋتاتتارىنىڭ ساۋالىنا بەرگەن جاۋابىندا ايتىلعان.

«نارحوز ۋنيۆەرسيتەتى جەكەمەنشىك جوعارى وقۋ ورنى ەكەنىن ەسكەرە وتىرىپ، ت. رىسقۇلوۆتىڭ ەسىمىن ۋنيۆەرسيتەتكە قايتا بەرۋ مۇمكىندىگىن قاراستىرۋ ماسەلەسىن عىلىم جانە جوعارعى ءبىلىم مينيسترلىگى پىسىقتاپ جاتىر. مينيسترلىك ونىڭ قورىتىندىسىن دەپۋتاتتىق كورپۋسقا قوسىمشا حابارلايدى»، - دەپ اتاپ وتەدى ۇكىمەت باسشىسى جاۋابىندا.

جالپى، پرەمەر- ءمينيستردىڭ دەرەگىنشە، الاش كوسەمدەرى مەن كەڭەس قايراتكەرلەرىنىڭ ەسىمىن ماڭگى ەستە قالدىرۋ ماقساتىندا ەلىمىزدە ءبىرقاتار ءىرى قوعامدىق- ساياسي شارالار وتكىزىلەدى.

بەكىتىلگەن «تاريحي تۇلعالار» تىزىمىنە سايكەس كەشەندەر تۇرعىزۋ، ەلدى مەكەندەرگە، ساياباقتارعا، كوشەلەر مەن مەكتەپتەرگە كەلەشەك ۇرپاق ءۇشىن ۇلگى بولاتىن تۇلعالار ەسىمدەرىنىڭ بەرىلۋى جۇزەگە اسىرىلادى.

بۇل رەتتە ءاليحان بوكەيحاننىڭ، احمەت بايتۇرسىن ۇلىنىڭ، ءمىرجاقىپ دۋلات ۇلىنىڭ، ءالىمحان ەرمەكوۆتىڭ، تۇرار رىسقۇلوۆتىڭ، سۇلتانبەك قوجانوۆتىڭ، سەيىتقالي مەڭدەشيەۆتىڭ، سانجار اسفەندياروۆتىڭ، تەمىربەك جۇرگەنوۆتىڭ، ساكەن سەيفۋلليننىڭ، ءىلياس جانسۇگىروۆتىڭ، بەيىمبەت مايليننىڭ ەسىمدەرى ەلدى مەكەندەرگە، مادەنيەت وبەكتىلەرىنە، جوعارى وقۋ ورىندارىنا، مەكتەپتەرگە جانە وزگە دە نىساندارعا بەرىلگەن.

ولجاس بەكتەنوۆتىڭ جاۋابىنا قوسىمشا بەرىلگەن انىقتاماعا سايكەس، ءا. بوكەيحاننىڭ ەسىمىمەن 1 ەلدى مەكەن، 69 قۇرامداس بولىك، 22 وبەكتى، ا. بايتۇرسىن ۇلىنىڭ ەسىمىمەن 3 ەلدى مەكەن، 150 قۇرامداس بولىك، 46 وبەكتى، م. دۋلات ۇلىنىڭ ەسىمىمەن 1 ەلدى مەكەن، 50 قۇرامداس بولىك، 11 وبەكت، ءا. ەرمەكوۆتىڭ ەسىمىمەن 16 قۇرامداس بولىك، 6 وبەكتى، ت. رىسقۇلوۆتىڭ ەسىمىمەن 5 ەلدى مەكەن، 193 قۇرامداس بولىك، 27 وبەكتى، س. قوجانوۆتىڭ ەسىمىمەن 26 قۇرامداس بولىك، 6 وبەكتى، س. مەڭدەشيەۆتىڭ ەسىمىمەن 14 قۇرامداس بولىك، س. اسفەندياروۆتىڭ ەسىمىمەن 22 قۇرامداس بولىك، 3 وبەكتى، ت. جۇرگەنوۆتىڭ ەسىمىمەن 3 ەلدى مەكەن، 21 قۇرامداس بولىك جانە 6 وبەكتى، س. سەيفۋلليننىڭ ەسىمىمەن 3 ەلدى مەكەن، 358 قۇرامداس بولىك جانە 42 وبەكتى، ءى. جانسۇگىروۆتىڭ ەسىمىمەن 5 ەلدى مەكەن، 89 قۇرامداس بولىك جانە 9 وبەكتى، ب. مايليننىڭ ەسىمىمەن 4 ەلدى مەكەن، 110 قۇرامداس بولىك جانە 12 وبەكتى اتالعان.

اۆتور

مارلان جيەمباي