مۋزەيگە جەتكىزبەي، سىرتقا اكەتپەك بولعان - ساق ءداۋىرىنىڭ 9 جادىگەرى قالاي زاڭسىز اكتيۆكە اينالدى
استانا. KAZINFORM - ۇلتتىق مۋزەي ديرەكتورىنىڭ عىلىم جونىندەگى ورىنباسارى اقمارال يبرايەۆا شەتەلگە زاڭسىز شىعارىلماق بولعان ساق دارىگەرىنىڭ جادىگەرلەرى تۋرالى مالىمەت ايتتى.
زاڭسىز اكتيۆتەردى ەلگە قايتارۋ جونىندەگى كوميسسيا زاڭسىز يەمدەلگەن قۇندى جادىگەرلەردىڭ ەلورداداعى ۇلتتىق مۋزەيگە بەرىلەتىنى تۋرالى بىرنەشە رەت اقپارات تاراتقان. استانادا ءوتىپ جاتقان قازاقستان مۋزەي كونگرەسىندە ۇلتتىق مۋزەي ديرەكتورىنىڭ عىلىم جونىندەگى ورىنباسارى اقمارال يبرايەۆا وسى جۇمىستىڭ قانداي ساتىدا ەكەنىن ايتتى.
«ءبىز قايتارىلعان اكتيۆتەر بويىنشا وسىعان جاۋاپتى مەكەمەلەرمەن جۇمىس ىستەپ جاتىرمىز. ءبىراق زەرتتەپ، زەردەلەۋ جۇمىستارى ءالى بىتكەن جوق. بىزگە ءالى قايتارىلعان جوق. تەك قانا ول مەكەمەلەردەن ۇسىنىس ءتۇستى. ول ۇسىنىس - جادىگەرلەردى زەرتتەپ، كەزەڭىن، قۇندىلىعىن انىقتاپ بەرۋ تۋرالى ارنايى حات جولداعان. سول حاتتىڭ اياسىندا ساق داۋىرىنە جاتاتىن 9 جادىگەرگە ساراپتاما جۇرگىزىپ جاتىرمىز. ياعني، ولاردىڭ ناقتى قاي كەزەڭنىڭ جادىگەرى ەكەنىن، قۇندىلىعىن زەردەلەيمىز. الدىن الا قورىتىندىسىن بەردىك تە. ءبىراق زەرتحانالىق زەرتتەۋلەر ءالى جۇرگىزىلگەن جوق. سىناماسى، ولشەمى بار دەگەندەي. وسىنىڭ ءبارى زەرتحانا تۇرعىسىندا جۇرگىزىلەدى. ول جادىگەرلەر ءالى ءبىزدىڭ قولىمىزعا بەرىلگەن جوق»، - دەدى ول Kazinform ءتىلشىسىنىڭ ساۋالىنا بەرگەن جاۋابىندا.
سونداي-اق، ول اتالعان جادىگەرلەر عىلىمي ورتاعا بۇرىننان ءمالىم بۇيىمدار ەكەنىن ايتادى.
«بۇل جادىگەرلەر ساق داۋىرىنە جاتاتىن التىن بۇيىمدار. «التىن ادامداردىڭ» بويىنان تابىلىپ جاتقان جاپسىرما، قاپسىرما بۇيىمدارعا ۇقساس زاتتار. ءبىزدىڭ عىلىمي قىزمەتكەرلەردىڭ ايتۋىنشا، ول بۇيىمدار زەرتتەۋشىلەر ورتاسىنا باياعىدان بەلگىلى بولعان. ءبىراق مۋزەيگە ءتۇسىپ ۇلگەرمەگەن. مۋزەيگە تۇسپەستەن سىرتقا شىعارىلاتىن كەزىندە انىقتالعان عوي. ياعني، شەتەلگە شىعىپ كەتپەگەن. ال ەندى كىمدەردىڭ شىعارماق بولعانىن، ولاردىڭ قولىنا قالاي تۇسكەنىن ءبىز بىلمەيمىز. ونى بىلۋگە قۇزىرەتىمىز دە جوق»، - دەيدى مۋزەي باسشىسىنىڭ ورىنباسارى.
وسىعان دەيىن بۇقار جىراۋ اتىنداعى ادەبيەت جانە ونەر مۋزەيىندە قازاق كينوسىنىڭ اڭىزى ءاسانالى ءاشىموۆتىڭ جەكە زاتتارى قويىلعان كابينەت اشىلعانىن حابارلادىق.
