مۋزەي ءتۇنى: ۇلتتىق مۋزەي استانالىقتاردى نەسىمەن قۋانتادى

استانا. KAZINFORM - داستۇرگە ساي 18-مامىردا ساعات 18:00-00:00 ارالىعىندا قازاقستان ۇلتتىق مۋزەيىندە حالىقارالىق مۋزەيلەر كۇنىنە ارنالعان «مۋزەي ءتۇنى» اكسياسى شەڭبەرىندە «مۋزەي - قۇندىلىقتار مەكەنى» اتتى مادەني-تانىمدىق ءىس-شارا وتەدى.

ءىس-شارانىڭ ماقساتى - رۋحاني- مادەني قۇندىلىقتاردى، حالقىمىزدىڭ تاريحىن، مادەنيەتىن ءبىر كەڭىستىككە بىرىكتىرە وتىرىپ، ءار ءتۇرلى جانر مەن ستيلدەگى ونەر تۋىندىلارىن ۇسىنۋ. مۋزەي قىزمەتىن، ونداعى ەكسپوناتتار مەن جادىگەرلەردى كەڭىنەن ناسيحاتتاۋ.

بۇل كۇنى تاڭعى ساعات 10:00-نان باستاپ «بالدىرعان گيد» شولۋ ەكسكۋرسيالارى، ۇلتتىق مۋزەيدىڭ عىلىمي جوبالار اياسىندا جارىق كورگەن كىتاپتاردىڭ تۇساۋكەسەرى، كارتينا مەن ءمۇسىن تۋىندىلارىنا كوشىرمە جاساۋدان شەبەرلىك سىنىبى مەن ۇلتتىق مۋزەيدىڭ جوبالارى اياسىنداعى مۋزەيلىك ساباقتار وتەدى.

ساعات 16:00-دە ق ر سۋرەتشىلەر وداعىنىڭ مۇشەسى رافاەل سلەكەنوۆتىڭ «ءتاڭىر نۇرى» اتتى جەكە كورمەسى اشىلادى.

ساعات 18:00-دەن باستاپ مۋزەي قوناقتارىنا روزا باعلانوۆا اتىنداعى «قازاق كونسەرت» مەملەكەتتىك كونسەرتتىك ۇيىمىنىڭ كونسەرتى، قولونەرشىلەر جارمەڭكەسى، «دالا كەسكىندەمەسى: رامىزدەر، بوياۋلار، بەينەلەر» مەن «ەرلىككە تاعزىم - ەلدىكتىڭ بەلگىسى» كورمەلەرى، ۇلتتىق مۋزەيدىڭ كونسەرۆاتسيا جانە قالپىنا كەلتىرۋ قىزمەتىنىڭ شەبەرلىك ساباقتارى، «مۋزەي قورىنداعى اتاقتى تۇلعالار دومبىراسىنىڭ ءۇنىن جاڭعىرتۋ» اتتى لەكسيا- كونسەرت ۇسىنىلادى.

سونىمەن قاتار كورەرمەن ءۇشىن تەاترلاندىرىلعان ەكسكۋرسيا، اقىندار ايتىسى مەن «جۇلدىزدى گيد. 10 جۇلدىز. 10 جاۋھار» شوۋ- جوباسى ۇيىمداستىرىلادى. مادەني- تانىمدىق ءىس- شارا «Crossfire Show» قويىلىمىمەن اياقتالادى.

اتالعان مادەني ءىس- شارا ۇلتتىق مۋزەيدە ءداستۇرلى تۇردە ۇيىمداستىرىلىپ كەلەدى. وتكەن جىلى كەلۋشىلەر سانى 48 مىڭعا جۋىقتادى.

ايتا كەتەيىك، «حالىقارالىق مۋزەي كۇنى» مەرەكەسى 1977 -جىلى حالىقارالىق مۋزەيلەر كەڭەسىنىڭ باس كونفەرەنسياسىندا بەكىتىلگەن. سول جىلى العاشقى «مۋزەي ءتۇنى» ءىس-شاراسى بەرلين قالاسىندا ءوتتى.

اۆتور

داۋلەت ىزتىلەۋ