مەيىرگەرلەردى ءومىردىڭ ءوزى قاتالدىققا ۇيرەتەدى - مەدبيكەلەرمەن سۇحبات

استانا. KAZINFORM - بۇگىن - حالىقارالىق مەيىرگەرلەر كۇنى. سوعان وراي «بۇگىن» ستۋدياسىنا 30 جىلدان استام ۋاقىت بويى ادام جانىن اراشالاپ جۇرگەن اق حالاتتىلار قوناق بولدى.

ساۋلە ىسقاقوۆا 1985 -جىلدان بەرى مەدبيكە بولىپ قىزمەت ەتەدى. ءومىرىنىڭ 40 جىلىن مەديتسينا سالاسىنا ارناعان ابزال جان بالا كەزىنەن وسى ماماندىقتى ارمانداعانىن ايتادى.

- مەن بالا كەزىمنەن ءبىر عانا ماماندىقتى تاڭداپ، مەديتسينا قىزمەتكەرى بولامىن دەپ شەشتىم. بۇل شەشىمىمە اسەر ەتكەن - مەنىڭ اپالارىم. اپالارىم دا كاسىبي دارىگەرلەر. جىلدار بويى جالعاسقان ءداستۇر بويىنشا، ارتتارىنان مەن دە مەديتسينا سالاسىندا جۇمىس ىستەيمىن. مەنەن كەيىن مەنىڭ بالالارىم جالعاستىرىپ جاتىر. سول سەبەپتى ءبىزدىڭ اۋلەتىمىز - دارىگەرلەر اۋلەتى. قازىر ءتورتىنشى بۋىن وسى سالادا قىزمەت ەتىپ جاتىر. 40 جىلدان بەرى ءبىر سالادا، انەستەزيولوگيا- رەانيماتولوگيا بولىمىندە مەيىرگەر، مەدبيكە بولىپ ىستەپ كەلە جاتىرمىن، - دەيدى 2-كوپبەيىندى قالالىق اۋرۋحانا مەدبيكەسى.

الميرا ەڭسەبايەۆا دا ءدال وسى اۋرۋحانادا قىزمەت ەتەدى. ەڭبەك جولىن شىعىس قازاقستان وبلىسىندا باستاعان. 30 جىل بويى مەدبيكە بولىپ جۇمىس ىستەگەن ستۋديا قوناعى پاندەميا كەزىندەگى قيىن كۇندەرىن ەسكە الدى.

- پاندەميا جاڭادان باستالىپ جاتقاندا فيلتر كابينەتىندە جۇمىس ىستەدىك. ءبىز ول كەزدە ۋاقىتقا مۇلدە قارامادىق. اربامەن كەلە جاتقان ناۋقاستارعا العاشقى كومەك كورسەتىپ، بۇگىن بىرەۋىنىڭ بولسا دا جاعدايى وڭالسا ەكەن، وسى جەردەن امان كەتسە ەكەن دەپ، جانۇشىرا كومەكتەسەتىن ەدىك. ەلىمىزدە كوپ تۇرعىن وسى پاندەميانىڭ كەسىرىنەن و دۇنيەگە اتتاندى. سول ۋاقىتتارى كۇن-ءتۇن دەمەي جۇمىس ىستەدىك، وتباسىمىزدى ءتىپتى دە ۇمىتتىق. ول كەزدەر وتە قيىن بولدى. سوعان قاراماستان ناۋقاستارعا كوز جاسىمىزدى كورسەتكەن جوقپىز. تەك العا ۇمتىلا بەردىك. ءبىر ناۋقاستىڭ بەتى بەرى قاراسا، مەدبيكەلەر مەن دارىگەرلەر جۇگىرىپ بارىپ، «اتى-ءجونىن ايتىپ، انا ناۋقاس كوزىن اشتى» دەپ قۋانىپ، ءسۇيىنشى سۇرايتىنبىز. كوزبەن كورگەن باسقا، سوزبەن ايتقاندا باسقاشا، - دەيدى ول.

كەيىپكەرلەرىمىز بۇل جۇمىستىڭ وڭاي ەمەستىگىن ايتادى. ءتىپتى مەدبيكەلىك قىزمەت نازىك جانداردى قاتالدىققا تاربيەلەگەنىن دە جاسىرمادى.

- ءبىزدىڭ ماماندىعىمىز وڭاي دەپ ايتا المايمىز. تەك ءوزىمىزدىڭ جەكە تاعدىرىمىز عانا ەمەس، الدىمىزعا كەلگەن ناۋقاستاردىڭ دا تاعدىرىنا جاۋاپتىمىز. ءبىراق جۇمىسىمىزدى جاقسى كورگەن سوڭ، قيىندىعىنا قاراماي، قانشاما ادامدارعا كومەكتەسىپ جاتىرمىز. قانشاما ادامداردىڭ ءومىرىن اراشالاپ قالدىق. كۇنى-ءتۇنى ناۋقاستاردىڭ ءومىرىن ساقتاپ قالۋ ءۇشىن ارپالىسامىز. بىزدە وزگەلەردىكىندەي 5 كۇن جۇمىس، مەرەكە كۇندەرى دەمالۋ دەگەن جوق. 24/7 جۇمىس ىستەيمىز عوي. مەرەكە كۇندەرى ءتىپتى كۇشەيتىلگەن قوسىمشا بريگادالار ىسكە كىرىسەدى. ال ناۋقاستار جوسپارسىز، شۇعىل تۇردە تۇسەدى. نەشە ءتۇرلى جول اپاتىنان ادامدار كەلۋى مۇمكىن. توبەدەن قۇلايدى، بالالار جاراقات الىپ جاتادى. ءبىز قارامايمىز، الدىمىزعا كىم كەلسە، سوعان جاردەمدەسەمىز. مەدبيكە ءۇشىن پسيحولوگيانىڭ مىعىم بولۋى وتە ماڭىزدى. ول سابىرلى، ءتوزىمدى بولۋى كەرەك جانە ەموتسياعا بەرىلمەۋى كەرەك. ناۋقاس سەنىڭ الدىڭا كومەك سۇراپ كەلىپ تۇر عوي. سەن ونىمەن بىرگە جىلاپ، ونىمەن بىرگە ساسقالاقتاپ، ەموتسياعا بەرىلىپ تۇرساڭ، ۋاقىت ءوتىپ كەتەدى. كومەكتەسىپ ۇلگەرمەي قالۋىڭ مۇمكىن. مەدبيكەلەردى ءومىر قاتال بولۋعا سولاي تاربيەلەيدى، - دەيدى ساۋلە ىسقاقوۆا.

ايتا كەتەيىك، مەدبيكەلەرگە كەيبىر رەتسەپتتەردى جازۋعا رۇقسات بەرىلۋى مۇمكىن.

اۆتور

ارۋجان ماحمۋت