مىسىردى بيلەگەن تۇركى-ماملۇك سۇلتاندار كىمدەر؟

استانا. قازاقپارات -تاريحي دەرەكتەرگە قاراساق، تۇركىلەردىڭ قىپشاق اۋلەتىنەن شىققان ماملۇكتەر مىسىردى 1250-1390-جىلدار ارالىعىندا باسقارىپ تۇرىپتى.

ال ءبىز ءجيىء سوز ەتەتىن بەيبارىس سۇلتان 1260-1277 - جىلداردا عانا بيلىك قۇرعان. سوندا بەيبارىسقا دەيىن، بەيبارىستان كەيىن بۇل ەلدىڭ بيلىگىندە وتىرعان تۇركىلەر بولعان با؟ مىسىردى ماملۇكتەردىڭ ەكى اۋلەتى بيلەگەن:

باحرلار (تۇركىلەر) - 1250-1390 جىلدار، بۋردجالار (كاۆكازدىقتار) - 1390-1517 - جىلدار ارالىعىنا ساي كەلەدى. دەسە دە، تۇركىدەن شىققان سۇلتاندار 1516 - جىلعا دەيىن مىسىر مەملەكەتىنىڭ سۇلتاندىعىنا سايلانىپ وتىرعان. تۇركىلەردەن شىققان ەلگە بەلگىلى سۇلتاندار مىنالار: ايبەك (1250-1257)، بەيبارىس (1260-1277)، كالاۋن (1279-1290) بارسبەي (1422-1438)، گۋري (1501-1516). ايبەك پەن بەيبارىستىڭ سۇلتاندىعى ارالىعىندا (1257-1260) بايعۇش پەن قۇتۇز بيلىك ەتكەن.

1516 -1517 - جىلدارى تۇرىك سۇلتانى سەليم І سيريا، ەگيپەت پەن پالەستينانى جاۋلاپ الىپ، ماملۇكتەردىڭ ۇستەمدىگىن جويدى. تۇرىكتەردىڭ جاۋلاپ الۋىنان سوڭ مىسىرداعى جەردىڭ ءبىر بولىگى ماملۇكتەردىڭ بيلىگىندە قالدى. ماملۇكتەر كايردەگى تۇرىك پاشاسىنا الىم تولەپ تۇرۋعا مىندەتتەندى. XVII عاسىردىڭ سوڭىندا وسمان يمپەرياسىنىڭ السىرەۋى ماملۇكتەردىڭ ءوز بيلىگىن قالپىنا كەلتىرۋىنە مۇمكىندىك بەردى (1711-1798).