مىسىردا شامامەن ەكى مىڭ جىل بۇرىنعى 23 مۋميا تابىلدى

يسپاندىق ارحەولوگتار ەل-باحناسا قالاسىندا العاش رەت التىن جانە ءتۇرلى ءتۇستى جەرلەۋ ماسكالارى بار مۋميا تۇرىندەگى شامامەن 2 مىڭ جىل بۇرىنعى قورىمداردى تاپتى. ولاردىڭ ەكەۋىنىڭ اۋزىندا التىن تىلدەرى بار. Kazinform بۇل تۋرالى ت ا س س اقپارات اگەنتتىگىنە سىلتەمە جاساپ حابارلايدى.

Sada al-Balad پورتالىنىڭ حابارلاۋىنشا، پتولەمەي اۋلەتىنىڭ (ب. ز. د. 305 - ب. ز. د. 30 ج. ) جانە مىسىرعا ريم بيلىك ەتكەن كەزىندە (ب. ز. د. 30 ج. ) جەرلەنگەن بارلىعى 23 مۋميا تابىلدى.

قورىمدار ەل- باحناسا جوعارعى زيراتىنىڭ شىعىس بولىگىنەن تابىلعان. توپىراقتا قازىلىپ، تاسپەن قاپتالعان قۇدىق تۇبىندە ولىلەردى جەرلەۋگە ارنالعان بولمەلەر بار: وسى بولمەلەردىڭ بىرىندە بوس بولعان ساركوفاگتار، ال ەكىنشىسىندە مۋميالاردىڭ وزدەرى بولعان. مۋميالاردىڭ ساركوفاگتارعا نەلىكتەن جەرلەنبەگەنى تۋرالى اقپارات بەرىلگەن جوق.

23 مۋميانىڭ ەكەۋىنىڭ اۋزىندا ءتىل ءتارىزدى التىن تىلىمشە بار. ارحەولوگتاردىڭ ايتۋىنشا، ولگەندەردى جەرلەۋدىڭ بۇل ءداستۇرى ريم بيلىگى كەزىندە كەڭىنەن قولدانىلعان.

جەرلەنگەندەردىڭ جەكە باسى ءالى انىقتالعان جوق. الايدا ولاردىڭ جەرلەنگەن جەرىنەن ءبىر كەزدەرى جەرلەۋ ورنىندا تۇرعان عيمارات قابىرعالارىنىڭ قالدىقتارى تابىلدى. عالىمدار ءۇيىندى سىنىقتارىنان جانۋارلار، قۇستار، سونداي- اق جەمىس-جيدەك بەينەلەرى بار سۋرەتتەر تاپتى.

سونىمەن قاتار عالىمدار قازبا ورنىندا باسىنا گۇلدەستە مەن ءتاجى بار يسيدا- افروديتا ايەل- قۇدايدىڭ كۇيدىرىلگەن ساز ءمۇسىنىن تاپتى. مۇنداي مۇسىندەر ەل- باحناسادان ءبىرىنشى رەت تابىلىپ وتىر. ارحەولوگتار باسقا ولجالاردى ىزدەۋ ءۇشىن قازبا جۇمىستارىن جالعاستىرىپ جاتىر، دەپ اتاپ ءوتتى Sada al-Balad پورتالىنان.

قازىرگى ەل- باحناسا ەجەلگى داۋىردە وكسيرينح (پەمدجە) قالاسى بولعان جەرگە جاقىن ورنالاسقان. ول پتولەمەي داۋىرىندە مىسىر ەلليندىك مەملەكەتتىڭ ءۇشىنشى ءىرى قالاسى بولدى.

اۆتور

زارينا تۋعانبايەۆا