مينيسترلىك ءبىرىنشى سىنىپقا باراتىن بالالار ءۇشىن قۋانىشتى جاڭالىقتى جەتكىزدى
استانا. قازاقپارات - قازاقستاندا ءبىرىنشى سىنىپقا باراتىن بالالار ءۇشىن مەكتەپالدى دايارلىق باعدارلاماسى ازىرلەندى، - دەپ حابارلايدى وقۋ-اعارتۋ مينيسترلىگىنىڭ باسپا ءسوز قىزمەتى.
«بالاقايلار مەكتەبى» ءبىرىنشى سىنىپ الدىندا بالالاردىڭ باستاپقى مۇمكىندىكتەرىن تەڭەستىرۋ ءۇشىن ۇيىمداستىرىلعان.
ول مەكتەپكە دەيىنگى ءبىلىم بەرۋ مەن باستاۋىش مەكتەپ اراسىنداعى ساباقتاستىقتى قامتاماسىز ەتەدى، بالالاردى مەكتەپكە دەيىنگى تاربيە مەن وقىتۋدىڭ ۇلگىلىك وقۋ باعدارلاماسىنىڭ بارلىق باعىتتارى بويىنشا مەكتەپكە الدىن الا دايىنداۋعا مۇمكىندىك بەرەدى. باعدارلاماعا مەملەكەتتىك جالپىعا مىندەتتى مەكتەپكە دەيىنگى تاربيە مەن ءبىلىم بەرۋ ستاندارتىنا سايكەس ازىرلەندى.
«باعدارلامانى تابىستى ىسكە اسىرۋ ماقساتىندا مەكتەپتەردە بالالاردىڭ جاس ەرەكشەلىكتەرىن ەسكەرە وتىرىپ، ولاردى وقىتۋ ءۇشىن قولايلى جاعدايلار جاسالۋدا. باعدارلاما بويىنشا وقىتۋ 1 ايعا ارنالعان. ساباقتار كۇن سايىن 30 مينۋتتان 10 مينۋتتىق ۇزىلىستەرمەن وتكىزىلەدى. بالالارعا بىلىكتى باستاۋىش سىنىپ مۇعالىمدەرى نەمەسە مەكتەپالدى سىنىپ مۇعالىمدەرى ساباق بەرەدى»،
- دەيدى مەكتەپكە دەيىنگى ءبىلىم بەرۋ دەپارتامەنتىنىڭ ديرەكتورى مانار اداموۆا.
ايتا كەتەيىك، قىسقا مەرزىمدى دايىندىق پروتسەسى بالالاردىڭ مەكتەپكە بەيىمدەلۋىن جەڭىلدەتەدى، سونداي-اق پەداگوگتەردىڭ بولاشاق وقۋشىلارىمەن جاقىنىراق تانىسۋىنا كومەكتەسەدى.
