مينيستر نەگە ءا. نازاربايەۆانىڭ كومپانياسى تۋرالى جالعان اقپارات بەرگەن

استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ ءاليا نازاربايەۆانىڭ قوقىس وڭدەۋ بيزنەسىندەگى ۇلەسى تۋرالى پىكىر ءبىلدىردى.

«بۇعان دەيىن قوقىس وڭدەۋ بيزنەسىنە ءاليا نازاربايەۆانىڭ كومپانياسى ءالى قاتىسىپ وتىر ما دەپ سۇراعاندا ەشقانداي قاتىسى جوق ەكەنىن ايتقان ەدىڭىز. كەيىن استانا اكىمى جەڭىس قاسىمبەكتەن سۇراعاندا ءاليا نازاربايەۆا تيەسىلى «Clean City» كومپانياسى استاناعا ءالى قىزمەت كورسەتىپ جۇرگەنىن ايتتى. كونكۋرس پروتسەدۋرالارى وتكەننەن كەيىن عانا قىزمەت كورسەتۋشى اۋىساتىنىن جەتكىزدى. نەگە ءسىزدىڭ تاراپتان جالعان اقپارات تارادى؟» - دەپ سۇرادى ب ا ق وكىلى ۇكىمەت وتىرىسىنان كەيىن.

ەرلان نىسانبايەۆ ول جولى قول استىنداعىلار بەرگەن مالىمەت بويىنشا اقپارات تاراتقانىن ايتتى.

«بىردەن ايتقىم كەلەدى، بۇل ماسەلە ءبىزدىڭ ۆەدومستۆونىڭ قۇزىرەتىنە جاتپايدى. بۇل جەرگىلىكتى ورگانداردىڭ قۇزىرەتىندە. وتكەن جولى مەن بەرگەن اقپارات تۋرالى ايتسام، مەندە ودان باسقا مالىمەت جوق. ياعني، ماعان قازىرگى تاڭدا ءسىز ايتىپ وتىرعان كومپانياعا ءاليا نازاربايەۆانىڭ قاتىسى جوق ەكەنى تۋرالى اقپارات بەرىلدى. ودان باسقا ەشتەڭە ايتا المايمىن»، - دەدى مينيستر.

جۋرناليست ونداي اقپاراتتى كىم بەرگەنىن سۇراي كەلىپ، «سوندا سىزگە جالعان اقپارات بەرىلگەن بە؟» - دەگەن ساۋال تاستادى.

«ءيا. ونى انىقتاۋ كەرەك»، - دەدى ەرلان نىسانبايەۆ.