مينيستر ءجىتىقاراداعى قايعىلى وقيعا بويىنشا جاڭا دەرەكتەردى جاريالادى

استانا. KAZINFORM - ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ءجىتىقارادا بەس بالاسى قازا تاپقان وتباسىنىڭ جاعدايىنا قاتىستى سۇراقتارعا جاۋاپ بەردى.

قايعىلى وقيعا بولعان كۇنى تاڭعى ساعات 5 كە قاراي ۇلكەن بالاسى كورشىلەرىنە جۇگىرىپ بارعان. ءورت سوندىرۋشىلەر كەلگەن كەزدە، ءۇيدىڭ شاتىرى وپىرىلىپ تۇسكەن. سول كۇنى الماتىدا ءىس-ساپاردا بولعان ەدىم. ءبىراق قايعىلى وقيعا بولعان ۇيگە ءبىزدىڭ ۆەدومستۆودان دەپارتامەنت ديرەكتورى بىردەن باردى. سوندىقتان ول وڭىردە بولىپ، ماسەلەمەن ەگجەي-تەگجەيلى تانىسىپ، ءتيىستى قولداۋ ءىس-شارالارى ۇيىمداستىرىلدى. بۇل وتباسىعا اتاۋلى الەۋمەتتىك كومەك بەرىلىپ كەلگەن»، - دەدى س. جاقىپوۆا ماجىلىستەگى ۇكىمەت ساعاتىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ سوزىنە قاراعاندا، بالالاردىڭ اناسى ەكى رەت نەكەدە بولعان. ءبىرىنشى كۇيەۋىنەن - ءۇش بالا، سونداي-اق ەكىنشى نەكەدەن دە ءۇش بالا.

«ەڭ كىشكەنتاي بالاسى مامىر ايىندا ءبىر جاسقا تولىپ، سول ۋاقىتتا «كۇمىس القا» الدى. رەسمي تۇردە اجىراسقان ءبىرىنشى كۇيەۋىنەن جازدا اليمەنت رەتىندە 330 مىڭ تەڭگە شاماسىندا اقشا العان»، - دەدى مينيستر.

سونىمەن قاتار ول بالالاردىڭ اناسى جەرگىلىكتى دۇكەندە تازارتۋشى بولىپ جۇمىس ىستەگەنىن ايتتى.

«ءبىراق قايعىلى وقيعا بولعان ءتۇنى قالاعا كەتىپ قالعان. نە ماقساتتا جانە قانداي سەبەپپەن كەتكەنى تەرگەۋ امالدارى بارىسىندا جاريالانباي جاتىر. ونىڭ سەبەبىن بىلمەيمىن. اتاپ ايتقاندا، ۇيگە 1995-جىلعى ازامات كەلىپ، كەشكى ساعات 9 كەزىندە ءۇيدىڭ پەشىن جاعىپ، كەتىپ قالعان. وعان پەشتى بالالاردىڭ اناسى تاپسىرعان سياقتى»، - دەدى سۆەتلانا جاقىپوۆا.

بيىل 11-قازان كۇنى قوستاناي وبلىسىندا ءورت شىعىپ، بەس بالا قازا تاپتى.

قوستاناي وبلىسىنىڭ اكىمى قۇمار اقساقالوۆ ءجىتىقاراداعى قايعىلى وقيعانىڭ ءمان-جايىنا تۇسىنىك بەردى.