مينيستر اكىمشىلىك قۇقىق بۇزۋشىلىق تۋرالى كودەكسكە ەنگىزىلگەن باستى وزگەرىستى اتادى

استانا. KAZINFORM - مادەنيەت جانە اقپارات ءمينيسترى ايدا بالايەۆا اكىمشىلىك قۇقىق بۇزۋشىلىق تۋرالى كودەكسكە قانداي ماڭىزدى وزگەرىستەر ەنگىزىلگەنىن ايتىپ بەردى.

Аида Балаева
Фото: Виктор Федюнин/ Kazinform

ونىڭ سوزىنشە، ەڭ باستى وزگەرىستەردىڭ ءبىرى - اكىمشىلىك جازا رەتىندە قوعامدىق جۇمىستاردى ەنگىزۋ بولدى.

- مەملەكەت باسشىسى اكىمشىلىك قۇقىق بۇزۋشىلىقتار تۋرالى كودەكسكە ماڭىزدى تۇزەتۋلەرگە قول قويدى. ونىڭ كەيبىرى ەكى ايدان كەيىن كۇشىنە ەنەدى. ەڭ باستى وزگەرىستەردىڭ ءبىرى - اكىمشىلىك جازا رەتىندە قوعامدىق جۇمىستاردى ەنگىزۋ. سوتتىڭ شەشىمىمەن جانە قۇقىق بۇزۋشىنىڭ كەلىسىمىمەن تاعايىندالاتىن قوعامدىق جۇمىستار - وڭالتۋ مەن الەۋمەتتىك جاۋاپكەرشىلىكتى ارتتىرۋدىڭ ءتيىمدى قۇرالى بولماق. وكىنىشكە قاراي، قوعامدا اينالاسىنداعىلارعا قۇرمەتسىزدىك تانىتۋ جاعدايلارى ءجيى كەزدەسەدى. ماسەلەن، قوعامدىق ورىنداردا تۇكىرۋ، قوقىستى ورىنسىز جەرگە تاستاۋ، ءتارتىپ ەرەجەلەرىن ەلەمەۋ جانە تاعى باسقالاردى اتاپ وتۋگە بولادى، - دەپ جازدى مينيستر Facebook تەگى پاراقشاسىندا.

بالايەۆا اتاپ وتكەندەي، وزگە ەلدەردىڭ تاجىريبەسىندە قاتاڭ شارالار مۇنداي ماسەلەلەردى ءتيىمدى شەشە الاتىنىن كورسەتىپ وتىر.

- ماسەلەن، سينگاپۋردا كوشەدە تۇكىرۋ نەمەسە قوقىس تاستاۋ سياقتى ارەكەتتەر ءۇشىن ايىپپۇل نەمەسە تۇزەتۋ جۇمىستارى قاراستىرىلعان، بۇل قالانى الەمدەگى ەڭ تازا ورتالىقتاردىڭ بىرىنە اينالدىردى. لوندوندا دا وسىنداي ارەكەتتەر ءۇشىن ايتارلىقتاي ايىپپۇلدار قاراستىرىلعان. مۇنداي ءتاسىل قوعامدىق ورىنداردا ءتارتىپ ساقتاۋعا كەشەندى باقىلاۋ مەن جاۋاپكەرشىلىكتىڭ ماڭىزدىلىعىن كورسەتەدى. ازاماتتاردىڭ مادەنيەتى - ءبىزدىڭ حالىقارالىق ارەناداعى بەدەلىمىز بەن ينۆەستيتسيا تارتۋداعى جانە ءتۋريزمدى دامىتۋداعى ماڭىزدى فاكتور. جاڭا تۇزەتۋلەردى ءتيىمدى ىسكە اسىرۋ جاعدايدى وزگەرتۋگە جانە ازاماتتاردىڭ ءوز ارەكەتتەرى ءۇشىن جاۋاپكەرشىلىگىن ارتتىرۋعا كومەكتەسەدى. الەۋمەتتىك جاۋاپكەرشىلىك پەن ازاماتتاردىڭ بەلسەندىلىگى ارقىلى عانا ءبىز ءار ادام ورتاق يگىلىككە ۇلەس قوسۋعا دايىن بولاتىن قوعام قۇرا الامىز، - دەپ تۇيىندەدى مادەنيەت ءمينيسترى.

ەسكە سالساق، كەشە اكىمشىلىك قۇقىق بۇزۋشىلىق تۋرالى كودەكسكە وزگەرىس ەنگىزەتىن زاڭ ماقۇلداندى.

سوڭعى جاڭالىقتار