«ەموتسياعا بەرىلىپ، داۋىس كوتەرۋدىڭ قاجەتى جوق»: سۋديا پەريزات قايراتقا ەسكەرتۋ جاسادى

استانا. KAZINFORM - ەلوردادا ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى سوت وتىرىسىنىڭ العاشقى كۇنى قورىتىندىلاندى.

- ايىپتالۋشى پەريزات قايرات قايتالاپ ايتامىن، ءسىز قازىر كۋاگەرگە ءوز پىكىرىڭىزدى تاڭىپ وتىرسىز. كۋاگەرگە قىسىم كورسەتپەۋىڭىزدى سۇرايمىن. ەگەر سۇراقتارىڭىز قايتالانا بەرسە، سوت ولاردى الىپ تاستايدى، - دەگەن ەسكەرتۋ جاسادى استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ سۋدياسى سابىرجان كارىموۆ باستى ايىپتالۋشىعا.

پەريزات قايرات ءوز كەزەگىندە كۋاگەر بەتكە قاراپ تۇرىپ جالعان جاۋاپ بەرىپ جاتقانىن ايتىپ، جىلاپ جىبەردى.

- ايىپتالۋشى، مەن سىزگە تۇسكە دەيىن ەكى رەت ءتۇسىندىردىم عوي. سۇراق قويدىڭىز با؟ جاۋابىن تىڭداڭىز، سودان كەيىن كەلەسى سۇراقتى قويىڭىز. ءسىزدىڭ وزىڭىزگە ىڭعايلى جاۋاپ العىڭىز كەلىپ تۇرعانى بايقالىپ تۇر. سوت وتىرىسىنىڭ بەلگىلەنگەن ءتارتىبى بار. كۋاگەردىڭ شىن نەمەسە جالعان جاۋاپ بەرىپ وتىرعانىن سوت انىقتايدى. ەموتسياعا بەرىلىپ، داۋىس كوتەرۋدىڭ قاجەتى جوق، - دەپ ءتۇسىندىردى سۋديا.

سوت وتىرىسى 15-شىلدە ساعات 10:00 دە جالعاسادى.

بۇعان دەيىن مەملەكەتتىك ايىپتاۋشى پەريزات قايرات پەن ونىڭ اناسىنا تاعىلعان ايىپتاردى تىزبەكتەپ شىقتى.

سۋديا سۇراعىنا جاۋاپ بەرگەن پەريزات قايرات ايىپتار نەگىزسىز تاعىلدى دەپ، مويىندامايتىنىن جەتكىزدى.

بۇرىنعى «Nur Otan» (قازىرگى Amanat) پارتياسى ءتوراعاسىنىڭ ءبىرىنشى ورىنباسارى بولعان، الماتى قالاسىنىڭ ەكس-اكىمى باۋىرجان بايبەكتىڭ ەسىمىن اتاپ ءوتتى.

مەملەكەتتىك ايىپتالۋشى پەريزات قايرات پەن اناسى عايني الاشبايەۆا 3,5 ميلليارد تەڭگەنىڭ قايدا جۇمسالعانىن ءتىزىپ بەردى.

ايتا كەتسەك، بۇعان دەيىن دە پەريزات قايرات وزىنە تاعىلعان ايىپتارمەن كەلىسپەدى.

سونداي-اق پەريزات قايرات تەرگەۋ يزولياتورى قىزمەتكەرلەرىنەن ءجابىر كورگەنىن ايتقان ەدى. ارتىنشا ەلوردا پوليتسياسى تەرگەۋ يزولياتورىندا بولعان جايتتىڭ ۆيدەوسىن كورسەتتى.

بەلگىلى بولعانداي، پەريزات قايراتتىڭ سوتى ءىشىنارا جابىق وتەدى.

بۇعان دەيىن ەلوردادا پەريزات قايراتتىڭ ىسىنە قاتىستى الدىن الا سوت وتىرىسى ءوتتى.

بيىل 30-ماۋسىمدا پەريزات قايراتتىڭ ءىسى سوتقا جىبەرىلدى.

ەسكە سالايىق، ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قور قۇرىلتايشىسى پەريزات قايراتقا قاتىستى تەرگەۋ جۇرگىزىلىپ جاتقانى 2024-جىلى 14-قاراشادا بەلگىلى بولدى.