مەملەكەتتىك ورگاندار حالىققا رەسمي اقپاراتتى جەدەل جەتكىزۋگە مىندەتتى - زاڭ جوباسى

  استانا. KAZINFORM -بۇگىن پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپاراتقا قول جەتكىزۋ جانە قوعامدىق قاتىسۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى ءوتتى.

زاڭ جوباسىنىڭ ماقساتى - حالىقتىڭ حاباردار بولۋىن، مەملەكەتتىك سەكتوردىڭ اشىقتىق دەڭگەيىن، بەلسەندىلىگى مەن ەسەپ بەرۋىن ارتتىرۋ.

«زاڭ جوباسىن ىسكە اسىرۋ بيۋدجەتتەن قوسىمشا قارجى شىعىندارىن تالاپ ەتپەيدى. قۇجات حالىقارالىق ساراپتاما ۇيىمدارىنىڭ، قازاقستاندىق ۇكىمەتتىك ەمەس ۇيىمداردىڭ، سونداي-اق ادام قۇقىقتارى جونىندەگى ۇلتتىق ورتالىقتىڭ قاتىسۋىمەن ازىرلەندى. بۇل تۇرعىدا ءتيىستى ماسەلەلەردى شەشۋ ماقساتىندا ۇسىنىستار ەنگىزىلدى. حالىقارالىق اشىقتىق ستاندارتىن قولدانۋ ماقساتىندا اقپاراتقا قول جەتكىزۋ تۋرالى زاڭ اياسىندا، ياعني جەكەلەگەن جاعدايلاردى قوسپاعاندا (مەملەكەتتىك قۇپيالار)، مەملەكەتتىك ورگانداردىڭ بارلىق اقپاراتىن اشىق دەپ ايقىنداۋ ۇسىنىلدى. بۇل رەتتە، مەملەكەتتىك ورگاندار اقپاراتقا قول جەتكىزۋدى تەك بەلگىلى ءبىر مەرزىمگە جانە قۇجاتتىڭ ءبىر بولىگىنە عانا شەكتەۋ قويۋعا قۇقىلى بولادى»،- دەدى مادەنيەت جانە اقپارات ۆيتسە-ءمينيسترى دانيار قادىروۆ.

ونىڭ ايتۋىنشا، زاڭ جوباسىنا سايكەس مەملەكەتتىك ورگاندار حالىققا رەسمي اقپاراتتى ءوز باستاماسىمەن جەدەل جەتكىزۋگە مىندەتتى. وسى ماقساتتا مەملەكەتتىك ورگانداردىڭ اقپاراتتى بەلسەندى تۇردە تاراتۋعا قاتىستى جاڭا مىندەتى، سونداي- اق ونىڭ ۇعىمى مەن ىسكە اسىرۋ تەتىگى ەنگىزىلەدى. بۇل، ءبىرىنشى كەزەكتە، ءبىلىم بەرۋ، ەكولوگيا جانە دەنساۋلىق ساقتاۋ سالالارىنا قاتىستى.

سونىمەن قاتار ۆيتسە- مينيستر مۇگەدەكتىگى بار ادامدار ءۇشىن اقپاراتتى ەمىن- ەركىن الۋى ماسەلەلەرىن اقپاراتقا قول جەتكىزۋ تۋرالى زاڭدا جەكە باپ جانە قاعيدات تۇرىندە بەكىتۋ ۇسىنىلعانىن ايتتى.

بۇدان بولەك، دەپۋتاتتىق بەلسەندىلىكتىڭ جانە پارلامەنت دەپۋتاتتارى باستاماسىمەن ازىرلەنەتىن زاڭ جوبالارىنىڭ سانىنىڭ ءوسۋى بايقالىپ وتىر. وسىعان وراي دەپۋتاتتىق زاڭ جوبالارى بويىنشا «اشىق ن ق ا» پورتالىندا جاريا تالقىلاۋ جۇرگىزۋ ۇسىنىلدى.

«قازىر مادەنيەت جانە اقپارات مينيسترلىگىنىڭ اقپاراتقا قول جەتكىزۋ سالاسىندا باقىلاۋ وكىلەتتىكتەرى بولماعاندىقتان، ازاماتتار مەن ب ا ق-تان كەلىپ تۇسەتىن شاعىمدار بويىنشا دەن قويۋ شارالارىن قابىلداۋ مۇمكىندىگى جوق. ازاماتتار بىردەن سوتقا شاعىمدانۋعا ءماجبۇر. سوندىقتان مادەنيەت جانە اقپارات مينيسترلىگىنە ءتيىستى قۇزىرەت بەرە وتىرىپ، اقپاراتقا قول جەتكىزۋ سالاسىنداعى جاۋاپكەرشىلىكتى كۇشەيتۋ مەن مەملەكەتتىك باقىلاۋدى ەنگىزۋ ۇسىنىلدى»، - دەدى د. قادىروۆ.