مەملەكەتتىك قىزمەتشىلەردىڭ سيفرلىق رەيتينگى ەنگىزىلدى
استانا. KAZINFORM — بۇل تۋرالى ق ر مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقباي ءمالىم ەتتى.

- قازىرگى زامانعى باسىم باعىتتاردىڭ بىرىنە توقتالساق، جاساندى ينتەللەكت قوعام ءومىرىنىڭ بارلىق سالاسىنا قارقىنمەن ەنە باستادى. جاساندى ينتەللەكتىنىڭ الەۋەتىن ادام رەسۋرستارىن باسقارۋدا، مەملەكەتتىك قىزمەتكە ىرىكتەۋ مەن وتكەرۋدە ءتيىمدى پايدالانا ءبىلۋ قاجەتتىگى تۋىنداپ وتىر. وسى ورايدا «eQyzmet» جۇيەسىندە كادرلىق پروتسەستەرىن سيفرلاندىرۋ جۇمىستارى اتقارىلىپ جاتىر. پرەزيدەنت اكىمشىلىگىنىڭ باستاماسىمەن مەملەكەتتىك قىزمەت جۇيەسىندەگى باسقارۋشى لاۋازىمداردى ىرىكتەۋگە، مۇددەلەر قاقتىعىسىنا جول بەرمەۋگە، مىندەتتەردى بولۋگە جانە باسقا دا كادر پروتسەستەرىنە قاتىستى اقپاراتتىق جۇيەگە ءبىرقاتار وزگەرىس ەنگىزىلدى. جەكەلەگەن باسشىلىق لاۋازىمعا ەڭ لايىق كانديداتتاردى انىقتاۋ ماقساتىندا «eQyzmet» جۇيەسىندە سيفرلىق رەيتينگ مودۋلى ىسكە قوسىلدى، - دەدى د. جازىقباي مەملەكەتتىك قىزمەت ىستەرى اگەنتتىگىنىڭ كەڭەيتىلگەن القا وتىرىسىندا.
بۇل مودۋل ەلەكتروندى جەكە ىستەردىڭ دەرەكتەرى نەگىزىندە ساياسي جانە «ا» كورپۋسى لاۋازىمدارىنا جوعارى بىلىكتىلىگى مەن تاجىريبەسى بار الەۋەتتى ۇمىتكەرلەردىڭ تىزبەسىن جاساۋعا مۇمكىندىك بەرەدى. وسىلايشا، تاجىريبەسى مەن بىلىكتىلىگى، سونداي-اق الەۋەتى جوعارى مامانداردىڭ تىزبەسى رەيتينگ تۇرىندە قالىپتاسادى.
- قازىرگى تاڭدا ورتالىق مەملەكەتتىك ورگاندارعا قاراستى ۇيىم باسشىلارىنىڭ جەكە ىستەرىن «eQyzmet» جۇيەسىندە قالىپتاستىرۋ بويىنشا جۇمىستار جالعاسىپ جاتىر. بۇل باسقارۋشىلىق لاۋازىمدارعا مەملەكەتتىك قىزمەتشىلەرمەن قاتار، وزگە دە كۆازيمەملەكەتتىك جانە جەكە سەكتوردىڭ كاسىبي ماماندارىن تارتۋعا مۇمىندىك بەرەدى. قولدانىستاعى زاڭنامامەن بەكىتىلگەن شەكتەۋلەردىڭ ساقتالۋىن قامتاماسىز ەتۋ ءۇشىن اگەنتتىك اتالعان مودۋلدىڭ نەگىزىندە قاجەت اناليتيكالىق جانە اقپاراتتىق دەرەكتەردى جيناقتايدى، - دەدى اگەنتتىك باسشىسى.
د. جازىقباي مەملەكەت باسشىسىنىڭ مەملەكەتتىك بيۋجەتتەن قارجىلاندىرىلاتىن مەكەمەلەردىڭ كادر قىزمەتىن اۆتوماتتاندىرۋدى قامتاماسىز ەتۋ بويىنشا تاپسىرماسىن ورىنداۋ اياسىندا ءبىرىڭعاي كادر جۇيەسىنە 8 مەملەكەتتىك ورگاننىڭ 19 ۆەدومستۆولىق ۇيىمى ەنگىزىلگەنىن اتاپ ءوتتى. وسى جىلدىڭ 1-قاڭتارىنان باستاپ اتالعان جۇيەگە 37 مەملەكەتتىك ورگاننىڭ 2400 گە جۋىق ۆەدومستۆوعا قاراستى ۇيىمدارىن قوسۋ بويىنشا جۇمىس اتقارىلىپ كەلەدى، وندا 500 مىڭنان استام ادام جۇمىس ىستەيدى.
بۇعان دەيىن بيىل مەملەكەتتىك قىزمەت سالاسىنداعى زاڭناما قايتا قارالاتىنىن جازعان ەدىك.