مەملەكەتتىك قىزمەت تۋرالى جاڭا زاڭ جوباسى دايىندالادى

استانا. KAZINFORM - «مەملەكەتتىك قىزمەت تۋرالى» جاڭا زاڭ جوباسى دايىندالادى. بۇل تۋرالى مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقباي ايتتى.

«اگەنتتىك الداعى ۋاقىتتا دا مەملەكەتتىك قىزمەت سالاسىنداعى زاڭنامانى ارى قاراي جەتىلدىرە بەرەدى. وسى ورايدا مەملەكەتتىك قىزمەتتى جۇيەلى دامىتۋ ماقساتىندا پرەزيدەنتىڭ جارلىعىمەن 2024-2026 -جىلدارى ارنالعان جاڭا تۇجىرىمداما بەكىتىلدى. بۇل مەملەكەتتىك قىزمەتتىڭ تيىمدىلىگىن ارتتىرۋعا، ونىڭ اشىقتىعىن قامتاماسىز ەتۋگە جانە ادامعا باعدارلانعان مەملەكەتتىك اپپاراتتىڭ سەرۆيستىك مودەلىن قالىپتاستىرۋعا ىقپال ەتەدى دەپ كۇتىلۋدە. اتالعان قۇجات اياسىندا «مەملەكەتتىك قىزمەت تۋرالى» جاڭا زاڭ جوباسى دايىندالاتىن بولادى. ونىڭ نەگىزگى ماقساتتارىنىڭ ءبىرى - مەملەكەتتىك قىزمەتتەگى ەڭبەك قاتىناستارىن رەتتەۋمەن شەكتەلمەي، قوعام مەن مەملەكەتتىك قىزمەتشى اراسىنداعى ءوزارا بايلانىستى زاڭ دەڭگەيىندە رەتتەۋ»، - دەدى ول اگەنتتىكتە وتكەن «قازاقستانداعى مەملەكەتتىك قىزمەت جەتىستىكتەرى مەن پەرسپەكتيۆالارى» تاقىرىنداعى دوگەلەك ۇستەل وتىرىسىندا.

ونىڭ اتاپ وتۋىنشە، جاڭا زاڭناما ىرىكتەۋ جۇيەسىن جەتىلدىرۋگە، ەرتە كاسىپتىك باعدارلاۋ جانە مانساپتىق ءوسۋدى گيبريدتىك مودەلدەرىنە ساي جاڭا تەتىكتەرىن ەنگىزۋ ارقىلى مەملەكەتتىك اپپاراتتى كاسىبيلەندىرۋگە باعىتتالادى.

«سونداي-اق قىزمەتشىلەر روتاتسياسىن كەڭەيتۋ، الەۋمەتتىك كەپىلدىكتەرىن جاقسارتۋ، تارتىپتىك جاۋاپكەرشىلىككە تارتۋ ەرەجەلەرىن دە قايتا قاراۋ جانە جاساندى ينتەللەكت ەلەمەنتتەرىن قولدانا وتىرىپ، مەملەكەتتىك قىزمەت پروتسەستەرىن تولىق تسيفرلاندىرۋ جوسپارلانعان»، - دەدى دارحان جازىقباي.

اۆتور
مارلان جيەمباي