مەملەكەتتىك كەڭەسشى ىشكى ساياسات ماسەلەلەرى جونىندە رەسپۋبليكالىق كەڭەس وتكىزدى
استانا. KAZINFORM - اقوردادا مەملەكەتتىك كەڭەسشى ەرلان قاريننىڭ توراعالىعىمەن بيىلعى جولداۋدىڭ قورىتىندىسىنا ارنالعان ءداستۇرلى كەڭەس ءوتتى. بۇل تۋرالى اقوردا ءمالىم ەتتى.
وعان ۇكىمەت مۇشەلەرى، پرەزيدەنت اكىمشىلىگى قۇرىلىمدىق بولىمشەلەرىنىڭ جەتەكشىلەرى، وبلىستار مەن رەسپۋبليكالىق ماڭىزى بار قالالار اكىمدەرىنىڭ ورىنباسارلارى، وڭىرلىك باسقارمالاردىڭ باسشىلارى قاتىستى.
جيىندا مەملەكەت باسشىسىنىڭ باستامالارىن ىسكە اسىرۋ، ەتنوسارالىق، كونفەسسياارالىق كەلىسىمدى نىعايتۋ، قوعامدىق بىرلەستىكتەرمەن، ساراپشىلارمەن ءوزارا ءىس-قيمىل، اقپارات، وتباسى جانە جاستار ساياساتى ماسەلەلەرى قارالدى.
مەملەكەتتىك كەڭەسشى بيىلعى جولداۋدىڭ نەگىزگى يدەياسىن ايقىنداپ كورسەتتى: «پرەزيدەنت جاڭا ۇلتتىق ستراتەگيانى ۇسىندى. ول - اۋقىمدى سيفرلىق ترانسفورماتسيا جانە جاساندى ينتەللەكتىنى ەنگىزۋ. وسى ارقىلى قازاقستان بولاشاقتا تەحنولوگيالىق تۇرعىدا دامىعان ەل رەتىندە تانىلۋدى كوزدەپ وتىر».
سونداي-اق ەرلان قارين ىشكى ساياسي جۇمىستىڭ نەگىزگى باسىمدىقتارىنا توقتالدى: «جاڭا ساپالى ۇلتتى دامىتۋدىڭ ماڭىزدى شارتىنىڭ ءبىرى - جاڭا قوعامدىق ەتيكانى قالىپتاستىرۋ. وعان جاۋاپكەرشىلىك مادەنيەتىن ىلگەرىلەتۋ، جاسامپازدىققا نەگىزدەلگەن قۇندىلىقتاردى ورنىقتىرۋ، «زاڭ جانە ءتارتىپ» قاعيداتىن بەكىتۋ جاتادى».
بۇدان بولەك، مەملەكەتتىك كەڭەسشى: «ءتۇرلى الەۋمەتتىك ساۋالدامالار قوعامنىڭ پرەزيدەنتتىك رەفورمالاردى جوعارى دەڭگەيدە قولدايتىنىن تۇراقتى تۇردە كورسەتىپ كەلەدى. الايدا سالالىق مەملەكەتتىك ورگاندار ءاردايىم اقپاراتتىق الاڭعا مونيتورينگ جاساپ، ازاماتتاردىڭ وزەكتى سۇرانىمدارىنا تالداۋ جۇرگىزىپ وتىرۋعا ءتيىس. بۇل رەتتە وبەكتيۆتى سۇرانىمداردى ءتۇرلى الىپقاشپا اڭگىمەلەر مەن مانيپۋلياتسيالاردان اجىراتا ءبىلۋ ماڭىزدى. ءبىرىنشى جاعدايدا ديالوگ ارقىلى بىرلەسكەن ءتيىمدى شەشىمدەردى ىزدەستىرۋ كەرەك، ال ەكىنشى جاعدايدا زاڭ اياسىندا فەيكتەر مەن جالعان اقپاراتتىڭ جولىن كەسۋ ماڭىزدى»، - دەدى.
كەڭەس قورىتىندىسى بويىنشا جاۋاپتى مەملەكەتتىك ورگاندارعا ناقتى تاپسىرمالار بەرىلىپ، ىشكى ساياسات سالاسىندا جاڭا تاسىلدەردى جەدەل ەنگىزۋدىڭ ماڭىزدىلىعى اتاپ ءوتىلدى.
ەسكە سالا كەتەيىك، بۇعان دەيىن مەملەكەتتىك كەڭەسشى پارلامەنت ماجىلىسىندەگى فراكسيا جەتەكشىلەرىمەن كەزدەسكەن بولاتىن.
