مەملەكەت باسشىسىنىڭ سۋ تاسقىنى سالدارىنان قالىپتاسقان اۋىر جاعدايعا بايلانىستى ۇندەۋى

استانا. KAZINFORM - مەملەكەت باسشىسى قاسىم-جومارت توقايەۆ ەلىمىزدىڭ ءبىرقاتار وبلىسىنداعى سۋ تاسقىنى سالدارىنان قالىپتاسقان كۇردەلى جاعدايعا بايلانىستى قازاقستان حالقىنا ۇندەۋ جاريالادى.

قۇرمەتتى وتانداستار!

بۇگىن مەن ەلىمىزدىڭ ازاماتتارىنا ارنايى ۇندەۋىمدى جولداپ وتىرمىن. بارشاڭىزعا بەلگىلى، ءقازىر ەلىمىزدە كۇردەلى جاعداي قالىپتاسىپ وتىر. قاردىڭ كۇرت ەرۋىنە بايلانىستى ايماقتاردا سۋ تاسقىنى بولىپ جاتىر. بۇل - تابيعي اپات. مۇنداي احۋال ۇزاق جىلدان بەرى بولماعان. بۇل كولەمى جاعىنان سوڭعى 80 جىلدان بەرگى ەڭ ءىرى تابيعي اپات دەۋگە بولادى.

سۋ تاسقىنىنا بايلانىستى ەلىمىزدىڭ ون ايماعىندا توتەنشە جاعداي جاريالاندى، ياعني اباي، اقمولا، اقتوبە، اتىراۋ، باتىس قازاقستان، قاراعاندى، قوستاناي، پاۆلودار، سولتۇستىك قازاقستان جانە ۇلىتاۋ وبلىستارىندا.

اتقارۋشى ورگاندار جىبەرگەن ولقىلىقتاردى تۇزەۋ ءۇشىن مەن شۇعىل تۇردە ناقتى تاپسىرمالاردى بەردىم. ءقازىر بارلىق قاجەتتى شارالار قابىلدانىپ جاتىر. ۇكىمەت قارعىن سۋدىڭ سالدارىن جويۋعا بار كۇشىن سالۋدا.

پرەمەر-ءمينيستردىڭ باسشىلىعىمەن رەسپۋبليكالىق شتاب قۇرىلدى. پرەمەر-ءمينيستردىڭ ءوزى، ونىڭ ورىنباسارلارى جانە توتەنشە جاعدايلار ءمينيسترى اپات بولعان ايماقتاردى ارالاپ ءجۇر. بارلىق قۇتقارۋ جۇمىستارى مەنىڭ تىكەلەي باقىلاۋىمدا.

سۋ تاسقىنىمەن كۇرەسۋگە توتەنشە جاعدايلار مينيسترلىگىنىڭ بارلىق رەسۋرسى تارتىلدى. سونداي- اق قۇتقارۋ جۇمىستارىنا ىشكى ىستەر مينيسترلىگى، ۇلتتىق ۇلان، قارۋلى كۇشتەر جانە ۇلتتىق قاۋىپسىزدىك كوميتەتىنىڭ ماماندارى بەلسەنە اتسالىسىپ جاتىر. زارداپ شەككەن ايماقتاردىڭ اكىمدىكتەرى كۇندىز- ءتۇنى جۇمىس ىستەۋدە. ونداعان مىڭ ۆولونتەر دە كومەكتەسىپ ءجۇر.

جاعداي وتە كۇردەلى بولسا دا، ءبىز قيىندىقتى مىندەتتى تۇردە ەڭسەرەمىز، بارلىعىن قالپىنا كەلتىرەمىز. ەڭ باستىسى - ازاماتتاردىڭ اماندىعى.

تاسقىن سۋدان زارداپ شەككەن ازاماتتارعا ايتارىم، مەملەكەت بىردە- ءبىر ادامدى ەسكەرۋسىز قالدىرمايدى. بارشاڭىزعا قارجىلىق جانە باسقا دا كومەك بەرىلەدى. ماتەريالدىق شىعىندار تولىق وتەلەدى.

ءبىز الاپات سۋ تاسقىنىنان ءتيىستى قورىتىندى شىعارۋىمىز كەرەك. ياعني، جىبەرىلگەن ولقىلىقتاردى تۇزەتىپ، ءتيىستى ساباق الۋىمىز قاجەت. ال ونداي ساباقتار از ەمەس.

اپاتتاردىڭ الدىن الۋ جۇمىسىنداعى كەمشىلىكتەن باستاپ، سۋ شارۋاشىلىعى ماماندارىنىڭ تاپشى بولۋى، تابيعاتقا نەمقۇرايلى قاراۋعا دەيىن كوپ ماسەلەنى رەتتەۋ قاجەت. ۇكىمەت جانە جەرگىلىكتى اتقارۋشى ورگاندار سۋ تاسقىنىمەن كۇرەستى ءتيىمدى ۇيلەستىرىپ وتىرۋعا ءتيىس. سۋ باسقان اۋماقتاردا قۇقىقتىق ءتارتىپتى قامتاماسىز ەتۋ قاجەت.

مەنىڭ بۇيرىعىممەن اپاتقا قارسى كۇرەسكە قورعانىس مينيسترلىگى قوسىمشا اسكەري كۇشتەرىن جولدايدى. حالىققا كومەكتەسۋ ءۇشىن ۇكىمەتكە مەملەكەتتىك ماتەريالدىق رەزەرۆتى پايدالانۋدى تاپسىرامىن. سونداي-اق ۇكىمەت شىعىنداردى وتەۋدىڭ ءتيىمدى جولدارىن شۇعىل قاراستىرۋعا ءتيىس. ونى زارداپ شەككەن ازاماتتارعا جان-جاقتى ءتۇسىندىرۋ كەرەك. بەرىلەتىن وتەماقى شىعىندى تولىق جابۋى قاجەت.

جاعدايى نەعۇرلىم كۇردەلى ايماقتارداعى جۇمىستى ۇيلەستىرۋ ءۇشىن ۇكىمەت باسشىسىنىڭ ورىنباسارلارىنا ايماقتارعا شىعۋدى تاپسىرامىن. ولار احۋال تۇزەلگەنشە سول جەردە بولادى. اقپاراتتىق شتاب ازاماتتاردى مەملەكەت قابىلداپ جاتقان بارلىق شارالار جونىندە ۇزدىكسىز جانە جان- جاقتى حاباردار ەتىپ وتىرۋعا ءتيىس.

بۇقارالىق اقپارات قۇرالدارىنا، بەلسەندى ازاماتتارعا جانە بلوگەرلەرگە ايتارىم، جۇرتتى دۇربەلەڭگە سالاتىن جالعان اقپاراتتاردى تاراتپاۋ قاجەت. قازىرگى ۋاقىتتا بيلىك پەن قوعامدى ۇيىستىراتىن ارەكەتتەر جاساۋ اسا ماڭىزدى. ازاماتتاردى تەك قانا رەسمي اقپارات كوزدەرىنە سۇيەنۋگە شاقىرامىن.

قۇتقارۋشىلارعا، ءتارتىپ ساقشىلارىنا، ۆولونتەرلەرگە جانە اپاتپەن كۇرەسۋگە اتسالىسىپ جاتقان بارشا جۇرتقا العىسىمدى ايتامىن. وسىنداي قيىن-قىستاۋ كەزدە ءبىر جاعادان باس، ءبىر جەڭنەن قول شىعارۋ ايرىقشا ماڭىزدى. ءبىر ەل، ءبىر حالىق بولىپ جۇمىلىپ، بۇل اپاتتى ەڭسەرەمىز. بۇل ءبىزدىڭ قولىمىزدان كەلەدى.