مەملەكەت باسشىسى رەسەي پرەزيدەنتى ۆلاديمير پۋتين كەلىسسوز جۇرگىزدى
رەسەي گازىن ەلىمىزدىڭ اۋماعى ارقىلى وزبەكستان رەسپۋبليكاسىنا تاسىمالداۋ جوباسىن ىسكە قوسۋ راسىمىنەن كەيىن قاسىم-جومارت توقايەۆ پەن ۆلاديمير پۋتين كەلىسسوز جۇرگىزدى، دەپ حابارلايدى اقوردانىڭ باسپا ءسوز قىزمەتى.
كەزدەسۋ بارىسىندا مەملەكەت باسشىلارى ەكى ەلدىڭ ستراتەگيالىق سەرىكتەستىگىنىڭ قازىرگى جاي- كۇيى مەن قاتىناستاردى ودان ءارى نىعايتۋ پەرسپەكتيۆالارىن تالقىلادى. سونداي-اق، ساۋدا-ەكونوميكا، ەنەرگەتيكا، كولىك- لوگيستيكا جانە باسقا دا سالالارداعى ىقپالداستىقتى جالعاستىرۋ ماڭىزدى ەكەنىن اتاپ ءوتتى.
قاسىم-جومارت توقايەۆ عاسىرلار بويى دوستىق پەن تاتۋ كورشىلىك قاتىناستارعا نەگىزدەلگەن قازاقستان مەن رەسەي اراسىنداعى بايلانىستار قارقىندى دامىپ كەلە جاتقانىنا توقتالدى.
- مەملەكەتتەرىمىزدىڭ ىنتىماقتاستىعى كوپجاقتى سيپاتتا تابىستى دامىپ كەلەدى. ەلدەرىمىز اراسىنداعى ىقپالداستىق، ەڭ الدىمەن، ءتۇرلى سالاداعى ستراتەگيالىق جانە وداقتاستىق قاتىناستارعا نەگىزدەلگەن. بۇگىن ءبىز ءىرى جوبانى ىسكە قوسۋ راسىمىنە قاتىستىق. شىن مانىندە، بۇل تسيفر تۇرعىسىنان ايتارلىقتاي ۇلكەن بولماسا دا، قىسقا مەرزىم ىشىندە اۋقىمدى جۇمىس اتقارىلدى. ارينە، مۇنىڭ سيمۆولدىق ءمانى كەلەشەكتە دە زور بولادى، - دەدى مەملەكەت باسشىسى.
ءوز كەزەگىندە ۆلاديمير پۋتين جوعارى دەڭگەيدەگى ەكىجاقتى قاتىناستاردى ودان ءارى نىعايتۋ قاجەت ەكەنىنە نازار اۋداردى.
- ءسىزدىڭ ماسكەۋگە جاساعان ساپارىڭىز - ايتۋلى وقيعا. ارنايى كەلگەنىڭىز، سونداي-اق بۇگىن تانىستىرىلعان جوبانى بىرگە ىسكە اسىرعانىمىز ءۇشىن سىزگە ريزاشىلىعىمدى بىلدىرەمىن. ارينە، بۇل باستاماسى عانا دەپ ويلايمىن. ايتسە دە، جالپى ايماقتىڭ ەنەرگەتيكا سالاسىنداعى ىنتىماقتاستىعىنا باعىتتالعان العاشقى ءارى اسا ماڭىزدى قادام. بىرلەسە اتقاراتىن جۇمىس كوپ. بارلىق باعىت بويىنشا قاتىناستارىمىز جاقسى دامۋدا. بۇل ءۇشىن سىزگە العىس ايتقىم كەلەدى، - دەدى رەسەي پرەزيدەنتى.
اڭگىمەلەسۋ بارىسىندا قاسىم-جومارت توقايەۆ ۆلاديمير پۋتيندى تۋعان كۇنىمەن قۇتتىقتاپ، قازاقستان مەن رەسەيدىڭ ستراتەگيالىق سەرىكتەستىگىن جانە ەۋرازيا كەڭىستىگىندەگى كوپجاقتى ينتەگراتسيالىق بايلانىستاردى كەڭەيتۋگە قوسقان جەكە ۇلەسىن اتاپ ءوتتى.
