مەملەكەت باسشىسى پرەمەر-ءمينيستردىڭ ورىنباسارى قانات بوزىمبايەۆتى قابىلدادى
استانا. KAZINFORM - قاسىم-جومارت توقايەۆقا وڭىرلەردى دامىتۋ بويىنشا قولعا الىنعان شارالار تۋرالى ەسەپ بەرىلدى. مەملەكەت باسشىسىنىڭ تاپسىرمالارىن ورىنداۋ ماقساتىندا وڭىرلىك ساياسات جونىندەگى جوبالىق كەڭسە قۇرىلدى.
بۇل تۋرالى اقوردانىڭ باسپا ءسوز قىزمەتى حابارلادى.
قانات بوزىمبايەۆ وڭىرلىك ستاندارتتار جۇيەسىن ەنگىزۋ جونىندە باياندادى. بۇل وبلىستار اراسىنداعى جانە ايماق ىشىندەگى ينفراقۇرىلىمعا قول جەتكىزۋ بارىسىندا بايقالاتىن تەڭسىزدىكتى تومەندەتۋگە، ەلدى مەكەندەردى دامىتۋدى ءتيىمدى جوسپارلاۋعا مۇمكىندىك بەرەدى.
قاسىم-جومارت توقايەۆقا ەنەرگەتيكالىق جانە كوممۋنالدىق سەكتورلاردى جاڭعىرتۋ بويىنشا ۇلتتىق جوبانىڭ جۇزەگە اسىرىلۋى جونىندە اقپارات بەرىلدى. جوبا اياسىندا 86 مىڭ شاقىرىم كوممۋنالدىق جەلىنىڭ قۇرىلىسى مەن جاڭعىرتۋ جۇمىستارى جانە جالپى قۋاتى 7,3 گۆت بولاتىن قوسىمشا گەنەراتسيا كوزدەرىن ىسكە قوسۋ قاراستىرىلعان. وسى رەتتە وتاندىق تاۋار وندىرۋشىلەردىڭ تۇرعىن ءۇي-كوممۋنالدىق شارۋاشىلىق جانە ەنەرگەتيكا سالالارىنداعى الەۋەتى بارىنشا پايدالانىلادى.
سونداي-اق مەملەكەت باسشىسىنا تۇرعىنداردى سۋ جانە كارىز جۇيەسىمەن ساپالى ءارى ۇزدىكسىز قامتاماسىز ەتۋ ءۇشىن كوممۋنالدىق جۇيەلەردى باسقارۋ بويىنشا ترانسۇلتتىق كومپانيالارمەن كەلىسسوزدەر جۇرگىزىلگەنى جونىندە ايتىلدى.
پرەزيدەنت وڭىرلەردى تەڭگەرىمدى دامىتۋ ماڭىزدى مىندەتتەردىڭ ءبىرى ەكەنىن اتاپ ءوتتى.
قاسىم-جومارت توقايەۆ ينجەنەرلىك-كوممۋنالدىق ينفراقۇرىلىمدى جاڭعىرتۋ، تۇرعىن ءۇي-كوممۋنالدىق شارۋاشىلىعىنا ءبىرىڭعاي سيفرلى ەكوجۇيە ەنگىزۋ، سۋ سالاسىن سيفرلاندىرۋ جانە سۋ ۇنەمدەۋ تەحنولوگيالارىن قولدانۋ جونىندە ءبىرقاتار ناقتى تاپسىرما بەردى.
ايتا كەتەيىك، پرەزيدەنت سالىق كودەكسىنە تۇزەتۋ ەنگىزەتىن زاڭعا قول قويدى.
