مەملەكەت باسشىسى گەرمانيانىڭ فەدەرالدىق كانتسلەرىمەن كەڭەيتىلگەن قۇرامدا كەلىسسوز جۇرگىزدى

پرەزيدەنت قاسىم-جومارت توقايەۆ ەرەكشە قۇرمەت كورسەتكەنى ءۇشىن گەرمانيانىڭ فەدەرالدىق كانتسلەرى ولاف شولتسكە ريزاشىلىعىن ءبىلدىرىپ، ەلىمىزدىڭ ەۋروپا وداعىنداعى نەگىزگى سەرىكتەسى - گەرمانيامەن اراداعى ىنتىماقتاستىقتى دامىتۋعا قازاقستان ايرىقشا ءمان بەرەتىنىنە نازار اۋداردى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

مەملەكەت باسشىسىنىڭ ايتۋىنشا، استانا مەن بەرلين بارلىق دەڭگەيدە بەلسەندى ءارى ءوزارا سەنىمدى ساياسي ديالوگ جۇرگىزىپ كەلە جاتىر جانە كوپجاقتى الاڭدار اياسىندا تىعىز قارىم-قاتىناس ورناتقان.

بۇگىندە گەرمانيا - قازاقستان ەكونوميكاسىنا قارجى قۇيعان جەتەكشى ينۆەستورلاردىڭ جانە ەڭ ءىرى ساۋدا سەرىكتەستەرىنىڭ ءبىرى. گەرمانيانىڭ ورتالىق ازيا وڭىرىمەن ساۋدا- ساتتىعىنىڭ شامامەن 83 پايىزى قازاقستاننىڭ ۇلەسىنە تيەسىلى. 2022-جىلدىڭ قورىتىندىسى بويىنشا ەكىجاقتى تاۋار اينالىمى 25 پايىزعا ءوسىپ، 2,8 ميلليارد دوللاردى قۇرادى.

مەملەكەت باسشىسى ساۋدا-ەكونوميكالىق بايلانىستاردى ودان ءارى نىعايتۋدىڭ الەۋەتى زور جانە وتاندىق نارىققا گەرمانيا بيزنەسىنىڭ بارىنشا كوبىرەك كەلۋى ءۇشىن قازاقستان بارلىق قاجەتتى جاعدايدى جاساۋعا دايىن ەكەنىن اتاپ ءوتتى. مۇناي- گاز حيمياسى، سيرەك كەزدەسەتىن مەتاللۋرگيا ونەركاسىبى، «جاسىل» ەنەرگەتيكا، كولىك جانە لوگيستيكا، اۋىل شارۋاشىلىعى سالالارى باسىم باعىتتار رەتىندە انىقتالدى.

قاسىم-جومارت توقايەۆ ناقتى قادام رەتىندە جەكە نەمىس ينۆەستورلارى قاتىساتىن جوبالاردى قارجىلاندىرۋ بويىنشا ەكىجاقتى جۇمىس توبىنىڭ قولداۋىمەن شيكىزاتتى بىرلەسە يگەرۋ جوبالارىن ىسكە اسىرۋ جونىندەگى كونسورتسيۋم قۇرۋدى ۇسىندى.

كولىك-ترانزيت سالاسىنداعى ىنتىماقتاستىقتى نىعايتۋعا ەرەكشە نازار اۋدارىلدى.

قاسىم-جومارت توقايەۆ گەرمانيا تاراپىن ترانسكاسپيي باعىتىنىڭ الەۋەتىن پايدالانۋعا، سونداي-اق كاسپيدەگى اقتاۋ جانە قۇرىق پورتتارىنىڭ ينفراقۇرىلىمىن دامىتۋ ىسىنە قاتىسۋعا شاقىردى.

سونىمەن قاتار نەمىس تاراپىن جاڭارتىلاتىن ەنەرگيا كوزدەرىن، سونىڭ ىشىندە «جاسىل» سۋتەگىن دامىتۋ ءۇشىن اناعۇرلىم تىعىز قارىم-قاتىناس ورناتۋعا ۇندەدى.

بۇل رەتتە ماڭعىستاۋ وبلىسىندا Svevind Energy نەمىس-شۆەد كومپانياسىمەن بىرلەسىپ جۇزەگە اسىرىلىپ جاتقان «جاسىل» سۋتەگىن ءوندىرۋ جوباسىنىڭ ماڭىزدىلىعى اتاپ ءوتىلدى.

سونىمەن قاتار پرەزيدەنت نەمىس ارىپتەستەرىنىڭ نازارىن قازاقستان ازاماتتارىنا قاتىستى ۆيزا رەجيمىن جەڭىلدەتۋ مۇمكىندىكتەرىنە اۋداردى.

ءوز كەزەگىندە فەدەرالدىق كانتسلەر ولاف شولتس گەرمانيا تاراپىنىڭ قازاقستانمەن جان-جاقتى ىنتىماقتاستىقتى كەڭەيتۋگە مۇددەلى ەكەنىن راستادى. كانتسلەر قازاقستاندا جۇرگىزىلىپ جاتقان اۋقىمدى ساياسي جانە الەۋمەتتىك-ەكونوميكالىق رەفورمالاردى تولىق قولدايتىنىن ءارى وعان وڭ باعا بەرەتىنىن جەتكىزدى. كانتسلەردىڭ پىكىرىنشە، زاڭ ۇستەمدىگىن قامتاماسىز ەتۋ - ەلدى ورنىقتى دامىتۋدىڭ جانە شەتەلدىك ينۆەستورلاردى قولداۋدىڭ ەڭ باستى شارتى.

گەرمانيا تاراپى قازاقستانمەن اراداعى ساۋدا- ەكونوميكالىق جانە ينۆەستيتسيالىق بايلانىستاردى نىعايتۋعا دايىن ەكەنىن ناقتىلادى. اتاپ ايتقاندا، مۇناي جەتكىزۋ كولەمىن ۇلعايتۋعا، جەتكىزۋ تىزبەگىن ءارتاراپتاندىرۋعا جانە ينفراقۇرىلىمدىق جوبالاردى ىسكە اسىرۋعا قىزىعۋشىلىق تانىتتى. سونداي-اق «جاسىل» ەنەرگەتيكانى پايدالانۋ جانە كليمات ماسەلەسىن بىرلەسىپ ىلگەرىلەتۋ باعىتىندا قارقىندى قارىم- قاتىناستى جولعا قويۋ قاجەت ەكەنىنە نازار اۋداردى. ەكى ەلدىڭ شاعىن جانە ورتا بيزنەس وكىلدەرى ءۇشىن قولايلى جاعداي جاساۋ ماقساتىندا بىرلەسكەن جۇمىستى جانداندىرۋعا باسا ءمان بەرىلدى.

وسىعان دەيىن مەملەكەت باسشىسىنىڭ گەرمانيا كانتسلەرى ولاف شولتسپەن كەزدەسكەنىن جازدىق.