مەملەكەت باسشىسى قىتايداعى قازاقستان مادەنيەت ورتالىعىنىڭ اشىلۋ راسىمىنە قاتىستى
استانا. KAZINFORM - پرەزيدەنت قاسىم-جومارت توقايەۆتىڭ قىتايعا ساپارى اياسىندا بەيجىڭدە قازاقستاننىڭ مادەنيەت ورتالىعى سالتاناتتى تۇردە اشىلدى. بۇل تۋرالى اقوردانىڭ باسپا ءسوز قىزمەتى حابارلادى.
مەملەكەت باسشىسى ورتالىقتىڭ پايدالانۋعا بەرىلۋىن قوس حالىقتىڭ رۋحاني ومىرىندەگى وتە ماڭىزدى كۇن دەپ باعالادى.
- مۇنى، شىن مانىندە، تاريحي وقيعا دەۋگە بولادى. بۇل - قازاقتىڭ قىتاي حالقىنا دەگەن رياسىز كوڭىلى. سونداي-اق قىتاي جۇرتىنىڭ قازاققا بىلدىرگەن دوستىق پەيىلى. ەڭ الدىمەن، وسى باستاماعا قولداۋ كورسەتكەنى ءۇشىن اسا قادىرلى ءتوراعا شي جينپيڭ مىرزاعا زور العىس ايتامىن. قىتاي ەلىنىڭ مادەنيەت جانە تۋريزم ءمينيسترى سۋن ەلي مىرزاعا، سونداي-اق وسى ىسكە اتسالىسقان بارشا قىتاي جانە قازاق ازاماتتارىنا شىنايى ريزاشىلىعىمدى بىلدىرەمىن. وسى سالتاناتتى جيىنعا مەنىڭ قىتايلىق ەسكى دوستارىم، ديپلوماتتار، كەزىندە ماعان ساباق بەرگەن ۇستازىم ليۋ شيتسين مىرزا جانە زيالى قاۋىم قاتىسىپ وتىر. بارشاڭىزعا ىستىق ىقىلاسىمدى بىلدىرەمىن. مادەني-گۋمانيتارلىق بايلانىسىمىز بەرىك بولسا، دوستىعىمىز دا نىعايا تۇسەدى. ونەر مەن مادەنيەت - ءتۇرلى حالىقتىڭ اراسىن جالعايتىن التىن كوپىر، - دەدى قاسىم-جومارت توقايەۆ.
پرەزيدەنت بىلتىردان بەرى استانادا بەيجىڭ ءتىل جانە مادەنيەت ۋنيۆەرسيتەتىنىڭ فيليالى جۇمىس ىستەي باستاعانىن جەتكىزدى.
ال قىتايعا جاساعان وسى ساپارى اياسىندا ەلىمىزدە لۋ بان زەرتحاناسىنىڭ ەكىنشى جانە ءۇشىنشى ورتالىقتارى اشىلدى.
- جالپى، قازاقستان مەن قىتاي اراسىنداعى قارىم-قاتىناس وتە جوعارى قارقىنمەن دامۋدا. ءبىز ىنتىماقتاستىقتىڭ ەكىنشى «التىن 30 جىلدىعىنا» قادام باستىق. جوعارى دەڭگەيدەگى كەزدەسۋلەر مەن كەلىسسوزدەر جىل سايىن ءتيىمدى وتكىزىلۋدە، ەكىجاقتى ساۋدا كولەمى ۇلعايۋدا. بىلتىر ەكى ەلدىڭ تاۋار اينالىمى 44 ميلليارد دوللارعا جەتتى. بۇل - تاريحىمىزدا بۇرىن-سوڭدى بولماعان ەڭ جوعارى كورسەتكىش. بيىل دا ءوزارا ساۋدا قارقىنى تومەن بولمايدى دەگەن بولجام بار. ينۆەستيتسيالىق قارىم-قاتىناس تا ويداعىداي دامۋدا. جالپى، قىتاي قازاقستاننىڭ ەڭ ءىرى ساۋدا-ينۆەستيتسيالىق سەرىكتەسى بولىپ سانالادى. حالىقارالىق ماسەلەلەر بويىنشا قوس ەلدىڭ ۇستانىمدارى ۇقساس نەمەسە بىردەي دەپ كۇمانسىز ايتۋعا بولادى. وسىنىڭ ءبارى قازاقستان مەن قىتاي ماڭگى ستراتەگيالىق سەرىكتەستەر ەكەنىن ايقىن كورسەتەدى. بۇل ءۇردىس حالقىمىزدىڭ ۇلتتىق مۇددەسىنە ساي كەلەدى، - دەدى مەملەكەت باسشىسى.
ايتا كەتەلىك قازاق-قىتاي ىسكەرلىك كەڭەسىنىڭ 8- وتىرىسى باستالعان ەدى.
