مەملەكەت باسشىسى مالايزيا پرەمەر-ءمينيسترى انۋار يبراگيممەن كەزدەستى

استانا. KAZINFORM - مەملەكەت باسشىسى شاعىن فورماتتاعى كەزدەسۋ بارىسىندا مالايزيانى قازاقستاننىڭ وڭتۇستىك-شىعىس ازياداعى ماڭىزدى ءارى سەنىمدى سەرىكتەستەرىنىڭ ءبىرى رەتىندە اتادى، دەپ حابارلايدى اقوردانىڭ باسپا ءسوز قىزمەتى.

- قازاقستان مەن مالايزيانى ۇزاق جىلعى دوستىق پەن ءوزارا ىنتىماقتاستىق ارقاۋى بايلانىستىرادى. بىزدە بۇل باعىتتا جاقسى ءداستۇر قالىپتاسقان. سوندىقتان ءسىزدىڭ ساپارىڭىز ەكى ەل اراسىنداعى بايلانىستاردى ودان ءارى دامىتۋعا تىڭ سەرپىن بەرەدى دەپ سەنەمىن. ءبىز كوپتەگەن ماڭىزدى سالالاردا ءوزارا ىقپالداستىعىمىز بەن ىنتىماقتاستىعىمىزدى ودان ءارى نىعايتۋ ءۇشىن قوسىمشا كۇش جۇمساۋعا دايىنبىز، - دەدى قاسىم-جومارت توقايەۆ.

پرەزيدەنتتىڭ ايتۋىنشا، ديپلوماتيالىق قاتىناستار ورناعان وتىز جىل ىشىندە ەكى ەل اراسىندا ءوزارا ءتيىمدى ىنتىماقتاستىقتىڭ بەرىك نەگىزى قالىپتاستى. قازىرگى گەوساياسي جانە ەكونوميكالىق احۋالعا بايلانىستى مەملەكەتتەردىڭ قارىم-قاتىناسىن ودان ءارى نىعايتۋدىڭ ماڭىزى ارتا ءتۇستى.

انۋار يبراگيم قۇرمەت كورسەتكەنى ءۇشىن مەملەكەت باسشىسىنا العىس ايتىپ، بۇل ساپارعا زور ءمان بەرىپ وتىرعانىن اتاپ ءوتتى. استاناعا وزىمەن بىرگە ۇلكەن قۇرامدا كەلگەن مالايزيا دەلەگاتسياسى سونىڭ ايقىن دالەلى بولادى.

اڭگىمەلەسۋ بارىسىندا قاسىم-جومارت توقايەۆ پەن انۋار يبراگيم ساياسي، ساۋدا-ەكونوميكالىق، ينۆەستيتسيالىق جانە گۋمانيتارلىق سالالارداعى ىقپالداستىقتى كەڭەيتۋ جولدارىن قاراستىردى. سونداي-اق تاراپتار وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.

بۇدان كەيىن كەلىسسوزدەر كەڭەيتىلگەن قۇرامدا جالعاستى.