مەملەكەت باسشىسى حالىق قاھارمانى ءسات توقپاقبايەۆقا التىن جۇلدىز بەن «وتان» وردەندەرىن تابىستادى

استانا. KAZINFORM - مەملەكەت باسشىسى قاسىم-جومارت توقايەۆ حالىق قاھارمانى ءسات توقپاقبايەۆقا ايرىقشا ەرەكشەلىك بەلگىسى - التىن جۇلدىز بەن «وتان» وردەندەرىن سالتاناتتى تۇردە تابىستادى، دەپ حابارلايدى اقوردانىڭ باسپا ءسوز قىزمەتى.

«اقوردا» رەزيدەنتسياسىندا كورنەكتى مەملەكەت جانە قوعام قايراتكەرى، گەنەرال- پولكوۆنيك، ۇلتتىق قاۋىپسىزدىك جانە قورعانىس سالالارىنىڭ ارداگەرى ءسات بەسىمباي ۇلى توقپاقبايەۆتى «حالىق قاھارمانى» اتاعىمەن، سونداي- اق ايرىقشا ەرەكشەلىك بەلگىسى - التىن جۇلدىز بەن «وتان» وردەندەرىمەن ماراپاتتاۋ ءراسىمى ءوتتى.

جيىندا پرەزيدەنت قاسىم-جومارت توقايەۆ ارنايى ءسوز سويلەپ، ءسات توقپاقبايەۆتى قالىڭ جۇرتشىلىق قۇرمەتتەيتىنىن، ونىڭ ەڭبەك جولى ەل ومىرىمەن تىعىز بايلانىستى بولعانىن ايتتى.

- ءسىز قاستەرلى وتانىمىزعا ادال قىزمەت ەتتىڭىز. ەندى عانا تاۋەلسىزدىك الىپ، دەربەس مەملەكەت بولعان جىلدارى اسا جاۋاپتى مىندەتتەردى اتقارۋعا بىلەك سىبانا كىرىسىپ كەتتىڭىز. ەلىمىزدىڭ تىنىشتىعى مەن تۇتاستىعىن ساقتاۋ ءۇشىن وراسان زور ۇلەس قوستىڭىز. شىن مانىندە، مۇنى ناعىز ەرلىك دەپ باعالاۋعا بولادى. قازىر دە قوعامعا پايدالى ىستەردى اتقارىپ جۇرگەنىڭىزدى ءبىز جاقسى بىلەمىز. ەلىمىزدىڭ لايىقتى ازاماتىسىز،- دەدى مەملەكەت باسشىسى.

ءسات توقپاقبايەۆ مەملەكەتىمىزدىڭ قاۋىپسىزدىگى جانە ەلىمىزدىڭ تىنىشتىعى جولىنداعى ەڭبەگىن باعالاعانى ءۇشىن قاسىم-جومارت توقايەۆقا العىس ايتتى

- ادىلەتتى قازاقستان قۇرۋ ىسىندەگى زور ەڭبەگىڭىزدى جانە سۇيىكتى وتانىمىزدى حالىققا جايلى ەلگە اينالدىرۋ ماقساتىندا جۇزەگە اسىرىپ جاتقان ساياساتىڭىزدى تولىعىمەن قولدايمىن. تاۋەلسىزدىگىمىزدىڭ باياندى بولۋى جولىندا سىزبەن ءاردايىم بىرگەمىن! ەلىمىزدىڭ ءىشى داۋدان، سىرتى جاۋدان امان بولسىن! وتانىمىزدا تىنىشتىق، بىرلىك، اۋىزبىرشىلىك ءاردايىم سالتانات قۇرسىن، - دەدى ءسات توقپاقبايەۆ.

سالتاناتتى جيىنعا مەملەكەتتىك كەڭەسشى ەرلان قارين، پرەزيدەنت اكىمشىلىگىنىڭ باسشىسى ايبەك دادەباي، ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆ قاتىستى.