مەملەكەت ايەلدەردىڭ قۇقىقتارىن قورعاۋعا ءاردايىم باسا نازار اۋدارادى - قاسىم-جومارت توقايەۆ
استانا. KAZINFORM - مەملەكەت باسشىسى قاسىم-جومارت توقايەۆ قازاقستاندىقتاردى 8-ناۋرىز - حالىقارالىق ايەلدەر كۇنىمەن قۇتتىقتادى، دەپ حابارلايدى اقوردانىڭ باسپا ءسوز قىزمەتى.
- قىمباتتى حانىمدار!
بارشاڭىزدى حالىقارالىق ايەلدەر كۇنىمەن شىن جۇرەكتەن قۇتتىقتايمىن! بۇل - سۇلۋلىق پەن مەيىرىمدىلىكتىڭ سيمۆولىنا اينالعان شۋاقتى مەرەكە.
حالقىمىز ەجەلدەن اناسىن ارداقتاپ، قىزدارىن قادىرلەي بىلگەن. كوپتەگەن ارۋلارىمىزدىڭ ەسىمى ءتول تاريحىمىزعا التىن ارىپپەن جازىلعان.
قازىر قازاقستاندا ايەلدەر ءتۇرلى كاسىپپەن اينالىسىپ، بيزنەستە جانە قوعامدىق قىزمەتتە زور تابىسقا جەتىپ ءجۇر. ولار بيىك بەلەستەردى باعىندىرىپ قانا قويماي، سانالى ۇرپاق تاربيەلەۋ جولىندا ايانباي ەڭبەك ەتىپ كەلەدى.
بارلىق ايەلدەردىڭ ادال ەڭبەگى ەڭ جوعارى باعاعا لايىق. وسى ءساتتى پايدالانىپ، قازاقستانداعى انالار مەن ارۋلاردىڭ بارىنە شىنايى ريزاشىلىعىمدى بىلدىرەمىن.
مەملەكەت ايەلدەردىڭ قۇقىقتارىن قورعاۋعا جانە بارشا ازاماتتىڭ جان-جاقتى دامۋى ءۇشىن جاعداي جاساۋعا ءاردايىم باسا نازار اۋدارادى.
جاناشىرلىق، جاۋاپكەرشىلىك، جاسامپازدىق سياقتى اسىل قاسيەتتەردى بويىنا سىڭىرگەن ايەلدەر قاۋىمى ەلىمىزدەگى اۋقىمدى وزگەرىستەردى جۇزەگە اسىرۋعا زور ۇلەس قوسا بەرەدى دەپ سەنەمىن.
بارشاڭىزعا مىقتى دەنساۋلىق، باق-بەرەكە تىلەيمىن! - دەلىنگەن مەملەكەت باسشىسىنىڭ قۇتتىقتاۋىندا.
وسىعان دەيىن مەملەكەت باسشىسى قاسىم-جومارت توقايەۆتىڭ قاتىسۋىمەن 8-ناۋرىز - حالىقارالىق ايەلدەر كۇنىنە ارنالعان سالتاناتتى جيىن ءوتتى.
سونداي-اق پرەزيدەنت جارلىعىمەن ءبىرقاتار سالا ماماندارى مەملەكەتتىك ناگرادالارمەن ماراپاتتالادى.
