مەكتەپ باعدارلاماسىنان كەيبىر ءپاندى الىپ تاستاۋ كەرەك پە - مينيستر جاۋابى

استانا. KAZINFORM - وقۋ-اعارتۋ ءمينيسترى عاني بەيسەمبايەۆ مەكتەپ پاندەرىنىڭ كەيبىرىن وقۋ باعدارلاماسىنان الىپ تاستاۋعا قاتىستى تۇسىنىك بەردى.

ءماجىلىستىڭ جالپى وتىرىسىنان كەيىن ب ا ق وكىلدەرى ۆەدومستۆو باسشىسىنان اتا-انالار مەن ءبىرقاتار پەداگوگتىڭ ۇسىنىسى بويىنشا مەكتەپ پاندەرىنىڭ كەيبىرىن وقۋ باعدارلاماسىنان الىپ تاستاۋعا قاتىستى پىكىرىن سۇرادى.

«بىردەن ايتايىن، اتا-انالار ارتىق دەپ سانادى دەپ الىپ تاستالمايدى. قازىر عالىمدار، ماماندار، تالقىلاپ جاتىر، ويتكەنى، بالانىڭ الەمدىك باسەكەگە قابىلەتتىلىگىن قالىپتاستىرۋ ءۇشىن، بالانىڭ جان-جاقتى ءبىلىمدى بولۋى وتە ماڭىزدى. سوندىقتان بۇل جەردە عىلىمي كوزقاراسپەن كەلۋ كەرەك دەپ ەسەپتەيمىن»، - دەپ قىسقا جاۋاپ قايتاردى عاني بەيسەمبايەۆ.

ايتا كەتەيىك، مينيستر بيىل تامىزدا استانادا وتكەن اۋىل پەداگوگتەرىنىڭ فورۋمىندا مەكتەپ باعدارلاماسىنا ەشقانداي جاڭا ءپان ەنگىزىلمەيتىنىن ايتقان ەدى.

ەسكە سالا كەتسەك، وسى جىلى شاحماتتى مەكتەپ باعدارلاماسىنا ەنگىزۋ دە ءسوز بولدى.

اۆتور
داۋلەت ىزتىلەۋ