مەكەن جاققا ءبىر بارىپ قايتايىنشى، مەككەگە بولا بەرەد بارماسام دا - ەركىن ءىلياس ۇلى

استانا. قازاقپارات - بەلگىلى ايتىس اقىنى ەركىن ءىلياس ۇلىنىڭ «ساعىندىرعان وي جايلاۋ» اتتى ولەڭىن ۇسىنامىز.

домбра домбыра
Фото: Александр Павский/ Kazinform

جاتتاعامىن جايلاۋدىڭ ءانىن ەرتە،

شۋاعىنا شومىلىپ جانىم ەركە.

ساعىندىردى توتى - ورمان، تورعىن - بەلىڭ،

كەلبەتىڭ قالپىندا ما، كەرىم ولكە؟

 

جايلاۋدا وتكەن مەزگىلدەر ارمان ءبىراق،

وزگە جەر مەكەنىمنەن ارزانىراق.

زارىقتىم سەنىڭ تامشى كاۋسارىڭا،

سايادا سىلدىراعان مارجان بۇلاق.

 

شىم دالاڭنىڭ شىتىرا بەتى كىلەڭ،

سىبەرىڭە سىبانىپ جەتىلىپ ەم.

سامالىڭدى ساعىندىم ايمالايتىن،

قىران اسقان تاۋلاردىڭ كەتىگىنەن.

 

دىر-دۋ بوپ سايلار تۇگەل، جوتا تۇگەل،

قۇستارعا سيمفونيا قوساتىن ەل.

ماڭلىعىن ماڭعاز جەلمەن باياۋ تەربەپ.

جۇپارىن جۇتقىزاتىن ماساتى بەل.

 

اندىگەر ءانىم جايلاۋ ءبىر تىنبايتىن،

شۇعىلالى داستانىم جىرتىلمايتىن.

شەشەمىز ۇركىتۋمەن ابىگەر ەد،

ورەدەن كەزقۇيرىقتى قۇرت ۇرلايتىن.

 

قارت اجەمنىڭ جۇزىنەن نۇر قۇبىلىپ،

قىزىق ەرتەك ايتاتىن سىرلى قىلىپ.

سونان كەيىن كۇن سالىپ قارايتۇعىن،

ءتورت تۇلىك جاتقان بەلگە مىڭعىرىلىپ.

 

قارت شوپاننىڭ جۇزىنەن نۇر قۇبىلىپ،

قاربالاس قاراقشىسىن تۇرعىعا ءىلىپ.

ءبىز كوبەلەك قۋعاندا زىر جۇگىرىپ،

كوبەلەكتەر قاشاتىن گۇل قىدىرىپ.

 

قىزى - قىران، ۇلى ارىس - ءۇمىتتى ەلدىڭ،

سولاردان سولماس ارمان ءىلىپ كوردىم.

قىر باسىنان قيىرعا قالىقتايتىن،

قيقۋى اساۋ مىنگەن جىگىتتەردىڭ.

 

كوز الدىما ءبىر جارمەنكە كەلەدى ۇنەم،

ءان تۋعان ساحارانىڭ الەگىنەن.

بيەباۋ جاقتان كەلە جاتاتۇعىن،

جەل ويناپ جەڭگەمىزدىڭ جەلەگىمەن.

 

جىر ارنايمىن جايلاۋ دەپ ارناسام دا،

ساۋمال تاۋ ساعىندىرىپ اندا-ساندا.

مەكەن جاققا ءبىر بارىپ قايتايىنشى،

مەككەگە بولا بەرەد بارماسام دا!

دايىنداعان: الىمبەك نۇرالين 

«ءتاڭىرتاۋ» تورابى. 2014 - جىل

سوڭعى جاڭالىقتار