مۇعالىمدىكتەن مينيسترلىككە دەيىن: ەربول مىرزابوسىنوۆ كىم
استانا. KAZINFORM - پاريج وليمپياداسىنان كەيىن ورنىنان بوساتىلعان ەرمەك مارجىقپايەۆتىڭ ورنىنا تۋريزم جانە سپورت ءمينيسترى بولىپ ەربول مىرزابوسىنوۆ تاعايىندالدى.
ۆەدومستۆونىڭ تابالدىرىعىنان ءجيى اتتايتىن ساراپشىلار بۇل تاعايىنداۋدى كەيىنگى اپتادا ءجيى ايتىپ كەتكەن.
رەسمي ءومىربايانىنا قاراساق، ول 1984 -جىلى شىعىس قازاقستان وبلىسىندا دۇنيەگە كەلگەن. ەكى بىردەي ماماندىق بويىنشا جوعارى ءبىلىم العان. ونىڭ ءبىرى - پەداگوگيكا، ەكىنشىسى - زاڭگەرلىك. اۋەلى سەمەي مەملەكەتتىك پەداگوگيكالىق ينستيتۋتىن، ودان كەيىن قازاق گۋمانيتارلىق- زاڭ يننوۆاتسيالىق ۋنيۆەرسيتەتىن ءتامامداعان. سونداي-اق، قازاق سپورت جانە تۋريزم اكادەمياسىنىڭ تۇلەگى اتانعانى بار.
ەڭبەك جولىن 2005 -جىلى سەمەي مەملەكەتتىك پەداگوگيكا ينستيتۋتى دەنە شىنىقتىرۋ جانە سپورت تەورياسى مەن ادىستەمەسى كافەدراسىنىڭ اسسيستەنتى، جاتتىقتىرۋشى-وقىتۋشى رەتىندە باستاعان. وسى سەمەي مەملەكەتتىك پەداگوگيكالىق ينستيتۋتىندا ءجۇرىپ، دەنە تاربيەسى كافەدراسىنىڭ مەڭگەرۋشىسىنە دەيىن كوتەرىلەدى.
ال 2006 -جىلدان باستاپ 12 جىل بويى ش ق و بۇقارالىق سپورتتاعى جوعارى سپورت شەبەرلىگى مەكتەبىندە جاتتىقتىرۋشى- وقىتۋشى بولىپ جۇمىس ىستەگەن.
ونىڭ قىزمەتىندەگى ءىرى بەتبۇرىس 2018-2020 -جىلدارعا ءدوپ كەلەدى دەۋگە بولادى. بۇل كەزەڭدە ول « قىزىلجار ارلاندارى» سپورت كلۋبىنىڭ ديرەكتورى بولىپ ەڭبەك ەتتى. وسى قىزمەتىندە كوزگە ءتۇسىپ، كەيىن (2020-2021 -جىلدارى «Qazaq kuresI» قاۋىمداستىعىنىڭ باسقارۋشى ديرەكتورى لاۋازىمىن اتقاردى. ال 2021 -جىلى دەنە شىنىقتىرۋ جانە بۇقارالىق سپورت اكادەمياسىنىڭ رەكتورى بولىپ تاعايىندالىپ، 2023 -جىلعى اقپاندا سپورت جانە دەنە شىنىقتىرۋ ىستەرى كوميتەتىنىڭ ءتوراعاسى بولعانشا وسى قىزمەتتە ەڭبەك ەتتى.
ەربول مىرزابوسىنوۆتىڭ مينيسترلىك تىزگىنىن ۇستاۋىن ەلدوس سمەتوۆ پەن عۇسمان قىرعىزبايەۆتىڭ پاريج وليمپياداسىندا التىن جانە قولا مەدال الۋىمەن، دەمەۋ جادىرايەۆتىڭ گرەك-ريم كۇرەسىنەن كوپتەن كۇتكەن «كۇمىستى» ەنشىلەۋىمەن بايلانىستىرىپ جاتقاندار بار. راسىمەن دە كۇرەس تۇرلەرى پاريج تورىندە جۇرت كۇتكەن مەجەدەن ارتىق ناتيجە كورسەتتى دەۋگە بولادى.
بەلگىلى سپورت جۋرناليسى اسلان قاجەنوۆ تە مۇنداي بولجامداردىڭ ايتىلۋىنا نەگىز بار دەپ ەسەپتەيدى.
«ءبىز بۇعان دەيىن سپورت سالاسىنداعى كەم-كەتىكتەردى سپورتتان حابارى جوق ادامداردىڭ باسشىلىق ەتۋىمەن بايلانىستىرىپ كەلدىك. كەيىنگى ءتورت جىلدا 4 مينيستر اۋىسقانىن ايتىپ ءجۇرمىز عوي. ونىڭ ءارقايسىسى سالانىڭ دامۋىنا وزىنشە ۇلەس قوسىپ، باستامالار كوتەردى. ءبىراق وسى سالانىڭ ادامى بولماعاننان كەيىن ءبىر جىلداي ۋاقىتتارى جۇمىستى زەرتتەۋگە، تانۋعا كەتەدى. سونىڭ سالدارىنان كوپ باستامالار اياقسىز قالىپ جاتتى، ساباقتاستىق بولعان جوق. ال ەربول مىرزابوسىنوۆ سپورت سالاسىنىڭ وكىلى. ءوزى دە كۇرەستەن باستاعان. تومەننەن باستادى دەۋگە بولاتىن شىعار. سپورتشىدان باستاپ، پەداگوگ، باپكەر بولدى. كەيىنگى جىلدارى سپورت جانە دەنە شىنىقتىرۋ كوميتەتىنىڭ ءتوراعاسى بولعان كەزىندە مەنەدجەرلىك قابىلەتىمەن كوزگە ءتۇستى. پاريج وليمپياداسىنداعى جەتىستىكتەر، اسىرەسە ەلدوس سمەتوۆتىڭ تاريحي جەڭىسىنە ءوزىنىڭ قوسقان ۇلەسى بار. سپورت مەديتسيناسى مەن عىلىمدى دامىتۋ، باپكەرلەردىڭ ەڭبەكاقىسىن كوتەرۋ، ينفراقۇرىلىمدى جەتىلدىرۋ سياقتى سالانىڭ اككى ماماندارى عانا كورە الاتىن باستامالار كوتەرىپ ءجۇردى. ەندى سول يدەيالارىن ىسكە اسىرۋعا جاقسى مۇمكىندىك تۋدى دەپ ويلايمىن. مينيستر بولىپ كىم كەلسە دە، ءتورت جىل ۋاقىت بەرسە دەگەندى ۇنەمى ايتىپ ءجۇرمىز. قازاق سپورتىنا رەفورمالاردى اياعىنا دەيىن ىسكە اسىراتىن، سوعان باسىمەن جاۋاپ بەرەتىن باسشى كەرەك. الەۋمەتتىك جەلىدە وسى تاعايىنداۋ تۋرالى اقپاراتتى ءبولىسىپ ەدىم، سالا ماماندارى قولداپ جاتىر. بۇل دا بولسا، وسىعان دەيىن اتقارعان جۇمىسىنىڭ ناتيجەسى بولسا كەرەك»، - دەيدى ساراپشى.
جۋرناليست ەربول مىرزابوسىنوۆ سپورت جانە دەنە شىنىقتىرۋ كوميتەتىنىڭ ءتوراعاسى بولىپ تۇرعاندا بالۋاندار مەن بوكسشىلاردىڭ وقۋ-جاتتىعۋ جيىندارىن ساۋاتتى ۇيىمداستىرا العانىن ايتادى.
«ەندىگى جۇمىسىندا كەنجە قالىپ تۇرعان ۇلتتىق سپورت تۇرلەرىنە كوبىرەك كوڭىل بولسە ەكەن. باسقادا وزەكتى ماسەلەلەردى ىشىنەن بىلەدى. ارينە، ونىڭ بارىنە كەدەرگىلەر كوپ بولادى. ءبىراق شەگىنەرگە جول جوق كەزەڭگە تاپ كەلىپ تۇرمىز.
بۇگىن پرەزيدەنت جولداۋىندا ايتىلعان سپورت تۋرالى زاڭ جوباسىن ازىرلەپ جاتقان جۇمىس توبىندا مەن دە بارمىن. زاڭنامالىق وزگەرىستەردىڭ ىشىندە مەملەكەتتەن قارجىلاندىرىلاتىن 184 سپورت ءتۇرىن قىسقارتۋ، لەگيونەرلەرگە بيۋدجەتتەن اقشا تولەمەۋ، فەدەراتسيالاردى ەسەپتىلىككە مىندەتتەۋ سياقتى ونداعان تالاپ بار. جاڭا ءمينيستردىڭ الدىنان وسى وزگەرىستەردى قورعاۋ، قابىلداۋ كەزىندە كەدەرگىلەر شىعۋى مۇمكىن. ويتكەنى بيۋدجەتتى ابدەن مايشەلپەككە اينالدىرعان ادامداردىڭ كوبىنە بۇل جاقپاۋى مۇمكىن. ءتۇرلى مۇددەلەر مەن قيتۇرقى سحەمالار بار. سونىڭ بارىمەن تاباندى كۇرەس جۇرگىزبەسە، جۇمىسىنان ناتيجە بولماي قالۋى دا ىقتيمال»، - دەيدى اسلان قاجەنوۆ.
ايتا كەتسەك، بۇگىن مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا سپورت سالاسىنداعى زاڭنامانى جاڭارتۋدى تاپسىردى.
بۇعان دەيىن حابارلانعانىنداي، مەملەكەت باسشىسىنىڭ جارلىعىمەن ەربول قۋانتاي ۇلى مىرزابوسىنوۆ قازاقستان رەسپۋبليكاسىنىڭ تۋريزم جانە سپورت ءمينيسترى لاۋازىمىنا تاعايىندالدى.
اۆتور
ەسىمجان ناقتىباي
