مايمىل شەشەگىنە قارسى ۆاكسينانى ساتىپ الۋدىڭ قاجەتى جوق - مينيسترلىك
استانا. KAZINFORM - دۇنيەجۇزىلىك دەنساۋلىق ساقتاۋ ۇيىمى مايمىل شەشەگىنە قارسى ۆاكسينانى بەكىتتى. بۇل ءوز كەزەگىندە 20 مىڭعا جۋىق ادام اۋرۋ جۇقتىرعان افريكاداعى ىندەتتىڭ تارالۋىنا توسقاۋىل قويۋعا كومەكتەسەدى.
ق ر دەنساۋلىق ساقتاۋ مينيسترلىگى قازاقستانداعى جاعدايدىڭ تۇراقتى ەكەنىن جانە ۆاكسينا ساتىپ الۋدىڭ قاجەتى جوق ەكەنىن مالىمدەدى.
«ورتالىق ازيادا، ونىڭ ىشىندە قازاقستانعا مايمىل شەشەگىن جۇقتىرعان ناۋقاستاردىڭ كەلۋ جاعدايى تىركەلگەن جوق. ەل اۋماعىندا ءتيىستى مونيتورينگ ەسكەرىلگەن جانە مەملەكەتتىك شەكاراداعى سانيتارلىق- كارانتيندىك بەكەتتەردە باقىلاۋ كۇشەيتىلدى. سوندىقتان قازىر ۆاكسينانى ساتىپ الۋدىڭ قاجەتى جوق»، - دەلىنگەن ق ر د س م سانيتاريالىق-ەپيدەميولوگيالىق باقىلاۋ كوميتەتىنىڭ Kazinform اگەنتتىگىنە بەرگەن جاۋابىندا.
اتالعان ۆەدومستۆو تۋريستەر بۇل ىندەتتى جۇقتىرماس ءۇشىن قانداي الدىن الۋ ءىس- شارالارىنا ءمان بەرۋ كەرەك ەكەنىن ەسكە سالدى. شەتەلگە شىعۋدى جوسپارلاعان ازاماتتارعا وسى تالاپتاردى ۇستانۋ قاجەت:
- ايماقتاعى ەپيدەميولوگيالىق جاعدايدى زەردەلەۋ؛
- ىندەت جۇقتىرعان ادامدارعا جاقىنداماۋ؛
- ناۋقاستارعا كۇتىم جاساۋ كەزىندە ماسكا تاعىپ، ارنايى قولعاپتاردى پايدالانۋ؛
- اۋرۋ بەلگىلەر بولسا، دەرەۋ دارىگەرگە حابارلاسۋ؛
- شەتەلدەن ورالعاننان كەيىن 21 كۇن ىشىندە سيمپتومدار پايدا بولسا، شۇعىل تۇردە مەديتسينالىق كومەككە جۇگىنىپ، وسىعان دەيىنگى ساياحات تۋرالى حابارلاۋ كەرەك.
ەسكە سالساق، جاقىندا دانيالىق Bavarian Nordic A/S كومپانياسىنىڭ MVA- BN ۆاكسيناسى مايمىل شەشەگىنە قارسى العاشقى ەكپە بولدى.
تامىز ايىنىڭ سوڭىندا 2024 -جىلدىڭ باسىنان بەرى افريكا ەلدەرىندە mpox ۆيرۋسىنا (مايمىل شەشەگىنىڭ جاڭا اتاۋى) شالدىققاندار سانى 22,8 مىڭ ادامعا جەتكەنى حابارلاندى.
ق ر دەنساۋلىق ساقتاۋ مينيسترلىگى الەمدەگى مايمىل شەشەگىنىڭ جاعدايى تۋرالى جانە ەلىمىزدىڭ اۋماعىندا ينفەكسيانىڭ تارالۋىن بولدىرماۋ بويىنشا قابىلدانعان شارالار تۋرالى مالىمەت جاريالادى.
