ماشينا جاساۋ سالاسىن دامىتۋ بويىنشا اۋقىمدى جوسپارلارىمىز بار - پرەزيدەنت
استانا. KAZINFORM - ەلوردادا قازاقستان ماشينا جاساۋشىلارىنىڭ XII فورۋمى باستالدى. فورۋمنىڭ اشىلۋىندا پرەمەر-مينيستر ولجاس بەكتەنوۆ قازاقستان پرەزيدەنتى قاسىم-جومارت توقايەۆتىڭ قۇتتىقتاۋ ءسوزىن وقىپ بەردى.
- سىزدەردى قازاقستان ماشينا جاساۋشىلارىنىڭ XII فورۋمىنىڭ اشىلۋىمەن شىن جۇرەكتەن قۇتتىقتايمىن. بۇل - ماشينا جاساۋ سالاسىنىڭ بىلىكتى ماماندارىنىڭ كەزدەسۋى، وتاندىق بيزنەس وكىلدەرى ءۇشىن جاڭا مۇمكىندىكتەر الاڭى. قازىر قازاقستانداعى ماشينا جاساۋ سالاسىنىڭ ۇلەسى 13 تەن 19 پروتسەنتكە دەيىن جەتىپ وتىر، جالپى كولەمى 4,1 ميلليونعا جەتتى جانە ەكسپورت كولەمى دە ارتىپ كەلەدى. قازىر ەلىمىزگە اۋىل شارۋاشىلىعى تەحنيكاسىمەن قامتاماسىز ەتەتىن جاڭا كومپانيالار كەلىپ جاتىر. بيىل ماشينا جاساۋ سالاسىن دامىتۋ بويىنشا اۋقىمدى جوسپارلارىمىز بار. بۇل ءبىزدىڭ جەمىستى ەڭبەگىمىزدىڭ ناتيجەسى. ماشينا جاساۋ كولەمىن ارتتىرۋ، وزىق تەحنولوگيالاردى، سونىڭ ىشىندە جاساندى ينتەللەكتىنى قولدانۋ - ءبىزدىڭ باستى مىندەتىمىز. سونداي-اق جۇمىسشىلار ءۇشىن قاجەتتى ەڭبەك جاعدايلارىن جاساۋ دا اسا ماڭىزدى. قازىرگى جاھاندىق وزگەرىستەر مەن داعدارىس جاعدايلارىندا جاڭا مۇمكىندىكتەر اشىلىپ كەلەدى. ماشينا جاساۋ سالاسى قازاقستاننىڭ قارقىندى دامۋىنا ءوز ۇلەسىن قوسۋعا دايىن. ماشينا جاساۋشىلار فورۋمىنىڭ تابىستى وتۋىنە تىلەكتەسپىن، - دەپ جازىلعان پرەزيدەنت قۇتتىقتاۋىندا.
ايتا كەتەيىك، قازاقستان ماشينا جاساۋشىلارىنىڭ XII فورۋمى 24-25-ءساۋىر كۇندەرى استانادا وتەدى. فورۋم وتاندىق ماشينا جاساۋ سالاسىن ودان ءارى دامىتۋعا باعىتتالعان ۇسىنىستار مەن پراكتيكالىق ۇسىنىمدار ازىرلەۋدى كوزدەيدى.
سونداي-اق، ەلوردادا ماشينا جاساۋ جانە مەتالل وڭدەۋ بويىنشا «Kazakhstan Machinery Fair 2024» حالىقارالىق مامانداندىرىلعان كورمەسى ءوتىپ جاتىر.
