ماديارلار قازاقستاندى وزدەرىنىڭ اتا-جۇرتى سانايدى
استانا. KAZINFORM - تۋىستاس جۇرتتىڭ ىشىندە ەلىمىزدەن ەڭ قاشىق ورنالاسقانى - ماجارستان. كارى قۇرلىقتىڭ قاق ورتاسىن مەكەندەگەن باۋىرلاس حالىق قازاقتى جاقىن تارتادى، دەپ حابارلايدى 24kz.
وسىدان بولار، ءبىزدىڭ انا ءتىلىمىزدى ۇيرەنىپ، مادەنيەتىمىزدى زەرتتەپ جۇرگەندەرى كوپ.
ماديارلار قازاقستاندى وزدەرىنىڭ اتا-جۇرتى سانايدى. سول سەبەپتى، الىستاعى اعايىننىڭ قازاق مادەنيەتىنە دەگەن قىزىعۋشىلى مول. ەۋروپاداعى اعايىن قازاقتارمەن تۋىستىعى تۋرالى العاشقى پىكىرلەرىن ⅩⅨعاسىردا جاريالاي باستاعان. اسىرەسە قوس ەلدىڭ مادەني- گۋمانيتارلىق ىنتىماقتاستىعىنا ماندوكي اۋلەتىنىڭ قوسقان ۇلەسى زور.
ماقسىم قىزى ماندوكي، ەتنوگراف:
- ءبىزدىڭ وسى ماجارستانداعى قازاق ءتىلى، قازاق ادەبيەتى، ادەت-عۇرپى، سالت-ءداستۇرى، تاريحى جانە اۋەنى، مۋزىكاسى، ۇلت اسپاپتارىن ۇيرەنۋدى وسى لاكيتەلەكتەن باستادىق. لاكيتەلەكتە ۇلتتىق ينستيتۋت دەگەن بار. نەگىزگى باستالۋى - 2008 -جىل. لاكيتەلەكتىڭ قولداۋىمەن، لەجان شاندۋر مىرزانىڭ، ول كەزدە ول پارلامەنتتە سپيكەر بولدى. سول كىسى ءوزىنىڭ ەندى شىعىسقا دەگەن تۋىستىعى ءبىلدىرۋ ءۇشىن جانە ول كەزدە ۇكىمەت باسىندا تۇرعاندا شىعىس حالقى مەن ماجار حالقىنىڭ تۋىستىعىن جالعاستىرۋ جانە ماجارلاردىڭ ۇمىتىلىپ قالعان ءداستۇرىن، ادەت-عۇرپىن، قولونەرىن، اۋەنىن، دومبىراسىن، مۋزىكالىق اسپاپتارىن ۇيرەنەيىك دەپ ويلاعاندار وسىنداي ويعا كەلىپ، لاكيتەلەكتى جاستاردى ۇيرەتەتىن ماندوكيدى وقۋلىقتارىنىڭ كۋرستارىن اشقان.
لاكيتەلەك ۇلتتىق ينستيتۋتى جىلدا ەلدىڭ ءار تۇكپىرىنەن كەلگەن ستۋدەنتتەرگە قازاق مادەنيەتى جايلى ارنايى اپتالىق ۇيىمداستىرادى. بۇل ءداستۇر بيىل دا وزگەرگەن جوق.
تاكاچ نوەل، ستۋدەنت:
- ماجارستاندا تاريح فاكۋلتەتىنىڭ ستۋدەنتىمىن. ءبىر سەمەستر قاراعاندىدا ءبىلىم الدىم. تاعى دا اتاجۇرتقا بارۋدى ارمايمىن.
بەنەدەك تيبور، ستۋدەنت:
- قازاق مادەنيەتىنە عاشىقپىن. سول سەبەپتى ۇيرەنۋگە بەل بۋدىم.
بيىلعى قازاق مادەنيەتى اپتالىعىنا 20 ادام قاتىسىپ وتىر. ولاردىڭ ءبىرى قازاق ءتىلىن ءبىر كىسىدەي مەڭگەرسە، ەكىنشىسى دومبىرا، قوبىزبەن كۇي تارتادى.
حۋستي زولتان، ستۋدەنت:
- مەنىڭ ەسىمىم سۇلتان. قىپشاقپىن. جيرەن شاشتى. ات كۇيىن تارتىپ بەرەمىن.
فەحەر بوگلاركا، قازاق- تۇرىك ۋنيۆەرسيتەتى تۇلەگى:
- قايىرلى كۇن. سىزدەرگە بۇگىن مەن ماجار بولىپ، قازاق اسپابىندا ويناپ، قازاق حالقى مەن ماجار حالقىنان ءبىر جيىن ورىنداپ بەرەيىن.
ماجارستاندا تۇركى تىلدەرىنىڭ ىشىندە، اسىرەسە قازاقشا بىلەتىندەر از ەمەس. «مۇنى ەكى ءتىلدىڭ ءبىر-بىرىنە جاقىندىعى سەبەپ» دەيدى وزدەرى.
