ماڭعىستاۋدا ارقارلار تولدەپ جاتىر
اقتاۋ. KAZINFORM - ماڭعىستاۋدا «قىزىلساي» مەملەكەتتىك وڭىرلىك تابيعي پاركىنە تيەسىلى اۋماقتا ارقارلار تولدەپ جاتىر.
قازىرگى ۋاقىتتا «ماناشى»، «تاسورپا» مەملەكەتتىك تابيعي قاۋمالدارىنىڭ باسشىلارى ەرەكشە قورعالاتىن اۋماقتارعا دالا اڭدارىنىڭ كوكتەمگى جاي-كۇيىن باقىلاۋ ماقساتىندا، فوتوتۇزاقتار ورناتىپ، اينالاعا رەيدتىك ءىس-شارا جۇمىستارىن جۇرگىزىپ جاتقانىن مالىمدەدى.
بۇگىندە پاركە تيەسىلى 4 قاۋمالدا مەكەن ەتەتىن ارقارلار سانى مىڭنان اسقان. تابيعي ءوسىم بويىنشا ءتۇز جانۋارلارى ناۋرىزدىڭ سوڭىنان مامىر ايىنا دەيىن تولدەۋ كەزەڭى جالعاسادى.
«كوكتەم مەزگىلىنىڭ ورتا تۇسى ارقارلاردىڭ تولدەيتىن ۋاقىتى. سوندىقتان جانۋارلاردىڭ تىنىشتىعى ءۇشىن بارلىق ءتيىستى جۇمىستاردى ءبىزدىڭ پاركتىڭ ينسپەكتورلارى اتقارىپ جاتىر. تاۋلىك بويى كەزەكشىلىكپەن اۋماقتا موتوتسيكل مەن كولىكتەردىڭ جۇرۋىنە، درون ۇشىرۋعا تىيىم سالىنعان. سونداي-اق، اڭشىلاردىڭ مىلتىق اتۋىنا توسقاۋىل قويىلعان. باقىلاۋ جۇمىستارىن فوتوتۇزاقپەن اتقارىپ وتىرمىز. « قىزىلساي» مەملەكەتتىك وڭىرلىك تابيعي پاركىنە 4 قاۋمال، 1 پارك كىرەدى. وسى ورايدا ءبىز «ادامتاس» قاۋمالىنا عانا فوتوتۇزاق قۇرعان جوقپىز. سەبەبى، تەڭىز جاعاسى بولعاندىقتان مۇندا تەك قۇستار عانا بار. قالعان 3 قاۋمال مەن 1 پاركتە ارقارلاردىڭ تولدەۋى تۇراقتى باقىلانىپ وتىر. ولاردىڭ ناقتى سانى ءساۋىر ايىنىڭ سوڭىندا بەلگىلى بولادى»، - دەدى پارك ديرەكتورى مىڭبەرگەن قاراتاۋوۆ.
ونىڭ ايتۋىنشا، «قىزىلساي» مەملەكەتتىك وڭىرلىك تابيعي پاركىندەگى وتكەن جىلعى ساناق كەزىندە 1059 ارقار بارى انىقتالعان. بيىلدان باستاپ ولاردىڭ سانى ەداۋىر كوبەيىپ وتىر. سونداي-اق، م. قاراتاۋوۆ تابيعات پاركىندە قاراقۇيرىقتار مامىر ايىندا تولدەي باستايتىنىن العا تارتتى.
وسىعان دەيىن ماڭعىستاۋداعى «قىزىلساي» تابيعي پاركىندە ارقار مەن قاراقۇيرىق سانى كوبەيگەنى تۋرالى دەرەك ءمالىم بولعان ەدى.
بىلتىر وڭىردە ارقار اتقان براكونەرلەر ۇستالعان بولاتىن.
اۆتور
جانكەلدى قارجان
