ماڭعىستاۋ جەراستى مەشىتتەرى يۋنەسكو تىزىمىنە ەنگىزىلمەك
اقتاۋ. KAZINFORM - ماڭعىستاۋ وبلىسىنىڭ اكىمى نۇرداۋلەت قيلىبايدىڭ توراعالىعىمەن «ماڭعىستاۋ تۇبەگىنىڭ جارتاس مەشىتتەرى» ەسكەرتكىشتەرىن يۋنەسكو- نىڭ بۇكىلالەمدىك مۇرالار تىزىمىنە ەنگىزۋ ماسەلەسى تالقىلاندى. جيىنعا يكوموس تەحنيكالىق باعالاۋ ميسسياسىنىڭ وكىلدەرى قاتىستى
مەملەكەت باسشىسىنىڭ ۇلتتىق قۇرىلتايدا بەرگەن تاپسىرماسىنا سايكەس وڭىردەگى بەس جەراستى مەشىتىن - بەكەت اتا، قارامان اتا، شاقپاق اتا، شوپان اتا جانە سۇلتان ءۇپى مەشىتتەرىن حالىقارالىق تىزىمگە ەنگىزۋ جۇمىستارى جۇرگىزىلۋدە.
اتالعان ەسكەرتكىشتەر 2021 -جىلى يۋنەسكو-نىڭ الدىن الا تىزىمىنە ەنگەن. وسى باعىتتا مادەنيەت جانە اقپارات مينيسترلىگىنىڭ جەتەكشىلىگىمەن عىلىمي-جوبالىق قۇجاتتار ازىرلەنىپ، پاريجدەگى شتاب-پاتەرگە جولداندى.
سونداي-اق قورعاۋ ايماقتارى بەلگىلەنىپ، اقپاراتتىق تاقتايشالار ورناتىلدى، فوتو جانە بەينەماتەريالدار دايىندالدى.
ميسسيا اياسىندا وڭىرگە حالىقارالىق ساراپشىلار كەلدى. ولاردىڭ قاتارىندا بۋرسا ۋلۋداگ ۋنيۆەرسيتەتىنىڭ پروفەسسورى، يكوموس ساراپشىسى Kivilcim Corakbas Figen Balikesir، يۋنەسكو جانە يسەسكو ىستەرى جونىندەگى ۇلتتىق كوميسسيا مۇشەسى دميتري ۆوياكين، «قازرەستاۆراتسيا» ش ج ق ر م ك باس ديرەكتورى ولجاس شاريازدانوۆ جانە اتالعان مەكەمەنىڭ ساۋلەتشىسى ءلاززات بەيسەمبايەۆا بار.
وبلىس اكىمى نۇرداۋلەت قيلىباي ماڭعىستاۋدىڭ تاريحي-مادەني مۇراسىنىڭ ماڭىزىن اتاپ ءوتتى.
- ماڭعىستاۋ - تاريحى تەرەڭ ولكە. مۇندا ەجەلگى قورىمدار، ساۋلەت ونەرىنىڭ كورنەكتى تۋىندىلارى سانالاتىن تامدار مەن ساعانالار، جەراستى مەشىتتەرى بار. «مادەني مۇرا» باعدارلاماسى اياسىندا وسى ەسكەرتكىشتەردى قورعاۋ باعىتىندا كەشەندى جۇمىستار جۇرگىزىلدى. سونىڭ ناتيجەسىندە بەس جەراستى مەشىتى يۋنەسكو- نىڭ الدىن الا تىزىمىنە ەنگىزىلدى. قازىرگى تاڭدا قورعاۋ ايماقتارى بەلگىلەنىپ، عىلىمي- زەرتتەۋ جۇمىستارى جۇرگىزىلۋدە. بۇل نىسانداردىڭ بۇكىلالەمدىك مۇرالار قاتارىنا ەنۋى حالقىمىزدىڭ تاريحي قۇندىلىقتارىن ساقتاپ قانا قويماي، ەلىمىزدىڭ مادەني جانە ەكونوميكالىق دامۋىنا سەرپىن بەرەدى، - دەدى ايماق باسشىسى.
كەزدەسۋ سوڭىندا اكىم ميسسيا جۇمىستارىنىڭ ايماق ءۇشىن ماڭىزى زور ەكەنىن اتاپ ءوتىپ، بارلىق شارا حالىقارالىق تالاپتارعا ساي جالعاساتىنىن جەتكىزدى.
بۇعان دەيىن يۋنەسكو- نىڭ «الەم جادى» باعدارلاماسىنا اباي قولجازباسىنداعى «قارا سوزدەر» كىرۋى مۇمكىن ەكەنى حابارلاندى.
