ماعجان ءىلياسوۆ قازاقستاننىڭ امەريكاداعى ەلشىسى بولىپ تاعايىندالدى
استانا. KAZINFORM - پرەزيدەنت قاسىم-جومارت توقايەۆ ماعجان ءىلياسوۆتى قازاقستان رەسپۋبليكاسىنىڭ امەريكا قۇراما شتاتتارىنا توتەنشە جانە وكىلەتتى ەلشى قىلىپ تاعايىندادى. بۇل تۋرالى اقوردا ءمالىم ەتتى.
- مەملەكەت باسشىسىنىڭ جارلىعىمەن ماعجان جانبوتا ۇلى ءىلياسوۆ قازاقستان رەسپۋبليكاسىنىڭ امەريكا قۇراما شتاتتارىنداعى توتەنشە جانە وكىلەتتى ەلشىسى بولىپ تاعايىندالدى، ول قازاقستان رەسپۋبليكاسىنىڭ ۇلىبريتانيا جانە سولتۇستىك يرلانديا قۇراما كورولدىگىندەگى توتەنشە جانە وكىلەتتى ەلشىسى، قازاقستان رەسپۋبليكاسىنىڭ يسلاندياداعى، يرلاندياداعى توتەنشە جانە وكىلەتتى ەلشىسى قىزمەتىن قوسا اتقارۋشى لاۋازىمدارىنان بوساتىلدى، - دەلىنگەن حابارلامادا.
ماعجان جانبوتا ۇلى ءىلياسوۆ 1974 -جىلعى 26 -تامىزدا الماتى قالاسىندا تۋعان.
قازاق مەملەكەتتىك الەم تىلدەرى ۋنيۆەرسيتەتىنىڭ حالىقارالىق قاتىناستار فاكۋلتەتىن ۇزدىك بىتىرگەن جانە دج. كەننەدي اتىنداعى گارۆارد ۋنيۆەرسيتەتىنىڭ مەملەكەتتىك باسقارۋ مەكتەبىنىڭ ماگيستراتۋراسىن اياقتاعان.
ديپلوماتيالىق مانسابىن 1996 -جىلى ق ر س ءى م حالىقارالىق ۇيىمدار مەن حالىقارالىق ەكونوميكالىق قاتىناستار باسقارماسىنىڭ رەفەرەنتى، كەيىننەن اتتاشەسى لاۋازىمدارىنان باستادى.
1998-1999-جىلدارى ب ۇۇ باسقارماسى جانە حالىقارالىق ەكونوميكالىق ۇيىمدار باسقارماسىنىڭ ءۇشىنشى، ەكىنشى حاتشىسى.
1999-جىلدان 2003 -جىلعا دەيىن ق ر پرەزيدەنتى اكىمشىلىگىنىڭ پروتوكول قىزمەتىنىڭ كونسۋلتانتى.
2003-2005 -جىلدارى - ق ر پرەزيدەنتى كەڭسەسىنىڭ ۇيىمداستىرۋ جانە قۇجاتتامالىق قامتاماسىز ەتۋ توبىنىڭ باس ساراپشىسى.
2005-2012 -جىلدارى ق ر پرەزيدەنتى اكىمشىلىگىنىڭ سىرتقى ساياسات ورتالىعىندا جۇمىس ىستەدى، وندا باس ساراپشىدان ورتالىق مەڭگەرۋشىسى لاۋازىمىنا دەيىن جەتتى.
2013-2016 -جىلدارى ق ر پرەزيدەنتىنىڭ كەڭەسشىسى - ق ر پرەزيدەنتى اكىمشىلىگى سىرتقى ساياسات ورتالىعىنىڭ مەڭگەرۋشىسى.
2016 -جىلدان باستاپ قازاقستاننىڭ نيدەرلاندتاعى ەلشىسى جانە قازاقستان رەسپۋبليكاسىنىڭ حيميالىق قارۋعا تىيىم سالۋ ۇيىمىنداعى تۇراقتى وكىل
2020 -جىلدىڭ 30 - قىركۇيەگىنەن قازاقستاننىڭ ب ۇ ۇ جانىنداعى تۇراقتى وكىلى.
ەسكە سالا كەتەيىك، بۇعان دەيىن دجۋلي ستاففت ا ق ش- تىڭ قازاقستانداعى ەلشىسى بولىپ تاعايىندالعان بولاتىن.
