ەلىمىزدە دەكرەتتىك دەمالىس ءتارتىبىن وزگەرتۋ ۇسىنىلدى

ۇكىمەت ەر ادامدارعا مەملەكەت تاراپىنان بالا كۇتىمىنە بايلانىستى دەمالىس بەرۋ قانشالىقتى ورىندى ەكەنىن تالقىلادى. سونداي-اق بالا تۋعاننان كەيىنگى العاشقى ەكى جىلدا ايەلدەرگە كورسەتىلەتىن قولداۋدىڭ ءبىر بولىگىن بوبەكجاي-باقشا ورىندارىمەن جانە بالا كۇتۋشى قىزمەتىمەن الماستىرۋ مۇمكىندىگى ءسوز بولدى.

بۇل تۋرالى پرەزيدەنت قاسىم-جومارت توقايەۆتىڭ تاپسىرمالارىن ىسكە اسىرۋ ماسەلەلەرى جونىندەگى ۇكىمەت وتىرىسىندا ايتىلدى.

- مەملەكەت تاراپىنان ەر ازاماتتارعا بالا كۇتىمىنە بايلانىستى دەمالىس بەرۋ قانشالىقتى ورىندى ەكەنى قارالدى. سونداي-اق ايەلدەرگە بالا كۇتىمىنىڭ ەكى جىلدىق كەزەڭىندە كورسەتىلەتىن قولداۋ فورماتىن وزگەرتۋ ماسەلەسى تالقىلاندى. اتاپ ايتقاندا، بالالاردى بوبەكجاي-باقشامەن قامتۋ جانە كىشكەنتاي بالالارعا كۇتىم جاسايتىن بالا كۇتۋشىلەر تاپشىلىعىن شەشۋ مۇمكىندىكتەرى قاراستىرىلدى، - دەلىنگەن ۇكىمەت حابارلاماسىندا.

ازىرگە بۇل ۇسىنىستار بويىنشا تۇپكىلىكتى شەشىم قابىلدانعان جوق.

دەكرەتتىك دەمالىسقا قاتىستى ماسەلە الەۋمەتتىك كومەك جۇيەسىن رەفورمالاۋ اياسىندا قاراستىرىلىپ جاتىر. العاشقى كەزەڭدە ۇكىمەت 36 تولەم ءتۇرىنىڭ 14 ءىن اتاۋلى قاعيداتقا كوشىرۋدى جوسپارلاپ وتىر، ياعني كومەك ازاماتتاردىڭ ناقتى مۇقتاجدىعى ەسكەرىلە وتىرىپ كورسەتىلەدى.

سونداي-اق قازىر جەرگىلىكتى اتقارۋشى ورگاندار كورسەتەتىن الەۋمەتتىك كومەكتىڭ 13 ءتۇرىن ءتورت تۇرگە بىرىكتىرۋ ۇسىنىلدى.

سونىمەن قوسا 2027-جىلدىڭ باسىنان باستاپ ارداگەرلەرگە كورسەتىلەتىن جەكەلەگەن قولداۋ شارالارىنا دا اتاۋلىلىق قاعيداتىن ەنگىزۋ كوزدەلىپ وتىر.

جيىندا ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ مۇگەدەكتىگى بار ازاماتتاردىڭ دەرەكتەرىن تەكسەرۋ كەزىندە جاساندى ينتەللەكتىنى قولدانۋ ناتيجەلەرى تۋرالى دا ايتتى.

- جۇيە مۇگەدەكتىك بەلگىلەۋگە نەگىز بولعان مەديتسينالىق قۇجاتتاردى قولدان جاساۋدىڭ 167 جاعدايىن انىقتادى. ماتەريالدار قۇقىق قورعاۋ ورگاندارىنا بەرىلدى. بۇدان بولەك، ءارتۇرلى ادامداردىڭ دەرەكتەرى بىردەي بولىپ شىققان 18647 جاعداي انىقتالدى، - دەلىنگەن حابارلامادا.

سونىمەن قاتار 1-قازاننان باستاپ قازاقستاندىقتارعا الەۋمەتتىك تولەمدەردى بەرۋ شارتتارىنداعى وزگەرىستەر تۋرالى SMS ،eGov Mobile جانە بانكتەردىڭ موبيلدى قوسىمشالارى ارقىلى كەزەڭ-كەزەڭىمەن حابارلانا باستايدى.

ايتا كەتەيىك، بۇعان دەيىن قازاقستاندىق انالار بالا كۇتىمىنە قانشا قاراجات جۇمسايتىنى جونىندە ماتەريال جاريالادىق.