ەلىمىزدە بەينەباقىلاۋ كامەرالارىنا ءبىرىڭعاي ستاندارت بەكىتىلدى: نە وزگەردى جانە قانداي ەرەكشەلىكتەر بار؟

قازاقستاندا العاش رەت بەينەباقىلاۋ كامەرالارىنا ءبىرىڭعاي تالاپتار بەكىتىلدى: 1-قىركۇيەكتەن باستاپ كۇشىنە ەنەتىن جاڭا ستاندارت قانداي وزگەرىستەر اكەلەدى؟

BAQ. KZ ءتىلشىسى بەينەباقىلاۋ جۇيەلەرىنە قويىلعان ءبىرىڭعاي تالاپتار مەن ونىڭ جۇمىس ىستەۋ تەتىكتەرىن انىقتاپ كوردى.

وسى ۋاقىتقا دەيىن ەلىمىزدە بەينەباقىلاۋ جۇيەلەرىنە ارنالعان جەكە ۇلتتىق ستاندارت بولماعان. ەندى بارلىق تالاپتار ءبىر قۇجاتقا بىرىكتىرىلدى.

ستاندارت تەحنيكالىق رەتتەۋ جانە مەترولوگيا كوميتەتى ءتوراعاسىنىڭ 2026-جىلعى 17-شىلدەدەگى بۇيرىعىمەن بەكىتىلدى. قۇجاتتى ازىرلەۋدى ۇلتتىق قاۋىپسىزدىك كوميتەتى باستاماشى ەتىپ كوتەرگەن. بۇل جۇمىس 2026-جىلعا ارنالعان ۇلتتىق ستاندارتتاۋ جوسپارىنا ەندى.

ىشكى ىستەر مينيسترلىگى بۇل قۇجات بەينەباقىلاۋ جۇيەلەرىن جوبالاۋ، سالۋ جانە رەكونسترۋكتسيالاۋ كەزىندە قولدانىلاتىن ءبىرىڭعاي تالاپتاردى بەلگىلەيتىنىڭ جەتكىزدى.

ستاندارتتىڭ باستى ماقساتى - جابدىقتاردىڭ ءوزارا ۇيلەسىمدىلىگىن ارتتىرۋ جانە بەينەكامەرالاردى تاڭداۋ مەن پايدالانۋ تالاپتارىن ءبىرىڭعايلاۋ. قازىرگى ۋاقىتتا وسى ستاندارتتى ءىس جۇزىندە جۇزەگە اسىرۋ بويىنشا ءتيىستى نورماتيۆتىك-قۇقىقتىق شارالار جۇمىستارى جۇرگىزىلۋدە، - دەپ مالىمدەدى ءى ءى م.

كامەرالار مىندەتىنە قاراي جىكتەلەدى

ساۋدا جانە ينتەگراتسيا مينيسترلىگى وكىلدەرىنىڭ مالىمەتىنشە، اۋلاعا باقىلاۋ جاسايتىن كامەرا ادامنىڭ بەت-الپەتىن نەمەسە كولىك ءنومىرىن تانيتىن جابدىققا تەڭەستىرىلمەيدى. جاڭا ستاندارت بەينەكامەرالاردى العاش رەت ماقساتى بويىنشا جىكتەيدى.

سىرتقى اۋماقتار مەن ىشكى ءۇي-جايلاردى باقىلاۋعا ارنالعان جەكە تالاپتار قاراستىرىلعان. باسقا ساناتتارعا ادامداردى انىقتاۋ جانە سايكەستەندىرۋ، اۆتوموبيلدەردىڭ مەملەكەتتىك تىركەۋ نومىرلەرىن تانۋ كامەرالارى جانە باسقارىلاتىن قۇرىلعىلار كىرەدى.

ىشكى ىستەر مينيسترلىگى رەسمي ساۋالعا بەرگەن جاۋابىندا بۇعان دەيىن بەينەباقىلاۋ جۇيەلەرىنىڭ ءبىرىڭعاي ستاندارتىنىڭ بولماۋى دەرەكتەردى جيناۋ مەن وڭدەۋ پروتسەسىن باياۋلاتىپ، جۇمىس بارىسىنا كەدەرگى كەلتىرگەنىن العا تارتتى.

ءبىرىڭعاي ستاندارتىنىڭ بولماۋى دەرەكتەردى جيناۋ مەن وڭدەۋ پروتسەسىن باياۋلاتىپ، جەدەل ءىس- قيمىلداردىڭ تيىمدىلىگىنە بەلگىلى ءبىر دەڭگەيدە كەدەرگى كەلتىردى جانە بەينەباقىلاۋ جۇيەلەرى سول كەزەڭدەگى قولدانىستا بولعان نورماتيۆتىك-قۇقىقتىق اكتىلەرمەن بەكىتىلگەن تەحنيكالىق ستاندارتتارعا سايكەس ورناتىلدى جانە پايدالانىلدى. الايدا، قازىرگى ۋاقىتتا ەنگىزىلىپ جاتقان سيفرلىق شەشىمدەر مەن ءبىرىڭعاي جۇيە بۇل جاعدايدى تۇبەگەيلى وزگەرتەدى، - دەدى ۆەدومستۆو وكىلدەرى.

قۇجاتتا كامەرالاردىڭ ءتۇرى، قۇرىلىمى بويىنشا دا بىركەلكى ستاندارتتار ەنگىزىلدى. ەندى تۇرعىن ءۇي، كوشەلەرگە، دۇكەندەرگە كەز-كەلگەن بەينەباقىلاۋ كامەراسىن ورناتا بەرۋگە بولمايدى. جابدىقتى تاڭداۋ كەزىندە ماتريتسا ءتۇرىن، اجىراتىمدىلىقتى، جارىق سەزگىشتىگىن، كادر جيىلىگىن جانە وبەكتيۆ سيپاتتامالارىن ەسكەرۋ قاجەت. ستاندارت جۇمىس تەمپەراتۋراسىنىڭ دياپازونىن، سونداي-اق شاڭنان، ىلعالدان جانە باسقا دا سىرتقى اسەرلەردەن قورعاۋ كلاسىن انىقتايدى.

ستاندارتتىڭ جاڭالىقتارىنىڭ ءبىرى - بەينەكامەرالاردىڭ تەحنيكالىق سيپاتتامالارىنا قويىلاتىن ءبىرىڭعاي ەڭ تومەنگى تالاپتاردى بەلگىلەۋ، - دەدى تەحنيكالىق رەتتەۋ جانە مەترولوگيا كوميتەتىنىڭ ءتوراعاسى جاننا ەسەنبەكوۆا.

جازبالار كەمىندە ءبىر اي ساقتالۋى ءتيىس

ەنگىزىلگەن تالاپتار جەكەلەگەن كامەراعا ەمەس، بۇكىل باقىلاۋ جۇيەسىنە قاتىستى. جاڭا ستاندارت بويىنشا ەندى جازبالاردى ساقتاۋدىڭ ەڭ تومەنگى مەرزىمى 30 تاۋلىكتى قۇرايدى. جۇيەلەر دەرەكتەر الماسۋدىڭ زاماناۋي حاتتامالارىن قولداۋى جانە ۇلتتىق اقپاراتتىق قاۋىپسىزدىك تالاپتارىنا ساي بولۋى قاجەت.

ەندى ءارتۇردى كامەرا وندىرۋشىلەردىڭ جابدىقتارى ءوزارا ۇيلەسىمدى بولۋى قاجەت. بۇل بولاشاقتا بۇرىن ورناتىلعان تەحنيكانى تولىق اۋىستىرماي-اق، كامەرالاردى سيفرلىق مونيتورينگ جۇيەلەرىنە قوسۋعا مۇمكىندىك بەرەدى.

كامەرالار قانداي جاڭا مۇمكىندىكتەرگە يە بولدى؟

ستاندارتتا بەينەاناليتيكا جۇمىسى دا قاراستىرىلدى. بۇدان بىلاي بەينەباقىلاۋ جۇيەلەرى بەت-الپەتتى تاني الادى، كولىك قۇرالدارىنىڭ مەملەكەتتىك نومىرلەرىن وقي الادى جانە وقيعالاردى تىركەي الادى.

ءى ءى م جاڭا جۇيەگە ەنگىزىلىپ جاتقان جاساندى ينتەللەكت الگوريتمدەرى پوليتسيا قىزمەتىنە جوعارى تەحنولوگيالى مۇمكىندىكتەر بەرەتىنىن العا تارتتى.

ەندى تۇلعالاردى تەك بەت- الپەتى بويىنشا عانا ەمەس، جىنىسى، جاسى، ساقالىنىڭ بولۋى، كوزىلدىرىك، ماسكا نەمەسە باس كيىمى سياقتى ناقتى اتريبۋتتار بويىنشا جەدەل ىزدەۋگە بولادى. كولىك قۇرالدارىن تەك مەملەكەتتىك نومىرىمەن ەمەس، ونىڭ ءتۇسى، ماركاسى جانە مودەلى سياقتى سيپاتتامالارى بويىنشا اۆتوماتتى تۇردە تانۋ جانە تالداۋ مۇمكىندىگى پايدا بولدى، - دەپ ءتۇسىندىردى ءى ءى م.

بۇعان قوسا، جۇيە قوعامدىق ورىنداردا تاستالعان زاتتاردى، قارۋدى، ادامداردىڭ شامادان تىس جينالۋىن، ءتىپتى ءتۇتىن مەن ءورت بەلگىلەرىن ناقتى ۋاقىت رەجيمىندە انىقتاپ، جەدەل حابارلاۋعا جانە قالالىق تازالىققا قايشى ارەكەتتەردى تىركەۋگە مۇمكىندىك بەرەدى.

ءى ءى م ۇسىنعان دەرەكتەرگە سايكەس، قازىر سيفرلىق تەحنولوگيالاردى قولدانۋ ارقىلى قىلمىستىق قۇقىق بۇزۋشىلىقتاردىڭ اشۋ دەڭگەيى 72,7 پايىزدى قۇرايدى.

مينيسترلىكتىڭ مالىمەتىنشە، زاماناۋي بەينەاناليتيكا مەن جاساندى ينتەللەكت تەحنولوگيالارىن ەنگىزۋدىڭ ناتيجەسىندە ىزدەۋدە جۇرگەن تۇلعالاردى، پروباتسياداعىلاردى، جوعالعانداردى جانە ميگراتسيالىق زاڭنامانى بۇزۋشىلاردى انىقتاۋ تيىمدىلىگى ايتارلىقتاي ارتقان. بۇل باعىتتاعى پيلوتتىق جوبا 2024-جىلدىڭ سوڭىندا ىسكە قوسىلدى.

جۇيەنىڭ جۇمىس ناتيجەلەرى بويىنشا پيلوتتىق كەزەڭنەن باستاپ جالپى 2 مىڭعا جۋىق ادام انىقتالدى. ناقتىراق ايتقاندا، 2024-جىلدىڭ سوڭى مەن 2025-جىل ارالىعىندا 1 مىڭنان استام ادام انىقتالىپ، ۇستاۋعا الىنسا، 2026-جىلى 800 دەن ادام تۇتقىندالعان.

ۆەدوموستۆونىڭ حابارلاۋىنشا، قازىرگى ۋاقىتتا ەلىمىز بويىنشا ۇلتتىق بەينەباقىلاۋ جۇيەسى ەنگىزىلۋدە، ونىڭ اياسىندا 48 مىڭنان استام كامەرا بەينەاناليتيكا فۋنكسياسىمەن جابدىقتالدى.

بۇل جوبانىڭ باستى ماقساتى - ۆيدەواناليتيكانى تەك جولدارمەن شەكتەمەي، ستراتەگيالىق ماڭىزدى نىساندار مەن قوعامدىق ورىندارعا، سونىڭ ىشىندە اۋەجايلارعا، ۆوكزالدارعا، قوناق ۇيلەرگە، مەشىتتەر مەن ساۋدا ورتالىقتارىنا كەڭىنەن ەنگىزۋ، - دەپ مالىمدەدى مينيسترلىك.

جاڭا تالاپتار جاڭا وبەكتىلەردىڭ جوبالارىنا قالاناتىن نەمەسە عيماراتتار مەن قۇرىلىستاردى رەكونسترۋكسيالاۋ كەزىندە ورناتىلاتىن كامەرالار مەن بەينەباقىلاۋ جۇيەلەرىنە قولدانىلادى.