ۇلىتاۋ وبلىسىندا 14 مىڭعا جۋىق كيىكتىڭ ولەكسەسى جويىلدى
جەزقازعان. KAZINFORM - ۇلىتاۋ وبلىسىنداعى مامانداندىرىلعان تابيعات قورعاۋ پروكۋراتۋراسىنىڭ تاپسىرماسىنا ساي سونداعى ۋاكىلەتتى ورگاندار مەن ەرىكتىلەر ەلدى مەكەندەردى كيىكتەردىڭ ولەكسەلەرىنەن تازارتىپ جاتىر. بۇل تۋرالى وبلىستىق پروكۋراتۋرا ءمالىم ەتتى.
- قازىرگى ۋاقىتتا 14 مىڭعا جۋىق كيىك ولەكسەلەرى جينالىپ، ارنايى ورىنداردا جويىلدى. اتالعان ءىس-شاراعا 145 ادام جانە 67 تەحنيكا جۇمىلدىرىلعان. كەڭگىر سۋ قويماسىن ولەكسەلەردەن تازارتۋ جۇمىستارى توتەنشە جاعدايلار ورگاندارىنىڭ قىزمەتكەرلەرى جانە ارنايى تەحنيكالارىمەن جۇرگىزىلىپ جاتىر، - دەلىنگەن حابارلامادا.
سونىمەن بىرگە جەرگىلىكتى تۇرعىندار دا اتسالىسىپ، وزدەرىنىڭ ۇلەستەرىن قوسىپ جاتىر.
بۇل باعىتتاعى جۇمىستار ءالى دە جالعاساتىن بولادى. بۇل جاعداي پروكۋراتۋرا ورگاندارىنىڭ ايرىقشا باقىلاۋىندا.
ەسكە سالا كەتەيىك، بۇعان دەيىن ەكولوگيا مينيسترلىگى كيىكتەردىڭ قىرىلۋىنا قاتىستى تۇسىنىك بەرگەن بولاتىن.
