ەلىمىزدىڭ ىشكى ساياسات تۇجىرىمداماسى قالاي ازىرلەنىپ جاتىر

استانا. KAZINFORM - ەلىمىزدە ىشكى ساياسات تۇجىرىمداماسى ازىرلەنىپ جاتىر. بۇل تۋرالى مەملەكەتتىك كەڭەسشى ەرلان قارين ءمالىم ەتتى.

- ءدال قازىرگى ۋاقىتتا، بۇل قۇجاتتى دايىنداۋ بويىنشا جۇمىستار جوسپارعا سايكەس ءجۇرىپ جاتىر. بۋرابايدا ۇلتتىق قۇرىلتاي وتكەننەن كەيىن، ونىڭ قورىتىندىسى بويىنشا ارنايى جينالىس وتكىزىپ، سول جەردە ۇلتتىق قۇرىلتايدا كوتەرىلگەن ءاربىر باستامانى، پرەزيدەنتتىڭ ءاربىر تاپسىرماسىن جۇزەگە اسىرۋ بويىنشا ارنايى جوسپار قابىلدادىق. ول بىرنەشە تارماقتان تۇرادى. ءاربىر باستاما، تاپسىرمانىڭ ورىندالۋ مەرزىمىن سول جەردە بەكىتىپ، جوسپارلاپ قويدىق. سول قۇجاتقا سايكەس، بارلىق تاپسىرمانى ءتيىستى جۇزەگە اسىرۋ جۇمىستارى ءجۇرىپ جاتىر، - دەدى ەرلان قارين ءماجىلىس دەپۋتاتى نارتاي ارالباي ۇلىنا بەرگەن سۇحباتىندا.

سونداي-اق مەملەكەتتىك كەڭەسشى اتالعان قۇجاتتى دايىنداۋعا ساراپشىلار تارتىلعانىن ايتتى جانە ونىڭ سەبەبىن ءتۇسىندىردى.

- ەڭ الدىمەن ساراپشىلاردى تارتىپ جاتىرمىز. سەبەبى ول جان-جاقتى قۇجات. ونىڭ ىشىندەگى ءاربىر قاعيدات پىسىقتاۋدى تالاپ ەتەدى. نەگىزگى جوباسىن ايدوس سارىم، دانيار اشىمبايەۆ، مارات شيبۋتوۆ جانە تاعى باسقا ارىپتەستەرىمىز، ياعني پارلامەنت دەپۋتاتتارىنىڭ قاتىسۋىمەن دايىندالعان بولاتىن. ۇلتتىق قۇرىلتايدا ءبىزدىڭ ارىپتەستەر وسىنداي قۇجات قابىلداۋ كەرەك ەكەن دەپ، ءجاي عانا وي ايتقان جوق، سول قۇجاتقا ەنۋ كەرەك دەگەن نەگىزگى سۇلباسىن دا دايىنداعان بولاتىن. كەيىنىرەك ونى قازاقستان ستراتەگيالىق زەرتتەۋلەر ينستيتۋتىنىڭ ساراپشىلارىمەن بىرلەسىپ وتىرىپ، ونى ءارى قاراي پىسىقتاپ، فورماعا كەلتىرىپ، قۇجاتتىڭ نەگىزگى نۇسقاسىن ۇسىنعانبىز. سودان بەرى ءاربىر تالقىلاۋدان كەيىن قۇجاتتىڭ قۇرىلىمى، مازمۇنى كەم دەگەندە 50 پايىزعا وزگەرگەن شىعار. ءتىپتى كەيبىر تاراۋلاردى مۇلدەم الىپ تاستاپ نەمەسە جاڭا ءبىر تاراۋ، بولىمدەردى ەنگىزدىك.

نەگىزىنەن ساراپشىلار قاۋىمداستىعى جانە ۇلتتىق قۇرىلتاي مۇشەلەرى بەلسەنە قاتىسىپ جاتىر. ۇلتتىق قۇرىلتاي مۇشەلەرى جەكە تۇلعا عانا ەمەس، ءار تۇلعا بەلگىلى ءبىر قاۋىمداستىق، بەلگىلى ءبىر توپتىڭ وكىلى. سوندىقتان بۇل جەردە ءارتۇرلى باعىتتاعى، كوزقاراستاعى ازاماتتاردىڭ ۇسىنىستارىن ەسكەرۋگە تىرىسىپ جاتىرمىز. بۇل قۇجات جان- جاقتى، مۇمكىندىگىنشە قوعامداعى، قازىرگى ۋاقىتتا ورنىققان ساياسي پليۋراليزمگە سايكەس، ءارتۇرلى پىكىردەگى، ءارتۇرلى كوزقاراستاعى ازاماتتاردىڭ ويلارىن، ۇسىنىستارى ەسكەرىلەتىن جاسالىناتىن قۇجات بولادى دەپ ويلايمىن، - دەيدى ول.

ودان ءارى ەرلان قارين ىشكى ساياسات تۇجىرىمداماسىنىڭ ماقساتىن ءتۇسىندىردى.

- بۇل قۇجات كەيبىرەۋلەر ويلاپ جۇرگەندەي، يدەولوگيانى جاريالاپ، ونى بەكىتۋ ەمەس. مەن الەۋمەتتىك جەلىدە كەيبىر پىكىرلەردى وقيمىن. كەيبىر ساراپشىلار بۇل قۇجاتتا ۇلتتىق يدەولوگيانى جاريالاپ، بەكىتۋ كەرەگىن ايتادى. بۇل قۇجاتتىڭ ماقساتى ەلدە بەلگىلى ءبىر ساياسي يدەولوگيانى رەسمي تۇردە بەكىتۋ دەپ تۇسىنبەگەن ءجون.

بەلگىلى ءبىر يدەولوگيانى، يدەيانى جارلىقپەن، وكىممەن، زاڭمەن بەكىتۋ مۇمكىن ەمەس. ول قوعامنىڭ، مەملەكەتتىڭ، ەلدىڭ دامۋى بارىسىندا ءوزى ايقىندالادى. سوندىقتان دا بۇل قۇجاتتىڭ ماقساتى بەلگىلى ءبىر يدەولوگيانى، بەلگىلى ءبىر يدەيانى كابينەتتە ويلاپ تاۋىپ، جاريالاۋ ەمەس. قۇجاتتىڭ نەگىزگى ماقساتى - مەملەكەتتىك ىشكى ساياساتتاعى جۇرگىزىپ جاتقان جۇمىستاردى جۇيەلەۋ، - دەپ تولىقتىردى مەملەكەتتىك كەڭەسشى.

بۇعان دەيىن قازاقستان تاريحى بويىنشا جارىق كورەتىن جەتى تومدىقتا رەسەي، قىتاي، پارسى، ەۋروپا ارحيۆتەرىنەن تابىلعان تىڭ قۇجاتتار مەن دەرەكتەر پايدالانىلاتىنىن جازعان ەدىك. بۇل تۋرالى مەملەكەتتىك كەڭەسشى ەرلان قارين دەپۋتات نارتاي ارالباي ۇلىنا بەرگەن سۇحباتىندا ايتتى.

اۆتور

داۋلەت ىزتىلەۋ