ەلىمىزدەگى ۇشاق رەيستەرىنىڭ جاپپاي كەشىگۋىنە شاعىم كوبەيدى - سەناتور
استانا. KAZINFORM - سەناتور اندرەي لۋكين دەپۋتاتتىق ساۋالىندا اۋەكومپانيالار رەيستەرىنىڭ جۇيەلى تۇردە كەشىگۋى، جولاۋشىلار قۇقىقتارىنىڭ بۇزىلۋى جانە تاسىمالداۋشىلاردىڭ ءوز مىندەتتەرىن ورىنداماۋى ماسەلەسى تۋرالى ايتتى.
وسى ورايدا ول ۇكىمەت باسشىسى ولجاس بەكتەنوۆتىڭ اتىنا دەپۋتاتتىق ساۋال جولدادى.
«قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى» زاڭىنا سايكەس تاسىمالداۋشىلار ۇشۋ ءتارتىبى وزگەرگەن جاعدايدا جولاۋشىلار الدىندا جاۋاپتى بولادى. اتاپ ايتقاندا، ۇشاق اۋە كومپانياسىنىڭ كىناسىنەن كەشىككەن بولسا، جولاۋشىلارعا ءتورت ساعاتتان استام كۇتكەنى ءۇشىن ىستىق تاماق جانە بەس ساعاتتان استام كەشىككەندە قوناقۇيدە تۇرۋ سياقتى قاجەت قىزمەتتەردى كورسەتۋگە مىندەتتى. الايدا، تاجىريبە كورسەتكەندەي، كوپتەگەن اۆياكومپانيالار بۇل تالاپتاردى جۇيەلى تۇردە بۇزىپ كەلەدى.
«قازاقستاندىقتار كەيىنگى ەكى ايدا ەلىمىزدەگى اۋەجايلاردا رەيستەردىڭ جاپپاي كەشىگۋىنە ءجيى شاعىمدانعان. 12-تامىزدا KС860 «اقتاۋ - الماتى» رەيسى 13 ساعاتتان استام ۋاقىتقا كەشىككەن، ءبىراق اۆياكومپانيا جولاۋشىلارعا بالاما رەيس نەمەسە تۇنەپ شىعاتىن ورىن تۋرالى ۇسىنىس جاساماعان. Air Astana ءار جولاۋشىعا وتەماقى رەتىندە 2000 تەڭگەلىك ۆاۋچەر بەرىپ، نارازىلىق تۋىنداتتى. بۇگىنگى تاڭدا بۇل ماسەلە ماڭىزدى بولىپ وتىر جانە جالعاسىپ كەلەدى. جوعارىدا اتالعان جانە باسقا دا وقيعالار جولاۋشىلار مەن اۆياتسيا سالاسى وكىلدەرىن قاتتى الاڭداتىپ وتىر»، - دەدى اندرەي لۋكين.
سونىمەن قاتار سەناتور اۋە قاتىناسى ساپاسىنىڭ ناشارلاۋى جولاۋشىلاردىڭ قاۋىپسىزدىگى مەن جايلى ۇشۋىنا كەرى اسەرىن ەتەتىندىكتەن، ماسەلە بيلىك تاراپىنان نازار اۋدارۋدى تالاپ ەتەدى.
«ۇشاق كەشىككەن كەزدە قىزمەت كورسەتۋ ستاندارتتارىن قاتاڭداتۋدى ۇسىنامىن. ۇشاقتاردىڭ تەحنيكالىق جاعدايىن قاتاڭ باقىلاۋدى قامتاماسىز ەتۋ كەرەك. اۆياكومپانيالاردىڭ ۇشۋ ءتارتىبىن ساقتاۋ جونىندە جاريا رەيتينگىن ەنگىزۋ كەرەك، بۇل قىزمەت كورسەتۋ ساپاسىن ارتتىرۋدى ىنتالاندىرادى. جولاۋشىلاردىڭ وتەماقىسىن جابۋ ماقساتىندا اۆياكومپانيالاردى رەيستەردىڭ كەشىگۋىنەن مىندەتتى تۇردە ساقتاندىرۋ ەنگىزۋ كەرەك»، - دەدى سەناتور لۋكين.
بيىل تامىز ايىندا ق ر كولىك ۆيتسە-ءمينيسترى تالعات لاستايەۆ جاز ايلارىندا رەيستەردىڭ كەشىگۋى دەرەكتەرىنە قاتىستى تۇسىنىك بەردى.
