ەلىمىزدىڭ شالعاي اۋىلدارىندا ساپالى فيلمدەر تەگىن كورسەتىلمەك

استانا. KAZINFORM - ەلىمىزدە ۇزدىك وتاندىق فيلمدەردىڭ ون كۇندىگى باستالدى. ەندى ۋاقىت سىنىنان ءوتىپ، كوپشىلىكتىڭ ىستىق ىقىلاسىنا بولەنگەن كينوتۋىندىلار كورەرمەننىڭ الدىنا ءوزى بارادى.

 بۇل تۋرالى ۇلتتىق كينونى قولداۋ ورتالىعى باسقارما ءتوراعاسىنىڭ ورىنباسارى ادىلەت وماروۆ Kazinform تىلشىسىنە بەرگەن سۇحباتىندا مالىمدەدى.

- بۇل 13 فيلمنەن تۇراتىن توپتاما. بۇل جەردە انيماتسيالىق فيلمدەردەن باستاپ، دەرەكتى، كوركەم فيلمدەر ۇسىنىلادى. ءبىز بۇل فيلمدەردى وبلىستارعا تەگىن بەرەمىز. ال ولار بارلىق قالا، اۋدان، اۋىل، شالعاي ەلدى مەكەندەرگە كورسەتىپ، بىزگە ەسەپ بەرۋى كەرەك، - دەيدى ادىلەت وماروۆ.

اتاۋى «ون  كۇندىك» بولعانىمەن، فيلمدەر جىل بويى كورسەتىلمەك. وتاندىق كينوتۋىندىلاردى بارلىق قالا، اۋدان، اۋىل تۇرعىندارى تۇگەلدەي تەگىن كورە الادى.

- بۇل ون كۇندىك جىلدىڭ باسىندا قاراعاندى وبلىسىندا باستالعان بولاتىن. سودان كەيىن جامبىل، س ق و- دا بولدى. قازىر باتىس قازاقستان وبلىسىندا جالعاسىپ جاتىر. جىل سوڭىنا دەيىن قازاقستاننىڭ بارلىق وڭىرلەرىندە كورسەتۋدى جوسپارلاپ وتىرمىز، - دەيدى باسقارما قىزمەتكەرى.

بۇل شارانىڭ ماقساتى - ەل تۇرعىندارىنا ساپالى فيلمدەردى كورسەتۋ. سولاي كينو مادەنيەتىن قالىپتاستىرىپ، ۇلتتىق كينەماتوگرافيا سالاسىن دامىتۋ.

- ءبىزدىڭ ماقساتىمىز - ۇلتتىق قۇندىلىقتارىمىزدى ناسيحاتتايتىن فيلمدەرىمىزدى ءبىر اۋىلدا ءبىر عانا ادام تۇرسا دا، سول كىسىگە جەتكىزۋ. وزدەرىڭىز بىلەسىزدەر، بىزدە كينوتەاترلار وبلىس ورتالىقتارى مەن قالالاردا عانا بار. ال اۋدانداردا جوق. سوندىقتان ءبىز وسى باستامانى قولعا الىپ، بۇگىنگى ۇلتتىق كينونىڭ دەڭگەيىن كوتەرىپ، كورەرمەندى كاسىبي ساپالى فيلمدەردى كورۋگە تاربيەلەۋىمىز كەرەك، - دەيدى ۇلتتىق كينونى قولداۋ ورتالىعى باسقارما ءتوراعاسىنىڭ ورىنباسارى.

بۇل فيلمدەردى كورۋ ءۇشىن قالاعا نە اۋدان ورتالىعىنا بارىپ قاجەتى جوق. ەگەر شالعاي ەلدى مەكەندە تۇرساڭىز، 13 فيلمنەن قۇرالعان توپتاما الدىڭىزعا ءوزى بارادى.

- ءبىز ءار وبلىس اكىمدىكتەرىمەن بايلانىستامىز. ولارمەن بىرگە كەستە قۇرىپ، سول كەستەگە ساي ءار اۋدان، اۋىلدىڭ مادەنيەت ورتالىقتارىندا، مەكتەپتەردەگى اكت زالدارىندا تەحنيكالىق مۇمكىندىككە سايكەس كورسەتىپ جاتىرمىز. ءبىز ۇسىنعان فيلمدەردى كورۋ ءۇشىن قالاعا كەلۋدىڭ قاجەتى جوق. كەرىسىنشە، ءبىز فيلمدەردى كورەرمەننىڭ الدىنا الىپ بارامىز، - دەيدى ادىلەت وماروۆ.

ايتا كەتەيىك، ەندى قازاقستاندىق فيلمدەردى «كينوپويسكتەن» كورۋگە بولادى.

اۆتور

ارۋجان ماحمۋت