ەلىمىزدىڭ بارلىق سۋ قويمالارى سۋ تاسقىنى كەزەڭىنە دايىندالۋدا
استانا. KAZINFORM - ەلىمىزدىڭ بارلىق سۋ قويمالارى تاسقىن سۋىن قابىلداپ، قاۋىپسىز وتكىزۋگە دايىندالۋدا. بۇل تۋرالى سۋ رەسۋرستارى جانە يرريگاتسيا مينيسترلىگى حابارلادى.

− سۋ سالاسىنىڭ بارلىق ماماندارى كەلە جاتقان كوكتەمگى سۋ تاسقىنى كەزەڭىنە بەلسەندى دايىندىقتى باستادى. دالىرەك ايتقاندا، ەلىمىز بويىنشا 1502 گيدروتەحنيكالىق قۇرىلىسقا زەرتتەۋ جۇرگىزىلىپ، بارلىق انىقتالعان كەمشىلىكتەر جويىلعان. ارنايى جول كارتاسى ازىرلەنىپ، 10 وبلىستا 51 وزەن مەن 1 كول انىقتالىپ، 814 شاقىرىم ۋچاسكە تازارتىلاتىن بولدى، - دەدى مينيسترلىكتىڭ رەسمي وكىلى ءمولدىر ابدۋاليەۆا ورتالىق كوممۋنيكاتسيالار قىزمەتىندە وتكەن بريفينگتە.
وتكەن جىلى سۋ قويمالارى مەن باسقا دا گيدروتەحنيكالىق نىسانداردى جاڭعىرتۋ جانە جوندەۋ بويىنشا اۋقىمدى جۇمىس باستالدى.
− اقتوبە سۋ قويماسىنا 36 جىلدا العاش رەت رەكونسترۋكتسيا جاسالدى. بۇگىندە قويمانىڭ سىيىمدىلىعى 245 ميلليون تەكشە مەترگە جەتتى. ال باتىس قازاقستان وبلىسىندا سوڭعى 58 جىلدا ءبىرىنشى رەت كيروۆ سۋ قويماسى جوندەلدى. بۇدان بولەك، سۋارۋ كانالدارى قالپىنا كەلتىرىلدى، ناتيجەسىندە شارۋالارعا، فەرمەرلەرگە ارنالعان سۋارمالى سۋدىڭ ساپاسى جاقسارادى. اتىراۋدا 41 جىلدا العاش رەت 74 شاقىرىم بولاتىن «اقساي» كانالى جوندەلدى، - دەپ تولىقتىردى سپيكەر.
استانا سۋ قويماسىن رەكونسترۋكسيالاۋ ءۇشىن جوبالاۋ-سمەتالىق قۇجاتتاما ازىرلەنىپ جاتىر.
شىعىس قازاقستان وبلىسىندا قاندىسۋ وزەنىندەگى سۋ قويماسىن قايتا جاڭعىرتۋعا دايىندىق جۇرۋدە.
− ەلىمىزدىڭ 16 وڭىرىندە جالپى ۇزىندىعى 584 شاقىرىم بولاتىن 400 گە جۋىق بوگەت جوندەلدى. 6 وبلىستىڭ 84 ەلدى مەكەنىندە قورعانىس بوگەتتەرى مەن گيدروتەحنيكالىق قۇرىلىستاردى سالۋ، رەكونسترۋكتسيالاۋ جانە قالپىنا كەلتىرۋ جۇمىستارى جۇرگىزىلۋدە. بۇل اقمولا، اقتوبە، باتىس قازاقستان، پاۆلودار، سولتۇستىك قازاقستان جانە قوستاناي وبلىستارى. بۇل جۇمىستار 359 مىڭ ادامنىڭ قاۋىپسىزدىگىن قامتاماسىز ەتۋگە مۇمكىندىك بەرەدى، - دەدى م. ابدۋاليەۆا.
ايتا كەتەيىك، رەسەي دە قازاقستانمەن شەكارالاس ايماقتاردا سۋ تاسقىنىنا قارسى شارالار جۇرگىزۋدە.