ەلىمىزدە تاعى ءۇش جەر سەرىگى قۇراستىرىلادى
استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ سەناتتىڭ جالپى وتىرىسىندا جەر سەرىكتەرىن بايلانىس سالاسىنا تارتۋ جۇمىسى جالعاساتىنىن ايتتى.
«جەردىڭ قاشىقتان زوندتاۋ جوبالارىنا توقتالساق، ءتۇسىرۋ مۇمكىندىگى ورتا دەڭگەيدەگى ءۇش جەر سەرىگىن جاساۋ تۋرالى كەلىسىمشارتقا قول قويىلدى. ول جەر سەرىكتەرىن ىسكە قوسۋ 2027-جىلعا جوسپارلانعان. سونداي-اق، موڭعوليامەن جەر سەرىگىن ءوندىرىپ، ەكسپورتتاۋ تۋرالى كەلىسىمشارتقا قول قويىلدى. گەوستاتسيونارلىق ەمەس بايلانىس جۇيەسىنە كەلسەك، OneWeb جەرۇستى ستانساسى قولدانىسقا بەرىلدى. 1800 مەكتەپ Starlink ارقىلى ينتەرنەتكە جالعاندى. 2026-جىلى Amazon Kuiper جانە SpaceSail جۇيەلەرى ارقىلى شالعاي وڭىرلەرگە ينتەرنەت جەتكىزۋ جوسپارلانعان»، - دەدى ۆەدومستۆو باسشىسى.
جاسلان ماديەۆ KazSat-3 جەر سەرىگىنىڭ كەلەشەگىنە دە توقتالدى.
«KazSat-3R جوباسى تۋرالى ايتساق، KazSat-3 جەر سەرىگىن اۋىستىرۋ 2029-جىلعا جوسپارلانىپ وتىر. بۇل جەرسەرىك بايلانىسى مەن tv- كورسەتىلىمدى ۇزدىكسىز بەرۋ ءۇشىن كەرەك. قازىر جوبالاۋ جۇمىستارى ءجۇرىپ جاتىر. جەر سەرىگىن جاساۋ كەلىسىمشارتىنا 2025-جىل قول قويۋ جوسپارلانعان»، - دەدى مينيستر.
وسىعان دەيىن قازاقستاننىڭ 2025-جىلى عارىشقا ءوز زىمىرانىن ۇشىراتىنى تۋرالى جازدىق.
