ەلىمىزدە سيفرلىق تەڭگە جوباسى اياسىندا العاشقى جول قولدانىسقا بەرىلدى

استانا. KAZINFORM - پاۆلودار وبلىسىندا سيفرلىق تەڭگەنى ەنگىزۋ بويىنشا پيلوتتىق باعدارلاما اياسىندا العاشقى جول جوباسى ءساتتى اياقتالدى.

«قازاۆتوجول» مالىمەتىنشە، جوبا جۇمىستارى «ر ف شەكاراسى (ومبىعا) - مايقاپشاعاي» اۆتوجولىنىڭ 383-390 شاقىرىم ارالىعىنداعى 7 شاقىرىمدىق ۋچاسكەدە جۇرگىزىلدى. اتالعان اۆتوجول I تەحنيكالىق ساناتقا جاتادى. بۇل ۋچاسكەدە سوڭعى جوندەۋ جۇمىستارى 2015-جىلى جۇرگىزىلگەن بولاتىن.

ورتاشا جوندەۋ اياسىندا كەلەسى جۇمىستار اتقارىلدى:

- 128800 م2 اۋداندا ەسكى جابىن جونىلدى؛

- 128800 م2 اۋداندا جاڭا ۇستىڭگى قابات توسەلدى؛ - 35000 م2 اۋداندا جول جيەگى نىعايتىلدى؛

- 14 شاقىرىمدا جول تاڭبالارى سالىندى.

تەحنيكالىق سيپاتتاماعا سايكەس بارلىق ورىندالعان جۇمىس كولەمى «eQurylys» اقپاراتتىق جۇيەسىندە تىركەلىپ، جوبانىڭ جۇزەگە اسىرىلۋ بارىسىنا تولىق اشىقتىق پەن سيفرلىق باقىلاۋ قامتاماسىز ەتىلدى.

جوبا اياسىندا بارلىق جۇمىس ءساتتى اياقتالىپ، جول پايدالانۋعا بەرىلدى. ونىڭ جۇزەگە اسىرىلۋى جول ينفراقۇرىلىمىنىڭ نورماتيۆتىك جاعدايىن ساقتاۋعا، سونداي-اق جول پايدالانۋشىلارعا قاۋىپسىز ءارى قولايلى قوزعالىستى قامتاماسىز ەتەدى.

ايتا كەتەيىك، بۇگىندە رەسپۋبليكالىق ماڭىزى بار اۆتوجولداردىڭ بويىندا 1500 گە جۋىق جول بويى قىزمەتتەرىنىڭ نىساندارى جۇمىس ىستەيدى. ولاردىڭ ىشىندە شاعىن ءدامحانالاردان باستاپ ءىرى كوپفۋنكتسيونالدى كەشەندەرگە دەيىن بار.