ەلىمىزدە گەرمانيانىڭ قانداي ۋنيۆەرسيتەتتەرىنىڭ فيليالى اشىلادى

استانا. KAZINFORM - بۇگىن اقوردادا عىلىم جانە جوعارى ءبىلىم ءمينيسترى ساياسات نۇربەك ەلىمىزدە گەرمانيانىڭ قانداي ۋنيۆەرسيتەتتەرىنىڭ فيليالى مەن عىلىمي-زەرتتەۋ ورتالىقتارى اشىلاتىندىعىن ايتتى.

«نەمىس كانتسلەرى ولاف شولتستىڭ ەلىمىزگە ساپارى اياسىندا 6 نەگىزگى قۇجاتقا قول قويىلادى. بىرىنشىدەن، الماتى ەنەرگەتيكا جانە بايلانىس ۋنيۆەرسيتەتى نەگىزىندە بەلگىلى انحالت ۋنيۆەرسيتەتىنىڭ فيليالى اشىلادى. ەنەرگەتيكا، ەلەكتر ەنەرگەتيكاسى سياقتى بىرنەشە باعدارلامامەن باستايمىز. ەكىنشىدەن اقتاۋداعى ش. ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىندە تۇراقتى ينجينيرينگ فيليالى اشىلادى. بۇل بەرلين تەحنيكالىق ۋنيۆەرسيتەتىنىڭ فيليالى. «2+1» فورمۋلاسىمەن جۇمىس ىستەيمىز، ياعني ەكى جىل قازاقستاندا ءبىر جىل گەرمانيادا، تاعى ءبىر جىل وندىرىستە»، - دەدى مينيستر.

ونىڭ اتاپ وتۋىنشە، مۇنان بولەك، پرەزيدەنت جانىنداعى ۇلتتىق عىلىم اكادەمياسىنىڭ جانىندا قازاقستان-نەمىس عىلىمي ورتالىعى، وسكەمەن قالاسىنداعى شىعىس قازاقستان تەحنيكالىق ۋنيۆەرسيتەتىندە مەتاللۋرگيا جانە كەن بايىتۋ سالاسىنداعى ارنايى عىلىمي-زەرتتەۋ ورتالىعى اشىلادى.

«وعان ءبىرقاتار ۋنيۆەرسيتەت كىرەدى. نەگىزگى ماقسات - مەتاللۋرگيا، سيرەك مەتالدار، كەن بايىتۋ باعىتىندا بىرلەسكەن عىلىمي جوبالارمەن اينالىسۋ. بەسىنشىسى - ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ نەگىزىندە نەمىس ءتىل ۇيرەنۋ ورتالىعى. بۇگىن ونى رەسمي اشامىز. سوڭعى جىلدارى نەمىس ءتىلى ۇمىتىلىپ كەتتى. بۇرىن نەمىس ءتىلى مەكتەپ، جوعارى وقۋ دەڭگەيىندە جاقسى وقىتىلعان. ءقازىر مۇلدەم قالعان جوق. سوڭعى كەلىسىمشارت - الماتىداعى ۇلتتىق اگرارلىق ۋنيۆەرسيتەت نەگىزىندە سۋ شارۋاشىلىعى عىلىمي-زەرتتەۋ ورتالىعىن اشۋ. قازىرگى تاڭدا سۋ ۇلكەن ماسەلەگە اينالدى. سوندىقتان ارنايى پراكتيكالىق قولدانبالى عىلىمي-زەرتتەۋ ورتالىعى بولادى»، - دەدى ساياسات نۇربەك.