ەلىمىزدە مەكتەپكە دەيىنگى جاستاعى بالالاردىڭ دامۋ كارتاسى ەنگىزىلدى

استانا. KAZINFORM - قازاقستان وقۋ-اعارتۋ مينيسترلىگى مەكتەپكە دەيىنگى جاستاعى بالالاردىڭ دامۋ كارتاسىن اۆتوماتتاندىردى.

مينيسترلىكتىڭ باسپا ءسوز قىزمەتى حابارلاعانداي، بۇل كارتا بالالاردىڭ دامۋىن باقىلاۋعا جانە ولاردىڭ بويىندا داعدىلاردىڭ قانشالىقتى قالىپتاسقانىن باعالاۋعا مۇمكىندىك بەرەدى.

مەكتەپكە دەيىنگى ءبىلىم بەرۋ دەپارتامەنتىنىڭ ديرەكتورى اتاپ وتكەندەي، بۇل كارتا باستاۋىش سىنىپ پەداگوگتەرى ءۇشىن بالالاردىڭ مەكتەپ باعدارلاماسىن ودان ءارى مەڭگەرۋىندە ماڭىزدى قۇرال بولماق. كارتا سيفرلىق فورماتقا اۋىستىرىلىپ، ۇلتتىق ءبىلىم بەرۋ دەرەكتەر بازاسىمەن ينتەگراتسيالانعان، بۇل مەكتەپتەرگە اقپاراتتى بەرۋدە مەكتەپكە دەيىنگى جانە باستاۋىش ءبىلىم بەرۋ اراسىنداعى ۇزدىكسىز بايلانىستى قامتاماسىز ەتەدى.

«مەكتەپكە دەيىنگى جاستاعى بالالاردىڭ دامۋ كارتاسى بىزگە ءار بالانىڭ قاجەتتىلىكتەرىن تەرەڭىرەك تۇسىنۋگە جانە ونى مەكتەپتە ءساتتى ءبىلىم الۋعا دايىنداۋعا مۇمكىندىك بەرەدى. كارتادا دامۋدىڭ بارلىق ماڭىزدى اسپەكتىلەرى كورسەتىلگەن: فيزيكالىق جاعدايى، تيپتىك وقۋ باعدارلاماسىن مەڭگەرۋ بارىسىندا قالىپتاساتىن كوممۋنيكاتيۆتىك، تانىمدىق، زياتكەرلىك، شىعارماشىلىق، زەرتتەۋشىلىك جانە الەۋمەتتىك- ەموتسيونالدىق داعدىلارى. مۇنداي جۇيەلى ءتاسىل ساپالى ءبىلىم بەرۋدى قامتاماسىز ەتەدى جانە بالالاردىڭ باستاۋىش مەكتەپتە ءساتتى بەيىمدەلۋىنە ىقپال ەتەدى»، - دەيدى مانار اداموۆا.

ايتا كەتەيىك، ەلىمىزدە 2-6 جاس ارالىعىنداعى شامامەن 1 ميلليون بالانى قامتيتىن 11,5 مىڭنان استام مەكتەپكە دەيىنگى ۇيىم جۇمىس ىستەيدى.

بالانى مەكتەپكە دەيىنگى ۇيىمعا قابىلداۋ ءۇشىن قانداي قۇجاتتار قاجەت ەكەنىن جازعان بولاتىنبىز.

اۆتور

ەلميرا ورالبايەۆا