ەلىمىزدە بيداي، كۇرىش، ماقتا ەگۋ قىسقارتىلدى

استانا. KAZINFORM - بيىل ەلىمىزدە جالپى ەگىس الاڭى 23,8 ميلليون گەكتاردى قۇرادى. وندا بيداي، كۇرىش القاپتارى قىسقارىپ، مايلى داقىلدارعا باسىمدىق بەرىلگەن. بۇل جونىندە اۋىل شارۋاشىلىعى ءمينيسترى ايداربەك ساپاروۆ ۇكىمەت وتىرىسىندا ايتتى.

پرەزيدەنت تاپسىرماسىنا سايكەس، رەسپۋبليكا بويىنشا ەگىس القاپتارىن ءارتاراپتاندىرۋ جوسپارلارىنا قول جەتكىزىلدى.

«بيداي القابى 450,3 مىڭ گەكتارعا قىسقاردى، سونداي- اق مايلى داقىلدار جانە قانت قىزىلشاسى القاپتارى سايكەسىنشە 608 مىڭ جانە 9,4 مىڭ گەكتارعا ۇلعايتىلدى. سۋدى كوپ قاجەت ەتەتىن داقىلدار الاڭى - كۇرىش 6,9 مىڭ گەكتارعا، ماقتا 16 مىڭ گەكتارعا قىسقاردى»، - دەدى ا. ساپاروۆ ۇكىمەتتىڭ بۇگىنگى وتىرىسىندا.

مەملەكەت باسشىسى 5 جىلدا اۋىل شارۋاشىلىعىنىڭ جالپى ءونىمىنىڭ كولەمىن 2 ەسەگە ارتتىرۋ مىندەتىن قويدى.

بيىل ەكونوميكالىق ءوسۋدى قامتاماسىز ەتۋ جونىندەگى ءبىرىنشى كەزەكتەگى ءىس-قيمىل جوسپارى شەڭبەرىندە سالانىڭ ءوسىمىن %11,6 دەڭگەيىندە قامتاماسىز ەتۋ ماقساتى قويىلعان.

«جىل باسىنان بەرى 6 ايدا اۋىل شارۋاشىلىعىنىڭ جالپى ءونىمىنىڭ كولەمى %3,4- عا ۇلعايىپ، 1,6 تريلليون تەڭگەنى قۇرادى. بۇل رەتتە مال شارۋاشىلىعىندا ناقتى كورسەتكىش يندەكسى %103,5، وسىمدىك شارۋاشىلىعىندا ناقتى كورسەتكىش يندەكسى - %103 قۇراعان. جوسپارلانعان %11,6 دەڭگەيدەگى كورسەتكىشكە قول جەتكىزۋ ەگىن جيناۋ جۇمىستارى اياقتالعاننان كەيىن اعىمداعى جىلدىڭ ەكىنشى جارتىجىلدىعىندا قامتاماسىز ەتىلەدى»، - دەدى اۋىل شارۋاشىلىعى ءمينيسترى.

اۆتور

ايجان سەرىكجان قىزى