ەلىمىزدە بايلانىس ساپاسىن قاداعالاپ، ازاماتتاردىڭ قۇقىقتارىن قورعايتىن قور قۇرىلادى

استانا. KAZINFORM - قازاقستاندا «تەلەكوممۋنيكاتسيالار تۋرالى» جاڭا زاڭ جوباسى اياسىندا بايلانىس ساپاسىن ارتتىرۋ جانە ازاماتتاردىڭ قۇقىقتارىن قورعاۋ قورى قۇرىلماق.

Фото: freepik
Фото: freepik

بۇل تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى تەلەكوممۋنيكاتسيا كوميتەتىنىڭ ءتوراعاسى دامير سەيسەمبەكوۆ ايتىپ بەردى.

- بۇل قور قازىرگى زاڭدا قاراستىرىلماعان. ءبىراق كەيبىر وپەراتورلاردا امبەباپ بايلانىس قىزمەتتەرى تۋرالى تۇسىنىك بار. ولار تەلەكوممۋنيكاتسيانى جاڭعىرتۋ مەن دامىتۋعا باعىتتالعان قوسىمشا سالىقتىق جۇكتەمە العان، - دەدى دامير سەيسەمبەكوۆ «استانا حابتا» وتكەن ستراتەگيالىق تالقىلاۋدا.

ونىڭ ايتۋىنشا، بايلانىس سالاسىنداعى جابدىقتار مەن باسقا دا ەلەمەنتتەردى ۇنەمى جاڭارتىپ وتىرۋ قاجەت، الايدا بۇل سالاداعى قارجىلاندىرۋ جەتكىلىكسىز دەڭگەيدە قالىپ وتىر.

- قازىرگى ۋاقىتتا بۇل قاراجات قوسىمشا سالىق تۇرىندە رەسپۋبليكالىق بيۋجەتكە تۇسەدى، ءبىراق رەسپۋبليكالىق بيۋجەتتەن تىكەلەي ينۆەستيتسيا الۋ مۇمكىن ەمەس. كەيىن قاراجاتتى جالپى ەرەجەلەر بويىنشا رەسپۋبليكالىق بيۋجەتتەن سۇراۋعا تۋرا كەلەدى. بۇل سالادا ينۆەستيتسيانىڭ جەتكىلىكسىزدىگىن بايقاپ وتىرمىز. قور ءدال وسى ماسەلەنى شەشۋگە ارنالعان، - دەپ ءتۇسىندىردى كوميتەت باسشىسى.

سونىمەن بىرگە، ول اۋىلدىق ەلدىمەكەندەردەگى بايلانىس قىزمەتتەرىن سۋبسيديالاۋ تۋرالى ايتتى.

- ءبىزدىڭ ەلىمىزدىڭ اۋماعى ۇلكەن، اۋىلداردىڭ اراسى الىس. كوپتەگەن سپيكەرلەر اۋىلدارداعى قىزمەتتى كوممەرتسيالىق تۇردە كورسەتۋ اسا ءتيىمدى ەمەس ەكەنىن ايتتى. ءبىز رەتتەۋشى ورگان رەتىندە، وپەراتورلاردى ءتۇرلى تاسىلدەرمەن ىنتالاندىرامىز، سالىقتىق جەڭىلدىكتەر، تىكەلەي سۋبسيديالار قاراستىرىلعان. بۇل اۋىل تۇرعىندارىنىڭ تەلەكوممۋنيكاتسيالىق قىزمەتتەردى قالا تۇرعىندارىمەن تەڭ دارەجەدە الۋىن قامتاماسىز ەتۋ ءۇشىن جاسالىپ وتىر، - دەپ قورىتىندىلادى د. سەيسەمبەكوۆ.

بۇعان دەيىن د. سەيسەمبەكوۆ قىتايدىڭ Shanghai Spacecom Satellite سپۋتنيكتىك كومپانياسىمەن مەموراندۋمعا قول قويۋ جوسپارلانعانىن ايتقان ەدى.

سونداي-اق ق ر پرەزيدەنتىنىڭ كەڭەسشىسى قۋانىشبەك ەسەكەيەۆ زاڭ قابىلداۋدا كەشىكپەۋ كەرەگىن تىلگە تيەك ەتتى.

سوڭعى جاڭالىقتار