ەلىمىزدە اگرارلىق تۋريزم قىزمەتىنىڭ ەرەجەلەرى ازىرلەنىپ جاتىر
استانا. KAZINFORM - بۇگىندە ەلىمىزدە اگرو جانە اۋىل ءتۋريزمىن دامىتۋ باعىتىندا ءبىرقاتار ءىس-شارا قولعا الىندى. تولىعىراق تۋريزم جانە سپورت ءمينيسترى ەربول مىرزابوسىنوۆ ايتىپ بەردى.
- اۋىلدىق تۋريزمدى دامىتۋ - ماڭىزدى باعىتتاردىڭ ءبىرى. بۇل تەك مادەنيەتتى جانە ءداستۇرلى ءومىر سالتىن ساقتاۋعا ەمەس، سونىمەن قاتار وڭىرلەردىڭ تۇراقتى دامۋىنا مۇمكىندىك بەرەدى. «ۇزدىك تۋريستىك اۋىل - 2025» ۇلتتىق بايقاۋى وسى باعىتتى ىلگەرىلەتۋ ءۇشىن وتكىزىلدى. بايقاۋ ارقىلى بولاشاعى بار اۋىلدار انىقتالىپ، جەرگىلىكتى حالىقتىڭ تۋريزمگە قاتىسۋى ارتتى. سونىمەن قاتار اگرو-تۋريزمدى ىلگەرىلەتۋ ماقساتىندا فەرمەرلەرگە تۋريستىك قىزمەتپەن اينالىسۋ مۇمكىندىگىن بەرۋ ءۇشىن زاڭ جوباسى دايىندالىپ جاتىر. قازىر اۋىل شارۋاشىلىعى مينيسترلىگىمەن بىرلەسىپ، اگرارلىق تۋريزم قىزمەتىنىڭ ەرەجەلەرى ازىرلەنىپ جاتىر، - دەدى ەربول مىرزابوسىنوۆ ۇكىمەت وتىرىسىندا.
ءمينيستردىڭ مالىمدەۋىنشە، اتالعان ەرەجە اۋىلداعى شاعىن جانە وتباسىلىق كاسىپكەرلىكتى زاڭداستىرۋعا جانە قولداۋعا باعىتتالعان.
- ەتنوتۋريزمدى قامتيتىن اگرو-تۋريزم بويىنشا ادىستەمەلىك قۇرال ازىرلەندى. بۇل قۇرال فەرمەرلەر مەن قوناق ءۇي يەلەرىنە ارنالعان. 900 دەن استام اۋىل تۇرعىنى ارنايى ترەنينگتەردەن ءوتتى. ولارعا ءقوناقۇي اشۋ مەن جۇرگىزۋ تاسىلدەرى ۇيرەتىلدى، - دەيدى ۆەدومستۆو باسشىسى.
ايتا كەتەيىك، قازاقستان ت م د- دا ءبىرىنشى بولىپ تۋريزم ستاتيستيكاسىنا موبيلدى دەرەكتەردى ەنگىزدى.
ەسكە سالايىق، بىلتىر قازاقستانعا 15 ميلليوننان استام شەتەلدىك تۋريست كەلگەن.
