ەلىمىزدە اعزانى ترانسپلانتتاۋعا دونور جەتىسپەيدى

قازاقستاندا اعزا دونورلىعى بويىنشا پروبلەما بار. مىڭداعان ناۋقاستار دونور كۇتۋدە، دەپ حابارلايدى قازاقپارات ءتىلشىسى.

بيىل 9 - قازاندا قازاقستان اعزا دونورلارىنىڭ تاپشىلىعى ماسەلەلەرىن كوتەرۋ جانە ەلىمىزدە اعزا دونورلىعى مەن ترانسپلانتاتسيانى دامىتۋدىڭ ماڭىزدىلىعى تۋرالى ارنايى كۇن اتالىپ وتىلەدى.

«بۇگىنگى تاڭدا قازاقستاندا دونورلىق ورگاندارعا سۇرانىس جوعارى. سوڭعى كورسەتكىش بويىنشا، 3953 ناۋقاسقا كۇتۋ پاراعى بەرىلدى. ولار بۇيرەك، باۋىر، وكپە، جۇرەك ورگاندارىنا مۇقتاج جاندار، ياعني دونور كۇتىپ ءجۇر. سونداي- اق، ەلىمىزدە قايتىس بولعاننان كەيىن اعزاسىن دونور رەتىندە بەرۋ بويىنشا ستاتيستيكاسى تومەن. ايتار بولساق، 2022 -جىلى نە بارى 4 ءمايىت دونور رەتىندە 16 ادامنىڭ ءومىرىن ساقتاپ قالدى»، - دەدى ترانسپلانتتاۋدى جانە جوعارى تەحنولوگيالىق مەديتسينالىق قىزمەتتى ۇيلەستىرۋ جونىندەگى رەسپۋبليكالىق ورتالىقتىڭ قوعاممەن بايلانىس مامانى جانىبەك ۋسپانوۆ استانا قالالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ودان بولەك، استانادا 7 -قازاندا كەرەي- جانىبەك حاندار كوشەسى، 3 مەكەنجايىندا «اشىق ەسىك» كۇنى وتەدى. بۇل كۇنى ترانسپلانتولوگ دارىگەرلەر 18 جاستان اسقان ناۋقاستارعا ترانسپلانتاتسيا بويىنشا تەگىن كەڭەس بەرەدى. سونداي- اق، قايتىس بولعاننان كەيىن ورگانداردىڭ دونور رەتىندە قالدىرۋىنا نيەت ءبىلدىرۋ، كۇتۋ پاراعىن قۇرۋ جانە جۇرگىزۋ ماسەلەلەرى بويىنشا، سونداي- اق تۋىستىق اعزا دونورلىعى ماسەلەلەرى بويىنشا كەڭەستەر بەرەدى.

بريفينگتە ايتىلعان مالىمەتكە سايكەس، استانادا ورگان ترانسپلانتاتسياسى كەزەگىندە 536 ناۋقاس تۇر.

اۆتور

داۋلەت ىزتىلەۋ