ەلىمىز 100 تۇرعىندى 15 بەينەباقىلاۋ كامەراسى قاداعالايتىن دەڭگەيگە جەتكىزىلمەك
استانا. KAZINFORM - ەلىمىزدىڭ اۋماعىندا ورناتىلعان بەينەباقىلاۋ كامەرالارىنىڭ كومەگىمەن 5 مىڭ قىلمىس انىقتالدى. بۇل تۋرالى سەنات دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.
- ءى ءى م قۇقىق بۇزۋشىلىقتىڭ الدىن الۋدا تسيفرلىق شەشىمدەردى كەڭىنەن قولدانادى. «جەدەل باسقارۋ ورتالىقتارىنا شىعارا وتىرىپ ەلدى مەكەندەردى جاپپاي بەينەباقىلاۋ جۇيەلەرىمەن قامتۋ» جوباسى اياسىندا ەل اۋماعىن ىشكى ىستەر ورگاندارىنا شىعارا وتىرىپ بەينەكامەرالارمەن (100 تۇرعىنعا شاققاندا 15 بەينەباقىلاۋ كامەراسى ەسەبىنەن 3 ميلليون كامەرانىڭ بولۋى تالاپ ەتىلەدى) بارىنشا قامتۋ جوسپارلانۋدا. قازىرگى ۋاقىتتا جوبا اياسىندا قوعامدىق ورىنداردا جانە كوشەلەردە 1,4 ميلليون بەينەباقىلاۋ كامەراسى جۇمىس ىستەيدى. ونىڭ 386 مىڭى پوليتسيانىڭ ج ب و- عا جانە كەزەكشى بولىمدەرىنە قوسىلعان، - دەدى ۇكىمەت باسشىسى.
پرەمەر-مينيستر دەرەگىنشە، بەينەباقىلاۋ جۇيەلەرىنىڭ كومەگىمەن 5 مىڭ قىلمىستىق جانە 317,3 مىڭ اكىمشىلىك قۇقىق بۇزۋشىلىق انىقتالدى.
- سونىمەن قاتار، بەت-الپەتتى تانۋ جۇيەلەرى (اناليتيكالىق فۋنكتسيالارى بار 19 مىڭ كامەرا) اپپروباتسيالانۋدا. ولاردىڭ كومەگىمەن 569 ادام انىقتالىپ، ۇستالدى. ازاماتتار كوپ جينالاتىن ورىنداردا بەينەكامەرالارى، ديناميكاسى، ميكروفونى جانە پوليسياعا جۇگىنۋگە ارنالعان تۇيمەسى بار «SOS» تۇيمەلەرى ورناتىلعان. بەينەكامەرالاردى ورناتۋ جانە ولاردىڭ سانىن كوبەيتۋ ماسەلەسى تۇراقتى باقىلاۋدا، - دەدى ول.
ەستەرىڭىزگە سالا كەتسەك، سەناتور گەننادي شيپوۆسكيح ەلىمىزدە بۇزاقىلىق ارەكەتتەر - مەكتەپتەردەگى اگرەسسيۆتى مىنەز-قۇلىقتان باستاپ، كوشەدەگى توبەلەستەر كوبەيىپ بارا جاتقانىنا الاڭداۋشىلىق تانىتىپ، ۇكىمەت باسشىسىنىڭ اتىنا دەپۋتاتتىق ساۋال جولداعان ەدى.
وسى ساۋالعا جاۋاپ بەرگەن ۇكىمەت باسشىسى 2025-جىلدىڭ 1- قىركۇيەگىنەن ۇساق بۇزاقىلىق ءۇشىن جازا كۇشەيتىلەتىندىگىن ايتادى.
