لي ليانجەنىڭ 5 ومىرلىك ساباعى

استانا. قازاقپارات - گولليۆۋد جۇلدىزدارىمەن تانىستىرۋعا ارنالعان سيكلدى ماتەريالدارىمىزدى جالعاستىرامىز. بۇل جولى كەزەك ءاربىر فيلمىندە توبەلەس ونەرىنىڭ شەبەرىن سومدايتىن قىتايلىق اكتەر دجەت ليدە. دجەت لي (شىن اتى لي ليانجە) 1963 - جىلى بەيجىڭدە 26 -ءساۋىر كۇنى تۋعان.

دجەتتىڭ ەكى اپكەسى مەن ەكى اعاسى بولدى. كەنجە بالا ەكى جاسقا تولعاندا اكەسى قايتىس بولادى. اكەسىز قالعان وتباسى كەدەيلىك عۇمىر كەشەدى.

ول 8 جاسىندا مەكتەپكە بارعاندىقتان، قاتارلاستارىنان ءسال ۇلكەن بولادى. جاستايىنان دەنە شىنىقتىرۋ ساباقتارىن وتكىزىپ، ۇلگىلى وقۋشى بولعاندىقتان دا ونى مۇعالىمدەرى قاتتى قۇرمەتتەپ، سىيلايتىن بولعان. ەكىنشى سىنىبىندا دجەت قاتارلاستارىمەن بىرگە جازعى لاگەرگە بارىپ، سوندا ۋشۋ توبەلەس ونەرىمەن اينالىسا باستايدى.

كەيىن اكتەردىڭ ءوزى سپورتقا ارنايى قىزىعۋشىلىقپەن بارماعانىن، تەك سىنىپتاستارىمەن بىرگە بولعان سوڭ عانا ۋشۋمەن اينالىسا باستاعانىن مويىنداپتى. دەمالىستان كەيىن ۇستازدار وزگە وقۋشىلاردى ۇيىنە تارقاتىپ، ال دجەتتىڭ قالۋىن وتىنگەن.

وسى ۋاقىتتان باستاپ ونىڭ شەبەرلىگىن شىڭدايتىن جاتتىعۋلار كۇن سايىنعى ادەتكە اينالادى. بىرنەشە سىناق كەزەڭىنەن ءوتىپ، كەيىپكەرىمىز 1972 - جىلى ۋشۋدان ۇلتتىق چەمپيوناتقا قاتىسادى. وندا «ۇزدىك شەبەر» جۇلدەسىن الادى. وسى جەڭىسىنەن سوڭ ليدى كۇندەلىكتى ساباعىنان بوساتىپ، ارنايى جاتتىعۋ مەكتەبىنە جىبەرەدى.

1974 - جىلى قىتايدا ۋشۋ سپورتشىلارىنىڭ جارىستارى وتكىزىلىپ، ەڭ مىقتى دەلىنگەن 30 ادام تاڭدالادى. بۇل وتىزدىقتىڭ ىشىندە لي دە بار. بۇل كوماندا ا ق ش-تا قىتاي ەلىنىڭ نامىسىن قورعاۋى كەرەك بولادى. وسى ساپار دجەتتىڭ ءومىرىن تۇبەگەيلى وزگەرتتى.

لي ا ق ش ەلىنىڭ زاڭى مەن ەرەجەلەرىن وقىپ تاڭعالادى. ولاردىڭ نە جايلى ايتاتىنىن، نە ىستەپ نە قوياتىنىن قاداعالايتىن جاسىرىن كامەرالاردىڭ دا بولاتىنىن بىلگەن ول قوناق ءۇي بولمەسىندە ءاربىر ۆازا مەن شامنىڭ جانىنا بارىپ شوكولاد جانە تاعى دا باسقا ءتاتتى-ءپاتتى جەگىسى كەلەتىنىن ايتادى ەكەن.

قوناق ۇيگە قايتا ورالعاندا ايتىلعان ءتاتتى-پاتتىلەر داستارقاندا تۇرعاندا دجەت تاڭعالادى. ال ونىڭ جارىستاردا كورسەتكەن ونەرىن پرەزيدەنت ريچارد نيكسوننىڭ ءوزى ماقتايدى. وسى باستان ليدىڭ ا ق ش مادەنيەتىنە دەگەن ىنتىزارلىعى ويانادى. امەريكالىقتارمەن سويلەسە كەلە، ولاردىڭ كەڭ جارقىن، كوڭىلدى ەكەنىن جانە ولارمەن قارسىلاسۋعا بولمايتىنىن بىلەدى. ونىڭ ومىرگە دەگەن كوزقاراسى وسىلاي وزگەرەدى.

وتانىنا ورالعان لي ۋشۋدان ءبىرىنشى ۇلتتىق چەمپيوناتقا قاتىسىپ (1974)، ءبىرىنشى ورىنعا يە بولادى. وسىدان سوڭ وعان قىتايداعى ەڭ ۇزدىك دەگەن شەبەرلەر ساباق بەرە باستايدى. ال 1975 - جىلى، 12 جاسىندا لي بەس بىردەي اتالىمدا جەڭىمپاز اتانادى. ايتا كەتەلىك، بۇل جارىستا ۇلكەن ازاماتتار دا دجەتكە قارسىلىق بىلدىرە الماعان.

كينو ءومىر

18 جاسىندا دجەتتىڭ سپورتتاعى كوزتارتار ارەكەتتەرىن بايقاپ قالعان رەجيسسەرلەر ونى كينوعا تۇسۋگە شاقىرادى. قىتايلىق رەجيسسەرلەر وعان ەكىنشى بريۋس لي بولۋ كەرەك ەكەنىن ايتىپ ماقتاعاندا بالا دجەت ءوز الدىنا سول ماقساتتى قويادى. ونىڭ ەڭ ءبىرىنشى فيلمى «شاولين عيباداتحاناسى» (1982) دەپ اتالادى. سول فيلمدە لي باستى كەيىپكەردى سومدايدى. فيلم بىردەن كورەرمەن تارتىپ، كەيىندە تاعى دا ەكى سيكۆەلى تۇسىرىلەدى: «شاولين عيباداتحاناسى 2: شاولين بالالارى» (1983) جانە «شاولين عيباداتحاناسى 3: شاوليننىڭ توبەلەس ونەرى» (1986). سوڭعى سەريا 1989 جىلى كەڭەستىك ەلدەردە دە تەلەديداردان كورسەتىلە باستايدى. ءدال وسى شاوليندىك تريلوگيادان كەيىن وعان «دجەت» دەگەن ات بەرىلەدى. دجەت ءسوزى - «رەاكتيۆتى» دەگەن ماعىنانى بىلدىرەدى ەكەن.

وتاندىق بىرنەشە فيلمگە تۇسكەن سوڭ ول بۇكىل الەم تانيتىنداي اتاق جينايدى. كەيىندە 1998 - جىلى گولليۆۋد ساحناسىنا شىعادى. تۇڭعىش رەت «اجالدى قارۋ 4» فيلمىندە دجەت جاعىمسىز كەيىپكەردىڭ رولىن سومدايدى. بۇل رول باستاپقىدا دجەكي چانعا ارنايى جازىلىپ، ءبىراق اكتەر ودان باس تارتقان بولاتىن.

كەيىنگى فيلمدەرى قاتارىندا «رومەو اجال قۇشۋى ءتيىس» (2000 جىل)، «ايداهاردىڭ ءسۇيۋى» (2001 جىل)، «بىردەن-ءبىر» (2001 جىل)، «قاهارمان» (2002 جىل)، «بەسىكتەن تابىتقا دەيىن» (2003 جىل)، «شىنجىرلى ءيت دەنني» (2005 جىل)، «ەرجۇرەك» (2006 جىل)، «سوعىس» (2007 جىل) سياقتى كورەرمەن كوزايىمىنا اينالعان تۋىندىلار بار.

ءبىر قىزىعى، اكتەر «ماتريسا»، «تاسالانعان جولبارىس، جاسىرىنعان ايداهار» فيلمدەرىنە شاقىرتۋ الىپ، ولاردان باس تارتقان. سەبەبى ول ايەلىنە ەگەر جۇكتى بولسا ەشقايدا دا كەتپەي، قاسىندا بولاتىنىن ايتىپ، سەرت بەرگەن ەكەن. ليدىڭ «تاسالانعان جولبارىس، جاسىرىنعان ايداهار» فيلمىنە بارماعان سەبەبى دە وسى. ال كومپيۋتەرلەنگەن «ماتريسا» فيلمىندە ونىڭ ونەرى ەش قاجەت بولمايتىنىن ايتىپ، وعان ءاربىر اكتەر دە تۇسە الاتىن بولعاندىقتان باس تارتىپتى-مىس.

جەكە ءومىر

1987 - جىلى دجەت لي حۋان سيۋيانعا ۇيلەنەدى. حۋان دا سپورتشى. ول دا «شاولين عيباداتحاناسى» فيلمىنە تۇسكەن ەكەن. ولاردان ەكى قىز تارايدى. ال 1990 - جىلى دجەت پەن حۋان اجىراسادى. 1999 - جىلى دجەت قىتايلىق اكتريسا نينا لي چيمەن وتاسادى.

دجەت ليدىڭ 5 ومىرلىك ساباعى

1. بويسۇنۋ - سەنىڭ باستى قورعانىسىڭ.

«اينالاڭداعى جاۋ سەنىڭ ەگوڭ كوتەرىلگەن سايىن كۇشەيە تۇسەدى. مەن ەرەكشە ادام ەمەسپىن، مەن تەك توبەلەس ونەرىمەن كوپ اينالىسقانمىن. ەندى قولىمنان نە كەلەتىنىن كورسەتىپ قانا ءجۇرمىن. الەمدە مۇنى قايتالاي الاتىن ادامدار وتە كوپ».

2. ۇيلەسىمدىلىك - كۇشتەن ماڭىزدىراق.

«توبەلەس ونەرى ادامعا اۋىرتپاشىلىق اكەلەدى دەپ ويلاسام مۇڭايىپ كەتەمىن. ەڭ باستىسى توبەلەس ەمەس ەكەنىن كورسەتۋگە مۇمكىندىگىم بولمادى. بۇل اق پەن قارانىڭ تەڭدىگى، ين مەن ياننىڭ ۇيلەسىمدىلىگى. تەك ۇيلەسىمدىلىكتى تانىپ قانا ۇلى بولا الاسىڭ».

3. باقىت ءارقاشان دا سەنىمەن بىرگە.

«باقىتتى ىزدەپ الىستارعا كەتۋدىڭ قاجەتى جوق. ول سەنىڭ مىنا بولمەڭدە. سەن پروبلەمالارىڭنىڭ بارلىعىن دا جۇرەگىڭە ساقتاعانسىڭ، سول ءۇشىن ءوزىڭدى ءوزىڭ تانۋىڭ كەرەك. ءوزىڭنىڭ كىم ەكەنىڭدى ءبىلۋىڭ كەرەك. ءوزىڭنىڭ ىشكى الەمىڭدى تانىپ الساڭ، ەشكىمنەن دە قورىقپايتىن بولاسىڭ».

4. سەن تۋرالى وزگەلەردىڭ پىكىرى تەك فوندىق مۋزىكا.

«وزگەلەردىڭ سەنى باعالاۋىن مۋزىكا ويناپ تۇرعان اپاراتتى تىڭداعانداي بول. «سەن ادەمىسىڭ!» - ترام-پام-پام. «سەن اقىماقسىڭ!» - ترام-پام-پام. ەگەر وزگەلەردىڭ ساعان بەرگەن باعاسى سەنى الاڭداتسا ەسىڭ دۇرىس ەمەس».

5. ءولىم ءومىر سىيلايدى.

«مەن ولۋگە دايىنمىن. ەگەر ادام بالاسى بۇگىن نەمەسە ەرتەڭ ولەتىنىن بىلسە ءاربىر ءساتتى باعالاي باستايتىن ەدى».

دايىنداعان: ارداق قۇلتاي

massaget.kz